مع ارتفاع الاسعار، من الطبيعي أن تبحث على أي طريقة لتوفير الجنيه، وهذا لن يحدث إلا عندما تشتري بأرخص سعر ممكن، وهنا يكون الكلام على معارض الحكومة، وهل هي حقا الأرخص سعرا وما تفاصيل الـ 7 مستودعات التي ستنفذهم الدولة؟ تابعونا منخلال التقرير التالي:
3 اماكن تابعين للحكومه بيبيعوا السلع بسعر اقل 30% من باقي السوق وهي المجمعات الاستهلاكيه ومنفذ كلنا واحد واخيرا معارض اهلا رمضان.
والخبر الحلو ان الحكومة ضخت كميات جديدة من الزيت في ال3 اماكن دول، وهتلاقي الزيت فيها ارخص بحوالي 10 و 15 جنيه حسب النوع والوزن.
فهتلاقي الزيت 700 جرام بـ35 جنيه، والزيت 750 جرام بـ37 جنيه, والازازه اللتر ب 50 و 55 جنيه، كمان موجود الازازة وزن 2 لتر بـ100 جنيه، والزيت 2.5 لتر بـ130 جنيه، وال 3 لتر بسعر 135 جنيه، والازازة 2 لتر و200 جرام بسعر 170 جنيه.
وبرده السلع الاساسية التانية موجودة بأسعار مخفضة، فمثلا كيلو السكر والرز وزن 800 جرام بـ14.50 جنيه. وسعر الفول المدمس وزن 500 جرام ب8 جنيه، وكيلو االعدس بـ31 جنيه، وسعر كيلو السمنة بيبدأ من 42 جنيه.
وبالمناسبه دي، وزير التموين على المصيلحي سبق واكد ان مصر بتعيش موجه تضخم غير طبيعيه سببها التغييرات في سعر صرف الجنيه امام الدولار، وكمان ارتفاع اسعار الخامات والسلع الاساسيه عالميا نتيجه الازمه ما بين روسيا واوكرانيا.
ودلوقتي معدل التضخم في مصر بيسجل اعلى مستوى ليه من خمس سنين ووصل إلى 25.8% والجديد بقى ان الحكومه بتجهز لانشاء 7 مستودعات للسلع الاستراتيجيه, هدفهم تامين غذاء مصر.
وخلاص الحكومه اختارت أماكن المستودعات في محافظات مختلفه ومضت العقود مع الشركات اللي هتفذ، لأن القطاع الخاص هو اللي هيصمم ويبني ويدير ويشغل المستودعات على أعلى مستوى بالاتفاق مع الحكومه.
ودلوقتي جاري التنفيذ لانشاء اربع مستودعات في الاقصر والشرقيه والسويس والفيوم، وال3 مستودعات الباقيين هيتم تنفيذهم تباعا.
وفي ردها على ازمه ارتفاع الاسعار، وضحت الحكومه انها خدت 60 اجراء عشان تخفف العبء على المواطن، فخصصت (130) مليار جنيه للتعامل مع الازمة.
وأطلقت حزمة الحماية الاجتماعية من السنة اللي فاتت بصرف مبالغ استثنائية للأسر الأكثر احتياجا وأجلت زيادة أسعار الكهربا، وزودت الأجور والمرتبات والمعاشات، ورفعت ميزانية الدعم وزودت عدد المستفيدين من تكافل وكرامة.
كمان ضخت كميات اكبر من السلع الاستراتيجيه في السوق، وزودت المخزون الاستراتيجي منها، وافرجت عن مستلزمات الإنتاج والمواد الخام من الجمارك، واخيرا زودت عدد المعارض لبيع السلع للمستهلك باسعار مخفضة.
وهنا بقى يهمنا نعرف تجربتكم لو زرتم معارض اهلا رمضان: اشتريتوها منها ايه؟ ورأيكم إيه في الاسعار مقارنه بباقي السوق؟ وهل كل السلع المهمة موجودة فيها؟ شاركونا في التعليقات.
