هل تعرفوا سبب ثبات سعر الدولار في الفترة الأخيرة؟ وهل هذا يعني إن الحكومة تراجعت عن التعويم ولن تقوم بهذه الخطوة؟ رجعت في كلامها ومش هتعمل تعويم؟ ولماذا عاد شبح السوق السوداء من جديد؟
تقرير لبنك عالمي جاوب على كل الأسئلة دي وأهمها هل هيكون في قلق على الجنيه الفترة الجاية وياترى البنك المركزي ناوي على إيه؟ خليكوا معانا في التقرير ده واحنا نقولكم إيه الحكاية:
كل فترة بيطلع كلام بيأكد إن مصر على مشارف تعويم جديد للجنيه لكن اللي حصل الفترة اللي فاتت حيير المصريين، خاصة وإن سعر الدولار مقابل الجنيه بقالوا فترة ثابت وده معناه إن الحكومة متحكمة فيه، طيب تفتكروا إيه الأسباب اللي تخلي الحكومة تعمل كده؟
بنك جولدمان ساكس إنترناشونال الأمريكي في أحدث تقرير ليه اتكلم عن الأسباب اللي خلت الحكومة المصرية تعمل كده وقال إن التحكم في أسعار الصرف عمل لمصر مشاكل زي مشكلة السوق السوداء وقال إنها استمرت وزادت بسبب سياسة الحكومة وتحكمها في سعر الجنيه.
واللي بيحصل ده كان بالنسبة للمؤسسات الدولية مش طبيعي خاصة إن مصر بتواجه نقص في النقد الأجنبي وده بعد خروج استثمارات أجنبيه غير مباشرة بقيمة 22 مليار دولار وده حصل في 2022 نتيجة الأزمة الروسية الأوكرانية واللي اتسببت في خروج الأموال الساخنة من مصر .
طيب ياترى ليه الحكومة المصرية مش عايزة تعوم الجنيه دلوقتي ؟
جولدمان ساكس قال إن في اسباب كتير خلت الحكومة المصرية متنفذش قرار التعويم، منها إن سعر صرف الجنيه أقل من قيمتة العادلة بالفعل ، وده لأن الحكومة عملت تخفيض للجنيه السنة اللي فاتت أكتر من مرة وده اللي قلل من سعر الجنيه بنسبة 25% تقريبا
كمان قال إن سعر صرف الدولار مقابل الجنيه زاد خلال سنة واحدة بحوالي 96% وحقق قفزات كبيرة جدا وبعد ما كان الدولار بـ 15.76 جنيه في 20 مارس 2022 وصل دلوقتي لـ 30.94 جنيه وده فرق كبير جدا بأكتر من الضعف .
كمان البنك كان شايف إنه مفيش اي فايدة هتعود على مصر لو عومت الجنيه بشكل متكرر خاصة وإن قيمة الجنيه قلت فعلا.
وقال إن الحكومة مش هتستفاد حاجة لو عومت الجنيه تاني وإن ده مش هيزود المعروض من العملات الأجنبيه.
ده كمان أكد إننا عشان نشوف الجنيه في وضع أحسن من كده لازم نعتمد على تدفق الاستثمارات الأجنبية بشكل مباشر، وكمان نزود حصيلة الصادرات ونحاول نقلل الواردات أو على الأقل منزودهاش عن مستوياتها الحالية.
لكن خلي بالك البنك بردو حذر الحكومة المصرية من إنها تدخل في دوامة التضخم مع استمرار خفض الجنيه، وده لأنه كان شايف إن كل ما الجنيه قيمته تقل كل ما تزيد الضغوط التضخمية واللي هي أصلا بتعتبر مشكلة بتواجه المصريين.
وده لأن تخفيض قيمة الجنيه هيزود تكلفة الواردات وبالتالي هتزيد الأعباء دي على المصريين والأسعار هتبقى في السما.
دلوقتي قولولنا رأيكم هل انتوا شايفين إن التعويم فعلا مش فـ صالحنا؟
