الكل يستعد وخصوصا من يبحث علي شقة بسعر مميز سواء له أو لأبنائه، لأن الحكومة ستفتح باب الحجز الإلكتروني خلال ساعات لحجز شقق سكن لكل المصريين 4, وفي مفاجأة مخصوص للناس التي قدمت في الإعلانات القديمة.
فياتري ايه التفاصيل؟ وامتي معاد التسليم؟ وطريقة الدفع هتكون ازاي؟ وإمتى الحكومة تسحب منك الشقة؟
خلال ساعات صندوق الإسكان الاجتماعي ودعم التمويل العقاري هيفتح باب الحجز الإلكتروني لشقق سكن لكل المصريين 4 وده بعد انتهاء فترة التقديم يوم الخميس 13 أبريل الجاري ، وكمان انتهاء فترة سداد مقدم الحجز في بنك التعمير والإسكان، بقيمة 50 ألف جنيه لكل الشقق، ومعاها 500 جنيه مصروفات إدارية.
و المفاجأة بقى ان الصندوق قسم حجز شقق سكن لكل المصريين 4 إلى مرحلتين:
الأولى هتبدأ من 30 أبريل الساعة 8 تحديدا لغاية يـوم الاثنيـن 1 مايو الساعة 12 منتصف الليل.
والمرحلة دي مخصصة بس للناس اللي سبق وقدمت في اعلانات سابقة للصندوق ومخدتش شقق بس مسحبوش مبلـغ مقـدم جدية الحجز، على أساس يبقى ليهم الأولوية في الإعلانات اللي بعد كده
أما بقى المرحلة التانية اللي حددها الصندوق للحجز الإلكتروني، فتبدأ مـن يــوم التلات 2 مايو مــن الساعة التاسعة صباحا لغاية يــوم الخميــس 4 مايو، الســاعة 12 منتصف الليل.والحجز في المرحلة دي هيكون متاح للكل سواء المتقدمين الجدد أو المُتقدمين بالإعلانات السابقة.
طيب إيه اللي هيحصل بعد كده؟بعد سداد مقدم جدية الحجز هيبقى عندك طريقتين للدفع:
١. تدفع باقي تمن الشقة كاش
٢. أو تكمل مقدم الحجز وتدفع 20% بمبلغ يتراوح من 45 ألف إلى 95 ألف جنيه، وبعدين تقسط الباقي بنظام التمويل العقاري بفائدة 7%، على مدة تصل إلى 20 سنة
وعشان تبقى عارف شقق طرح سكن لكل المصريين 4 موجودة في 6 محافظات، وهم القاهرة الجديدة بمحافظة القاهرة، وبياض العرب بمحافظة بني سويف، والعصلوجي بمركز الزقازيق بمحافظة الشرقية، والغردقة وسفاجا بمحافظة البحر الأحمر، ودمنهور بمحافظة البحيرة، ومدينتي الزرقا شطا بمحافظة دمياط.
والمميز في الإعلان ده ان الحد الأقصى للمدة الزمنية لاستلام الوحدات السكنية 6 شهور بس من تاريخ استلام خطاب التسليم من جهة التمويل.
وفي مهلة إضافية 6 شهور كمان لو خلصت ومستلمتش، الشقة هتتسحب منك ،، وخد بالك لازم تتأكد من صحة البيانات والمستندات اللي هتقدمها عند الحجز، وفي حالة المخالفة هتكون مسئولا جنائيًا ومدنيًا عن كل معلومة غلط.
وساعتها من حق الصندوق يلغي التخصيص ويسترد الوحدة من غير اي إنذار أو حكم قضائي مع اتخاذ كافة الإجراءات القانونية عشان يحفظ حقوقه مع تطبيق أحكام قانون الإسكان الاجتماعي ودعم التمويل العقاري رقم 93 لسنة 2018 وتعديلاته.
ودلوقتي بقى شاركونا في التعليقات وقوللنا إيه رأيكم في مبادرة سكن لكل المصريين وشروطها.
