مفاجأة في سعر الدولار وهذه المره ليس تعويم، بالعكس تماما، حيث أن سعر الدولار في السوق السوداء انخفض رغم كل التوقعات عن انخفاض جديد في قيمة الجنيه!
فيا ترى ايه اللي حصل وقلب حال السوق بين يوم وليلة؟ وسعر الدولار دلوقتي وصل لكام في السوق السودة؟ وهل ده معناه ان ما فيش تعويم خلاص؟
في الساعات الأخيرة وعلى غير المتوقع، بيحصل تراجع في سعر الدولار في السوق السودا، ودلوقتي سعره نزل من 38 عشان يسجل مابين 33 إلى 36 جنيه للدولار الواحد، حسب الاخبار المتدوالة.
طيب ده سببه إيه؟ حسب مسؤولين في شركات الصرافة، سعر الدولار الأيام اللي فاتت طلع في العالي لان ناس كتير كانوا مستنين خفض أو تعويم رابع للجنيه، وخصوصا بعد قرار البنك المركزي برفع الفايده 2% في اخر اجتماعاته بتاريخ 30 مارس.
لكن مع استقرار سعر صرف الجنيه وعدم انخفاضه لغاية دلوقتي في البنوك، السوق السودة جابت ورا ونزل سعر الدولار لمستوى 36 جنيه، وخصوصا ان حركة البيع والشراء قليلة.
بس ده يخلينا نسأل ليه السوق السودة كانت متأكدة أوي كده من ارتفاع سعر الدولار؟
الحكايه كلها ان في اكتر من تقرير صادر عن مؤسسات وبنوك استثماريه عالميه توقعوا فيه انخفاض جديد بقيمه الجنيه خلال شهور، سبب استمرار نقص الدولار وتاخر الحكومه في تنفيذ برنامج اقتراحات الحكوميه لبيع 32 شركه وبنك.
ومنهم مثلا بنك اتش اس بي سي اللي توقع تسجيل الدولار ما بين 35 الى 40 جنيه، وفي المتوسط 37.5 جنيه.
كمان لو بصيت على العقود الاجله للجنيه لمده 12 شهر، هتلاقي سعر الدولار فيها تجاوز 41 جنيه، والفكره ان العقود الاجله تعتبر مؤشر على تقييم المستثمرين لقيمه العملة في المستقبل.
وهنا بقى ييجي السؤال المهم:
الاستقرار في سعر الدولار بالبنوك لغايه دلوقتي معناه ان ما فيش تعويم جديد او حتى تخفيض في قيمه الجنيه؟
الخبير الاقتصادي خالد الشافعي شايف إن اعتماد مصر لنظام سعر صرف مرن معناه ان الدولار بيتحدد سعره في السوق حسب آلية العرض والطلب.
فلما نتكلم عن اجراء انخفاض جديد في سعر الجنيه، ده معناه ان البنك المركزي حتى الان بيدعم الجنيه ومش سايب سعره حر في السوق، عكس تأكيدات المسؤولين.
وبالمناسبه دي بنك جولد مان ساكس كان طلع تقرير قال فيه ان مصر توقفت عن العمل بنظام سعر الصرف المرن وده اللي رجع السوق السودة من وجهة نظره، عشان كده لازم نرجع للنظام ده في اسرع وقت.
وعلى الناحية التانية في في خبرا يتوقعوا انخفاض تدريجي في سعر الجنيه امام الدولار، منهم محمد عبد العال الخبير المصرفي، واللي شايف ان زياده طلبات الاستيراد الفتره الجايه احتمال ترفع سعر الدولار لكن في حدود ضيقة جدا.
وما تنساش ان في توقعات عالميه بهبوط الدولار حوالي 15% من قيمته امام باقي العملات خلال ال 18 شهر الجايين وده هيقلل الضغط شوية على عملات الدول الناشئه زي مصر.
فقولوا لنا بقى انتم ايه توقعاتكم لسعر الدولار؟
