كلنا سمعنا عن تصريحات رئيس الاحتياطي الفدرالي التي تأكد إنه سيتم رفع سعر الفائدة للدولار الفترة القادمة، لكن السؤال هو ياترى ما تأثير هذا عليك انت كمواطن وأسعار الذهب ماذا سيكون مصيرها؟وما علاقة هذا بالجنيه والدولار في مصر؟
اقتصادات العالم كلها على اتشقلب حالها وده بعد التصريحات اللي قالها رئيس مجلس الاحتياطي الفيدرالي الأميركي جيروم باول قدام الكونغرس ، واللي أكد فيها أن يتجاوز الحد الأقصى لأسعار الفائدة بأقوى اقتصاد في العالم التوقعات السابقة.
ياعم بالراحة شوية علينا إحنا مش ناقصنا صدمات الفترة دي ده الناس كلها كانت مستنية كلام الراجل ده عشان يطمنهم على أحوال أسعار الفايدة الفترة الجاية.
بس الراجل طلع وصدمهم وقال في كلمته بيانات الاقتصاد الأميركي كانت أعلى من المتوقع، وده اللي بيأكد إن أسعار الفايدة احتمال كبير تزيد من تاني بتوقعات أعلى من اللي اتقالت قبل كدة.
طيب وإيه المشكلة يعني ما يقول اللي هو عاوزه؟ لأ طبعا خلي بالك التصريحات دي بتأثر على أسعار الدهب عالميا وبتأثر على كل اقتصادات العالم، وفعلا بمجرد ما الراجل اتكلم أسعار الدهب عالميا تراجعت
ولو انت مش عارف ليه الدهب تراجع فـ أحب أقولك إن كل ما الفدرالي يعلن عن زيادة الفايدة كل ما مكاسب الدهب هتقل وده لأن الناس هتشوف إن شراء الأصول بالعملة هتديهم فايدة أكبر
طيب ليه الفدرالي مضطر يرفع أسعار الفايدة ؟
بص يا سيدي لو انت فاكر إن الاقتصاد الأمريكي مش بيواجه مشاكل زيه زي اي اقتصاد تاني تبقى غلطان وده لأنهم عندهم نسب تضخم محتاجة تدخل سريع من الفدرالي الأمريكي وإلا الاقتصاد كله ممكن يواجهه حالة ركود
وده مش كلامي ده كلام عضو الفيدرالي، نيل كاشكاري واللى قال في تصريحات ليه أكد فيها إن انه في احتمال كبير البنك الفدرالي الأمريكي يرفع الفايدة بـ نقطة أساس في اجتماعة اللي جاي وده لأنه لما رفع الفايدة لمستوها الحالي مقدرش ينجح في خفض التضخم
وعشان كدة أكد عضو الفدرالي، إن قرارات البنك الفدرالي اللي جايه هتكون عشان تجنب حدوث ركود اقتصادي في أمريكا، وعشان كدة أولويته هتكون القضاء على التضخم وهبوطه خلال الفترة الجاية
طب الدهب كدة أسعاره رايحه فين؟، وهل هتتأثر في مصر الحقيقة إن أسعار الدهب محليا ارتفعت الفترة اللي فاتت رغم إنخفاضها عالميا وده طبعا بسبب تراجع مستويات الجنيه قدام الدولار، بس في عوامل هتأثر على أسعار الدهب عالميا الفترة الجاية.
أما بقى أسعار الدهب محليا فـ طبعا مش محتاجة أقولك إن أسعار في مصر بتتأثر بأسعار الدولار مقابل الجنيه في المقام الأول، وعشان كدة تراجع العملة بيكون عامل أساسي.
وعشان كدة شوفنا تراجع أسعار الدهب الفترة اللي فاتت مع استقرار أسعار الصرف في مصر، يعني قوة الدولار بتزود أسعار الدهب بشكل مباشر.
بس اطمن لأن الخبراء الاقتصاد أكدواأن الذهب استثمار آمن على المدى البعيد ومخزون قيمتة بتزيد مع الوقت، وبيفضل احتياطي استراتيجي للأفراد والدول اللي بتتحامى فيه في الأوقات الاقتصادية اصعبة
وده اللي أكده هاني ميلاد، رئيس الشعبة العامة للذهب، ووجه رسالة للمواطنين بسبب تقلبات الأسعار٫ وقال إنه مع التذبذب الليمن الممكن أن نشوفه في الاقتصاد الفترة دي فـ الدهب هيعتبر استثمار آمن بشرط لما تشتري تستنى عليه فترة كفاية عشان تحقق أرباح.
ده كمان قال إن تصريحات رئيس الفيدرالي الأمريكي اتسببت في انخفاض سعر جرام الذهب عيار 21 حوالي 40 جنيه خلال 24 ساعة بس من إعلانها، وده هيخليه الفترة دي مناسب للشراء.
قولنا رأيك في تصريحات الفدرالي الأمريكي وهل شايف إن ده فعلا أنسب وقت لشراء الدهب؟
