اعتادنا الأيام الماضية أن نسمع جملة الاسعار ارتفعت ، واصبح المواطن دائما يحمل هم ارتفاع اسعار السلع وعلى الرغم من ان الحكومة تحدثت عن ضبط حالة الاسواق خلال الفترة القادمة، وذلك بسبب الإفراج عنالعديد من السلع، إلا ان سعر البيض ارتفع مجددا فكم وصل ؟ هذا ما سنتعرف عليه من خلال التقرير التالي:
البيض والفراخ من اكتر السلع اللي بنشوف سعرها بيزيد الايام دي، لكن اتفاجأنا انهاردة ان سعرهم زاد تاني، وطبق البيض البلدي زاد حوالي 3 جنيه، وبكدا يكون سعره وصل لـ 83.75 جنيه
لكن لسه البيض الاحمر والابيض سعرهم زي ما هو في الاسواق، عند اسعار امبارح، وده حسب ما اعلن عنه اتحاد منتجي الدواجن على فيسبوك، يعني سعر كرتونة البيض الأبيض بـ 80.75 جنيه.
ووصل سعر كرتونة البيض الأحمر لـ 83.75 جنيه يعني نفس سعر البلدي دلوقتي، وبيوصل لـ 85 جنيه في مناطق تانية.
ده غير سعر الفراخ البيضة وصل لـ44 جنيه، والفراخ البلدي سعرها بيتراوح بين 59 و61 جنيه.
وزيادة اسعار البيض والفراخ اللي وصلتلها الايام اللي فاتت كانت بسبب ازمة نقص الاعلاف، اللي المربين كانوا بيعانوا منها، وبقالهم شهور بيشتكوا من نقص مستلزمات الانتاج والاعلاف، والموجود سعره غالي، كمان مع أزمة قرب الغاء الاعتمادات المستندية، اللي عطلت دخول الاعلاف للاسواق.
وده اللي خلاهم يستغنوا عند كميات كبيرة اوي من الكتاكيت سواء بانهم رموهم في الشارع، او نهوا حياتهم بطريقة عنيفة، لانهم مش عارفين يربوهم، وكمان الناس مش عايزة تشتريهم
وكانوا بيقولوا ان حل مشكلتهم موجود في الاعلاف المتراكمة في الموانئ وان لازم الدولة تفرج عنهم، وده لان مصر بتنتج حوالي 1.6 مليار طائر في السنة، لكن الحكومة استجابت لكلامهم، والاسبوع اللي فات افرجت عن بضاعة بحوالي 300 مليون دولار.
ومنهم مستلزمات اعلاف وصلت لـ 172 الف طن من الذرة وفول الصويا، بحوالي 81 مليون دولار، وده كان بالتنسيق مع البنك المركزي. وبكدا تكون كمية الاعلاف اللي افرجوا عنها من شهر اكتوبر لغاية انهاردة عدت المليون طن، ومبلغهم وصل لـ 713 مليون دولار.
وقالوا ان رغم ان والسوق بيحتاج حوالي في الشهر 900 الف طن من الاعلاف، لكنهم هيساعدوا في انهم يسدوا الفجوة شوية، ويساعدوا المربين في تربية الدواجن، والاسعار تتوازن.
وعشان كدا الوزارة قالت انها جهزت لجان مراقبة وتفتيش، عشان يتابعوا الكميات اللي افرجوا عنها، ويشوفوا المصانع والمخازن ملتزمين بالسياسة العامة للدولة.
وكمان لانهم اكتشفوا ان في شركات بتشتري كميات كبيرة من لسوق، وبتبيعهم لمصانع العلاف بسعر بيعدي الـ 10.000 جنيه للطن، وده طبعا مخالفة للقانون، خصوصا انهم كدا بيستغلوا الازمة، لان التاجر اللي هيشتري الاعلاف بسعر عالي، هيغلي سعر الدواجن على المستهلك.
ورغم ان السعر برضو زاد، لكن مجلس الوزراء قال ان عملية توازن الاسعار دي بتاخد وقت شوية، لكن مسيرها هتستقر لما كميات اكتر من كدا من البضايع يفرجوا عنها، ودلوقتي قولولنا بتشتروا البيض والفراخ في منطقتكم بكام؟
