المصريين بيواجهوا أزمة حاليا في شراء البيض الطازج من الأسواق وهذا بعد ما سعره زاد وارتفع بشكل كبير خلال الفترة الماضية بسبب أزمة نقص الأعلاف، وهذا ما جعلهم يسألوا عن أسباب تفاقم الأزمة.
وفي تصريح صادم لشعبة البيض قات إن سعر طبق البيض هيوصل لـ 200 جنيه!، طيب ياترى الكلام ده حقيقي وليه سعره هيزيد بالشكل ده وهل في حل ممكن الحكومة تعمله عشان تقلل من الزيادة دي؟
شعبة بيض المائدة بالاتحاد العام لمنتجي الدواجن قالت بيان تحذيري خطير جدا وحذرت المواطنين فيه من وصول سعر طبق البيض لـ مستوى الـ 200 جنيه وإن ده هيحصل بسبب نقص الإفراج عن منتجات الأعلاف.
دي كمان أكدت أن سبب رجوع أزمة نقص الخامات مرة تانية هو نقص الأعلاف وإن اللي بيحصل دلوقتي، هتكون نتيجته وصول طبق البيض لـ 200 جنيه في الأسواق وده اللي هيكون ليه عواقب وخيمة على الأمن الغذائي المصري.
طيب نعمل إيه يعني عشان منوصلش للرقم ده ؟
بص يا سيدي شعبة البيض طالبت الحكومة بضرورة التحرك بسرعه و الإفراج عن خامات الأعلاف وده عشان تكفي الكميات المطلوبة بشكل يومي، وده لأنه الإفراجات اللي تمت الفترة اللي فاتت مكنتش بتتجاوز نسبة الـ 20% من المنتجات المستهلكة.
وقالت الشعبة إن سعر طن الذرة المستوردة وصلت لـ 18000 جنيه، وإنه كمان الذرة المحلية اللي بتنتج في منطقة شرق العوينات بيتم بيعها بنفس السعر المتداول في السوق السوداء.
دي كمان أكدت إنها متعرفش حاجة عن الكلام اللي بيتقال وبيأكد وصول شحنة ذرة تابعة لهيئة السلع التموينية، وإنهم مش عارفين هل بتم بيعها في السوق السوداء؟، ولا بتروح فين؟
أما بقى شعبة الدواجن فـ كان رأيها مختلف وده لأنه حسب تصريحات سامح السيد رئيس الشعبة فكان رأيه هو ضرورة تفعيل البورصة الرئيسيه الدواجن في القليوبية، وده لأنه شايف إن ده أول مقترح ممكن يساعد بجد في ضبط السوق.
وقال إن البورصة دي هتحدد السعر العادل للكيلو بناءً على التكلفة الفعلية وبحسب العرض والطلب في السوق وده هيخلي الأسعار مناسبة للمنتجين والمستهلكين يعني من الأخر يقصد تعويم الدواجن واننا نسبها يتحدد سعرها بناء على الطلب عليها.
ولو انت مش عارف فـ مشروع البورصة الرئيسية يعتبر الأول والأكبر من نوعه في محافظة القليوبية والهدف منه هو انتاج 30 مليون بيضة سنويا عشان يغطي احتياجات 6 مليون مصري عدد سكان المحافظة.
والحكاية مش بيض وبس لأ ده، المشروع بيتكون من مصنعين للأعلاف، وبتوصل طاقة كل واحد فيهم 5 آلاف طن سنويا، وكمان فيه عنابر لتربية وانتاج الدواجن، العنبر الواحد بيشيل 22.5 ألف طائر، وعشان كده من أهداف المشروع بيع دواجن الأمهات بأسعار مناسبة للمواطنين.
ولو فاكر ان المشروع لأهالي القليوبية بس تبقى غلطان، صحيح هم أول ناس هتستفيد لكن لو المحطات اشتغلت بكامل طاقتها هتنتج يوميا 4 آلاف طبق بيض بيتوزعوا على محافظات القاهرة والشرقية ومعاهم القليوبية طبعا.
وطبعا لو بتدور على مكان رخيص تشتري منه البيض، علطول روح على معرض أهلا رمضان، نفس الأسعار اللي بيقدمها مشروع ال30ـ مليون بيضة، والاهم ان المعرض ليه فرع في في كل المحافظات.
ولو بتسأل عن أسعار طبق البيض النهاردة فـ وصل 93 جنيه للطبق الأبيض و95 جنيه للطبق الأحمر فى المزرعة، أما بقى سعر كرتونة البيض الأحمر ف استقر النهاردة عند 105 جنيها للمستهلك.
و ده حسب تصريحات عبدالعزيز السيد، رئيس شعبة الثروة الداجنة بغرفة القاهرة التجارية، اللي أكد إن الحكومة بتستهدف زيادة إنتاج البيض بهدف تلبية احتياجات السوق المحلية وزيادة التصدير من خلال تطوير مشروع الدواجن التكاملى بالعزب بمحافظة الفيوم.
قولنا دلوقتي بتشتري طبق البيض بكام وهل انت شايف إن سعره ممكن يزيد فعلا؟
