يبدو أن “افرش شقتك بـ 35 ألف” هو شعار رفعه عدد كبير من تجار الأثاث في الفترة الأخيرة بهدف تخفيف الأعباء المالية على الشباب الذين يستعدون للزواج. هذه المبادرة لاقت إقبالًا كبيرًا من المواطنين.فما تفاصيلها؟
الشهور الأخيرة ناس كتير بدأت تشتكي من ارتفاع أسعار كل السلع تقريبا لأضعاف تمنها وطبعا السبب هو الدولار اللي ارتفع بنسبة100% تقريبا، وده طبعا أثر على كتيرمن الناس، خصوصا المقبلين على الجواز
وفيه منهم اللي اضطر يأجل جوازه لحد ما يقدر يجهز شقته، عشان كده قرر بعض التجار في واحد من محافظات مصر أنهم يعملو مبادرة لشرا الأثاث بالكامل وبأرخص الأسعار، بس إيه تفاصيل المبادرة دي؟
شوف ياسيدي، حسب تصريحات سعيد ترك واحد من تجار الأثاث في دمياط، لجريدة الوطن، إن بعض التجار أطلقوا مبادرة افرش شقتك بـ 35 ألف جنيه، ودي بقى بتشمل غرفة نوم وغرفة صغيرة مودرن خشب زان موديلات عالية من غير تشطيب، ودول سعرهم الأصلي يبدأ من 50 ألف جنيه
وحسب تصريحات مسعد الرداد عضو بالغرفة التجارية في دمياط للوطن، إن الإقبال على شرا الموبليا السنة دي ومع بداية فصل الصيف زاد عن السنين الأخيرة، وده خلى التجار تعمل عروض لجذب الزايرين
وقال إن المعروف إن فصل الصيف موسم الجواز عشان كده الإقبال بيزيد من جانب الشباب لشرا الأثاث، وقال إن متوسط أسعار غرف النوم الخشب الطبيعي بتبدأ من 9آلاف جنيه لحد 25 ألف
أما محمد السويدي وده واحد من التجار قال إن مبادرة افرش شقتك اللي بتكون من غرفة نوم
وغرفة صغيرة، تجار الأثاث في دمياط روجوا ليها عن طريق السوشيال عشان كل العرسان يعرفوا بالمبادرة
وده لأن السوشيال تعتبر من أكتر الوسايل اللي بتستخدمها للترويج لمنتجاتنا عشان بيتابعها مئات الآلاف المواطنين من كل محافظات الجمهورية
وطبعا دي مكنتش المبادرة الوحيدة لتخفيف الأعباء عن الشباب وده لأن كل يوم بنسمع عن مبادرات جديدة للعرسان، زي مبادرة منع زفة جهاز العروسة في الدقهلية، بس إيه تفاصيل المبادرة دي؟
أنا أقولك، حسب اليوم السابع، إن عدد من الشباب في المحافظة علقوا يافطة مكتوب عليها منع زفة جهاز العروسة، ودي كان الهدف منها تيسير الجواز بصفة عامة على الشباب وكانت أول الخطوات دي هي إلغاء زفة الجهاز، وده حسب واحد من شباب القرية
الشاب ده قال كمان إن الفكرة تم الترويج ليها في البداية عن طريق السوشيال ميديا بعد كده اتنقلت على أرض الواقع من خلال حملات التوعية والدعاية الورقية للمبادرة والحديث في المساجد وغيره
وقال كمان إن معظم الأهالي دلوقتي في قضايا شيكات وإيصالات أمانة وقعت عليها لشرا الأجهزة والعفش بشكل مبالغ فيه، لحد ما تعثروا في السداد واضطر أصحاب المحلات دي أنهم يقدموا الايصالات للمحكمة وده بينتهي بحبس الأسرة عشان كده عايزين نلغي فكرة زفة الجهاز نهائي
أما ياسر محمد وده واحد من المشاركين في المبادرة، قال إن فيه كتير من الغارمات في السجون بسبب مصاريف الجواز عشان كده بنته وجوزها بيساعدوه إن المبادرة دي تنتشر بشكل أكبر
ودلوقتي قولنا رأيك في تكاليف الجواز في مصر؟
