الكثير فرح بطرح شهادات الـ 255 من بعض البنوك المصرية، ولكن البعض يحزن والسر في قرارات البنوك الجديدة بخصوص القروض، فما القصة وما مصير المقدمين على قروض.
105 مليار جنيه حصيلة شهادات الجديدة بفايدة 25% لغاية دلوقتي، وده يبينلك حجم الإقبال عليها قد إيه.لكن العائد الكبير معناها تكلفة أكبر على البنوك، وده هيسمع في الفايدة على القروض، وعشان كده البنوك رفعت سعر الفائدة 7% على الأقل على كل القروض بضمان شهادات الادخار.
ده الي وضحته مصادر مصرفية لما قالت إن البنوك جالها تعليمات برفع الفائدة على الاقتراض بضمان الشهادات بنسبة 7% فوق سعر الاقراض لدى المركزي والمعروف بسعر الكوريدور.
وعشان تبقى الصورة أوضح، البنك حسب النظام القديم كان بيحسب لك فايده القرض بضمان الشهادة على اساس نسبة الفايدة اللي بتاخذها على الشهاده وبزيادة ما بين 2 إلى 3%.
يعني لو انت عندك شهاده بفائده 16% القرض بتاعك هتبقى فائدته ما بين 18 الى 19% لكن دلوقت بقى وحسب النظام الجديد الفائده على القرض هتتحسب 7% زياده على سعر الكوريدور في البنك المركزي زي ماقلنا
َوحاليا سعر الكوريدور هو 17.25% يعني اي قرض دلوقتي بضمان الشهاده نسبه الفائده عليه 24.5%، في حين ان الشهادات الجديده بتقدم لك عائد 25% سنويا يعني المكسب مش مستاهل.
وحسب المصادر، الخطوة دي الهدف منها منع التربح من الفارق بين الفايدة على القرض والفايدة على الشهادة الجديدة. وفي نفس الوقت، في بنوك زودت الفايدة على القروض الشخصية والسيارات بنسبة 3%، ولسة في بنوك بتدرس رفع الفائدة.
يعني مثلا البنك الأهلي رفع سعر الفائدة 3% على القروض الشخصية والسيارات مع زيادة سعر الفائدة على القروض المضمنة بالشهادات والودائع إلى 24.25%
كمان البنك العقاري المصري وميد بنك رفعوا سعر الفائدة على القروض الشخصية والسيارات بنسبة 3% بعد طرح الشهادة الجديدة.
أما بنك مصر فلسة بيدرس زيادة الفايدة على حسابات التوفير والودائع والقروض الشخصية للأفراد، وهيتم الإعلان عنها بعد حسم الفائدة، حسب محمد الإتربي رئيس بنك مصر. كمان بنك القاهرة عنده اجتماعات الأسبوع الحالي عشان يناقش رفع الفائدة على القروض الشخصية بنسبة تصل إلى 3%.
وخلال الساعات الأخيرة زادت طوابير العملاء على فروع البنك الأهلي وبنك مصر عشان يشتروا الشهادة الجديدة، خصوصا مع تصريحات رئيس بنك مصر ان طرحها هيبقى لمدة محدودة متعديش أسابيع.
وكمان تأكيده ان سعر الفايدة الحالي مميز ومش يتكرر وفرصة كويسة جدا لأي حد بيدور علي مكسب مضمون.انتوا بقي رايكم إيه هل شايفين الشهادة بفايدة 25%. هي الأفضل ولاعندكم اقتراحات تانية ؟
طيب لو كنتم ناويين تقدموا على قرض هتكملوا في الخطوات ولاهترجعوا في القرار بعد زيادة سعر الفايدة على القروض؟
