إن كنت تبحث عن سيارة لشرائها في هذه الايا مومع الارتفاع الكبير في أسعار السيارت، فإننا سنوضح أفضل السيارات الاقتصادية بسعر أقل من 400 ألف جنيه في مصر فتابعونا من خلال التقرير التالي:
السيارة الأولى
اليابانية سوزوكي بــالينو ، العربية هاتشباك، بتيجي بموتور 1400 سي سي، بيطلع قوة 95 حصان عند 6000 لفة في الدقيقة، متوصل بفتيس اوتوماتيك CVT، و 130 نيوتن متر عزم عند 4200 لفة في الدقيقة، و استهلاكها 5.1 لتر بنزين لكل 100 كيلو متر العربية تجميعها في الهند ووكيلها مودورن موتورز. العربية شبابية و شكلها كويس و مساحتها حلو علي عربية هاتشباك .
العربية موجود منها فئة واحدة بس وسعرها 320 الف جنية .. البالينو مش موجودة في اخر قايمة للتسعير من سوزوكي لكنها موجودة في المعراض برا و عليهم 40 الف و ارقام متفاوته في الاوفر برايس كالعاده فانت وشطارتك.
العربية الثانية
الماليزية بروتون ساجا،العربية سيدان صغيرة، بتيجي بمحرك 1300 (سي سي) بيطلع قدرة 94 حصان عند 6000 لفة في الدقيقة، متوصل بفتيس اوتوماتيك. بيخرج عزم دوران 120 نيوتن متر عند 4000 لفة في الدقيقة،العربية متوسط استهلاكها 6 لتر لكل 100 كيلو متر، العربية وكيلها اسم كبير و هو عز العرب الي تحته علامات كتير غير بروتون، و الي يضمنلك خدمة كويسة جدا، العربية اعتمادية لكن قطع غيارها غالية شوية، العربية سعرها 350 الف جنية لأول فئة، و370الف جنية لتاني فئة
العربية الثالثة
الصينية الي مالية شوارع مصر و العربية الاولي الي بيدور عليها الي عايز يشتري جديد ، السيدان BYD F3، العربية بتيجي بموتور 1500 سي سي، بيطلع 108 حصان عند 5800 لفة في الدقيقة، و مربوط بفتيس مانوال 5 سرعات ، بيطلع 145 نيوتن متر عند 4800 لفة في الدقيقة، العربية بتستهلك 6.5 لتر لكل 100 كيلو متر، العربية تجميع محلي، و قطع غيرها مالية السوق بشكل كبير لانها موجودة في السوق المصري اكتر من 15 سنة، و اعتمادية و كويسة جدا للشغل، وشنطتها واسعه جدا،و سعرها 340 الف جنية للفئة الاولي و تاني فئة بسعر 385 الف جنية و بتكون اوتوماتيك
و اخيرا العربية الرابعة
الصينية شيري اريزو 5 السيدان، العربية بتيجي بموتور 1500 سي سي، بيطلع 114 حصان بفتيس 5 غيار مانوال، بيطلع عزم دوران 141 نيوتن متر، العربية بتستهلك 7 لتر لكل 100 كيلو متر، العربية ممتازة للشغل و اعتمادية، مساحتها الداخلية كويسة جدا، و غبور وكيلها بيوفر ليها كل قطع الغيار الي محتاجها، العربية سعرها الرسمي 365 الف جنية للفئة الاولي و 405 و 430 الف جنية للفئتين التانية و التالتة و بيكونوا اوتوماتيك
السعر الي اتقال دا الرسمي، للاسف ممكن يبقي في اوفر برايس عليها في المعارض، ف لو انت محتاج عربية اليومين دول، دور كويس لغاية ما تلاقي عرض كويس، و اشتري اه اشتري، لان كل خبراء السيارات و اعضاء الشعبة مش متفائلين بالوضع الحالي للسوق و لا عارفين يتوقعوا الوضع لبكرا ختي، و بياكدوا ان الوضع مستمر لغاية ما يتم حل الازمات العالمية للانتاج، ربنا يعديها علي خير ، متنسوش تتابعونا علي الاموال بلس عشان يوصلكوا كل جديد.
