من فترة وزيرة التموين الدكتور علي مصيلحي كان أعلن عن زيادة في أسعار السلع التموينية والتي يصرفها حوالي 64 مليون مواطن تشملهم منظومة الدعم التموينية، وبتصرف لهم الدولة أكثر من 30 سلعة شهريا.
بس الجديد بقا إن الوزير النهاردة أصدر توجيهات جديدة عشان ينظم بيها ضوابط صرف المواطنين لـ مستحقاتهم من السلع التموينية.
وزير التموين أعلن وضع ضوابط جديدة لصرف السلع لكل مواطن .وحسب البيان الرسمي اللي أصدرته وزارة التموين فـ الوزير وجه بصرف زجاجة زيت عبوة 800 ملى لكل مواطن وبحد أقصى 4 زجاجات زيت على البطاقة
والمفترض إن كل فرد ليه كيلو سكر لكن الوزير وجه إن كل مواطن يشتري سكر حسب احتياجاته بس بحد أقصى 6 أكياس على البطاقة.
أما لو بتسأل عن الرز والمكرونة فـ الوزير وجه بصرف كيلو رز أو مكرونة على البطاقة اللي بيقل عدد أفرادها عن 4 أفراد، و2 كيلو أرز او مكرونة للبطاقة اللي فيها 4 أفراد أو اكتر
وحدد حجم كيس المكرونة وقال إن وزن العبوة هيكون 800 جرام.
مش بس كده انت كمان هتقدر ببطاقتك تصرف السلع الموجودة داخل المنظومة التموينية اللي انت محتاجها، فـ مثلا كل مواطن داخل المنظومة التموينية من حقه إنه يصرف الدعم المخصص ليه من المنافذ التموينية داخل محافظته باستخدام البطاقة التموينية بحد أقصى 4 مرات في الشهر بس.
والمفترض هيستفيد بيها كل المواطنين اللي بتشملهم المنظومة التموينية وعددهم 64 مليون مواطن هيقدروا يصرفوا من أكتر من 40 ألف منفذ تمويني.
ولو انتوا فاكرين فـ وزير التموين الدكتور على مصيلحى أعلن من فترة قريبة بشكل رسمي عن ارتفاع أسعار السلع التموينية بشكل تدريجي، وده لأنه كان شايف إن السلع المعروضة موصلتش لحق التكلفة اللي بتتحملها الحكومة.
أسعار السلع التموينية الجديدة
ولو بسأل عن الأسعار الجديدة فـ عندك السكر: سعره أصبح بـ 12.60 جنيه للكيلو بدلا من 10 جنيه ونص.بس اكتر سلعة سعرها زاد كانت مفاجأة وهي العدس، الـ 500 جرام كانوا بـ12 جنيه، ودلوقتي سعره 21 جنيه، يعني زاد 9 جنيه.
ولو بتسأل على باقي الأسعار، فـ الزيت سعره زاد 5 جنيه وهتشتريه بـ 30 جنيه بدل من 25 جنيه.كمان كيلو الرز سعره ارتفع الى 12 جنيه و60 قرش بدل من 10 جنيه ونص.
حصة الفرد في التموين
وحسب تصريحات وزير التموين فـ حصة الفرد مش هتزيد عن 50 جنيه في البطاقة، بحد أقصى عدد الأفراد في البطاقة يكون 4 أفراد، أما الفرد الخامس بيكون حصته 25 جنيه.
ولو عايز تحسب مشترياتك لشهر مايو فـ انت هتقدر تاخد من السلع الأساسية لكل فرد زجاجة زيت بسعر 30 جنيه و كيس سكر بسعر 12.60 جنيه، وهتقدر تشتري أي سلعة تانيه في حدود 7.40 جنيه.
قولنا دلوقتي إيه رأيك في القرارات دي وهل شايف إن المنظومة التموينية كافية لدعم المواطنين؟
