تعرف انك ب 10 جنيه بس تقدر تستثمر في الدهب، ايوه ما تستغربش انت سمعت الرقم صح والفضل كله يرجع لأول صندوق استثمار في الذهب جوه مصر.
فيا ترى ايه حكايه الصندوق ده وايه الشروط الاستثمار فيه ومن المشرف عليه وقال هو ثقه عشان تحط فلوسك فيه كل التفاصيل دي هتعرفوها معانا في الفيديو ده فتابعونا للنهائي.
الحكومه ولاول مره في مصر وافقت على نوع الجديد من صناديق الاستثمار وهو صندوق استثمار في الذهب اسمه “ايه زد جولد” من شركة اسمها ازيموت، طيب بيشتغل ازاي؟
بص يا سيدي الصندوق بيصدر وثائق قيمة الواحدة فيهم 10 جنيه والحد الأدنى للشراء 10 وثائق، نقلا عن موقع أموال الغد.
والمهم ان الصندوق بياخد الفلوس دي يشتري بيها دهب يحطه في خزائن “ايجي كاش” ودي شركة تابعة للبنك المركزي حسب احمد ابو السعد مدير الصندوق.
وهنا بقى نيجي للسؤال الاهم انت اشتريت وثيقة النهارده مثلا وعاوز تبيعها لما تبيع هتاخد حقك دهب ولا فلوس؟
الصندوق أتاح ليك الاختيارين وحسب مزاجك بس في شرط: عشان تسترد فلوسك دهب لازم يكون معاك ما يوازي قيمه ال 50 جرام اقل حاجة
وخد بالك سعر الشراء او البيع بيتحدد حسب سعر الدهب في اليوم اللي هتشتري او هتبيع فيه وده هيكون في يوم الاثنين او الخميس من كل اسبوع لغايه الساعه 12:00 منتصف الليل.
وهنا في نقطة تانية لازم تخلي بالك منها: الاسترداد هيبقى عليه تكلفة لو طلبت الاسترداد قبل مرور 3 سنوات على الاستثمار، ومع مرور الوقت التكلفة بتقل تدريجيا لغاية ماتكمل ال3 سنين وساعتها تقدر تطلب الاسترداد من غير تكلفة.
وطبعا اي حد هيسأل نفسه 100 مرة: اضمن فلوسي ازاي؟ من الناحية دي اطمن جدا لان تفاصيل الصندوق من اولها لآخرهاخاضعة للرقابة من الهيئة العامة للرقابة المالية.
وزي ماقلنا الدهب هيكون متخزن في خزائن شركه ايجي كاش التابعه للبنك المركزي، ورغم كده، اي حد طبيعي هيسأل : إيه اللي يخليني اروح اشتري وثيقة أو ورق، وانا ممكن انزل الصاغة واشتري الدهب اللي عاوزه؟
اولا الصندوق وفر ليك عنصر الامان، يعني في العادي انت هتروح تشتري الدهب وتشيله في البيت او خزنه في البنك وده هيكلفك مصاريف لكن صندوق الاستثمار هيبقى المسؤول عن الحفاظ عليها.
وتاني حاجة بقى والأهم: ان انت ممكن ميكونش معاك مبلغ كفاية عشان تشتري دهب، بس في صندوق الاستثمار ، انت تقدر كل شوية تشتري وثيقة جديدة بمبلغ بسيط.
وتالت ميزة انك مش هتدفع مصنعية على الدهب.
تكلفة الاستثمار في صندوق الذهب
مفيش عمولة على شراء وثيقة صندوق الذهب، لكن في مصاريف بنسبة 4.9% بتخصم من قيمة العملية في حالة البيع.
والنسبة دي مرتبطة بعملية الاسترداد اللي اتكلمنا عنها، يعني اللي هيحتفظ باستثماره في صندوق الدهب لمدة 3 سنوات كاملة مش هيتحمل أي مصروفات عن عملية البيع، حسب أموال الغد.
ودلوقتي بقى لو عاوز تستثمر في صندوق الدهب إيه الخطوات المطلوبة؟
هتفتح حساب في شركة ازيموت أو أي شركة تانية لإصدار وثائق الصندوق وتقدم طلب بالشراء، وبعدين هتحول الفلوس، وهتخلص شوية إجراءات وبيانات وتبقى اشتريت الوثيقة خلاص، وممكن تعمل ده اونلاين أو من مقر الشركة نفسها.
