بشرى سارة للمصريين، الحكومة ستوزع سلع مجانية على المواطنين، لكن هناك فئات معينة سوف تستفيد وتحصل على هذه السلع، ولكي تتعرف على هذه السلع تابعنا من خلال التقرير التالي:
معارض اهلا رمضان مش بس بتقدم سلع بأسعار مخفضة، لأ ده كمان في سلع بتتوزع ببلاش. ده اللي كشفه اتحاد الغرف التجارية، مع الإعلان عن مبادرة جديدة تخص كبار السن والأولى بالرعاية.
الفئتين دول بالذات لو راحوا معارض «أهلا رمضان» هياخدوا سلع مجانية زيت وسمنة، وبداية المبادرة كانت من أسيوط وسوهاج.
ودلوقتي الاتحاد بيتواصل مع التجار عشان يزودوا عدد السلع المجانية وينفذوا المبادرة في باقي المحافظات.وعلى فكرة مفيش أي شروط ومحدش هيقولك ورينا بطاقتك، اختيار المستفيدين هيكون من خلال الملاحظة.
ومن غير السلع المجانية، اهلا رمضان بيبيع السلع بتخفيض من 25 إلى 30%.
يعني مثلا السكر والرز بـ14.5 جنيه للكيلو. ونص كيلو المكرونة بـ10 جنيه، ونص كيلو العدس بـ٢١جنيه، وسعر الفول المعبأ بـ19 جنيه نص كيلو، وسعر الزيت بيبدأ من 30 جنيه لغاية 135 جنيه حسب النوع والوزن.
وسعر الشاي من 33 جنيه إلى 40 جنيه، و كيلو الفول في معارض اهلا رمضان بـ12 جنيه، و سعر الدقيق الفاخر يترواح ما بين 16 و17 جنيه.
وأسعار اللحوم بتختلف برضه، يعني اللحوم السوداني ما بين 155 و135 جنيه، واللحوم البلدي من 135 إلى 159 جنيه في كافة المنافذ.
وعلى فكرة من حقك تاخد الكمية اللي عاوزها كانت بشرط انك متكونش تاجر، وده اللي وزارة التموين بتعمل حملات رقابة بسببه، المفتشين بينزلوا المعارض لمنع دخول التجار للاستحواذ على السلع بأسعار مخفضة وإعادة طرحها بأسعار مرتفعة.
ولغاية دلوقتي افتتحت الوزارة حوالي 210 منفذ معرض “أهلا معارض ” في كل المحافظات على مستوى الجمهورية.
وعلى غير العادة، أعلنت الحكومة افتتاح معارض اهلا رمضان من اول السنة، وكمان بتدرس تمديدها لبعد شهر رمضان بفترة أكبر، وكل ده للتخفيف عن المواطنين في الازمة الاقتصادية.
في نفس الوقت، الحكومة بتصرف 300 جنيه منحة استثنائية على بطاقة التموين لللاسر الأكثر احتياجا والأولى بالرعاية برضه.
ومع استمرار ارتفاع الأسعار، مجلس الوزرا طلع وثيقة بيوضح فيها الموقف، وقال إن اللي بتمر بيه مصر هو جزء من أزمة عالمية، كل الدول فيها بتعاني من ارتفاع التضخم لمستويات محصلتش قبل كده.
خصوصا ان العالم خرج من الظروف الصحية في 2020 عشان تبتدي الأزمة الروسية الأوكرانية، وبسببها حصل نقص في سلاسل الإمدادات العالمية وكمان ارتفعت أسعار المواد الخام ومستلزمات الإنتاج.
لكن الحكومة حاولت تخفف على المواطنبن بتطبيق إجراءات الحماية الاجتماعية، وفي نفس الوقت طالبت الناس بترشيد الاستهلاك والاستغناء عن السلع غير الضرورية أو استبدالها بسلع تانية أقل في السعر.
فهل هتطبقوا الكلام ده؟، ولا طبقتوه اصلا؟ وقوللنا رحتوا معارض اهلا رمضان ولا لسة؟
