ما حكاية مستودعات السلع التي ستنفذها الحكومة الفترة القادمة وهل هذا يعني إننا في خطر وياترى ما الهدف من إنشاء هذه المستودعات دي، وهل ممكن تنخفض أسعار السلع الفترة القادمة ؟ تابعونا لمعرفة التفاصيل.
الحكومة أعلنت عن مشروع جديد لبناء مستودعات إستراتيجية لتخزين السلع الاساسية خاصة وإنها بتهم كل المصريين بإجمالي 31 سلعة تموينية، والمشروع ده هيكون في كل المحافظات واللي هتنفذه وزارة التموين.
طيب يعني إيه الكلام ده وهل كده في خطر في مخزون السلع؟لا ياسيدي اطمن المشروع ده هيتعمل بتوجيهات من الرئيس عبد الفتاح السيسي للحكومة عشان تعزز الأمن الغذائي وتوفره لكل المصريين وكمان تحسن منظومة السلع اللي الحكومة شغاله بيها حاليا.
وده اللي أكده الدكتور مصطفى مدبولي رئيس الوزراء في لقائه الأخير مع وزير التموين وقال ساعتها إن مشروع إنشاء مستودعات إستراتيجية لتخزين السلع الأساسية بيُمثل أولوية للدولة المصرية.
وإن المشروع بالكامل هيتم تنفيذُه من خلال وزارة التموين والتجارة الداخلية، طيب الدولة هتعمل كام مخزن للسلع وأماكنهم هتكون فين ؟
حسب كلام وزير التموين والتجارة الداخلية، الدكتور علي مصيلحي فـ مشروع إنشاء المخازن الإستراتيجية هيكون واحد من الملفات الرئيسية اللي هشتغل عليها الوزارة الفترة الجاية.
وإن إقامة المستودعات الاستراتيجية هيكون أول هدف هيشتغلوا عليه عشان يطوروا منظومة التجارة الداخلية.
قال كمان إن الوزارة عملت دراسة والدراسة دي قالت إن مصر محتاجة حوالي 7 مستودعات إستراتيجية واللي هتخدم عدد محافظات كبيرة، وهتكون تكلفتها توصل لـ 3 مليار جنيه لكل مستودع بإجمالي تكلفة 21 مليار جنيه لكل المستودعات.
وفعلا بدأت الوزارة الفترة دي في تنفيذ 4 مخازن والمرحلة الأولى من المشروع هتكون في محافظات: الشرقية، السويس، الأقصر، والفيوم.
وده اللي أكده الدكتور علي مصيلي وزير التموين وقال إنه بالتنسيق مع المحافظين قدروا يوفروا عدد كويس من قطع الأراضي اللي بتتوافر فيها شروط إقامة المخازن.
غير كمان إنهم طرحوا المشروعات دي على شركات متخصصة عشان يبدأوا في تنفيذها علطول.
وحسب تصريحات الوزيرة فقال أن القطاع الخاص هو اللي هيتولى تصميم وبناء وتشغيل المستودعات الجديدة وعشان كده الوزارة هتتعاقد مع الشركات دي، وهتتفق معاهم على آلية الإدارة والتشغيل على أعلى مستوى عشان تتأكد من الحفاظ على جودة السلع المختلفة.
مش بس كدة ده الوزارة كمان حددت كميات المواد الغذائية والسلع الأساسية المطلوب تخزينها، واللي هتشمل السلع الجافة والمبردة، وغيرها كتير من السلع .
وطبعا المشروع ده اهتمت بيه الحكومة وده لأنها لازم طول الوقت تطمن على وجود السلع الأساسية لفترات بعيدة وده بيدي أمان لكل المواطنين وبيخلينا نتأكد إنه مفيش سلع هتنقص لأي سبب.
ومع دخول المواسم زي موسم رمضان بيكون دور الحكومة إنها توفر كل السلع للمواطنين بأسعار مناسبة وده عشان تقلل فرص الاستغلال واحتكار السلع من التجار.
وحسب تصريحات نائب وزير التموين الدكتور ابراهيم عشماوي فـ وصل إجمالى احتياطي السلع الاساسية من 5 شهور الى 6 شهور، وده كله طبعا بتوجيهات من الرئيس السيسي اللي بيهتم دايما بتوفير السلع الاستراتيجية للمواطنين.
وقال إن هدف الوزارة المخزون الاستراتيجي ده يزيد ويوصل إنه يكفي احتياجات 9 شهور، وده عشان تكون السلع متوفره للمواطنين على مدار السنة كلها.
قولنا رأيك في فكرة المستودعات وهل ممكن تأثر على الأسعار الفترة الجاية ؟
