![شعبة السجائر تكشف المستور](https://www.l2tat.com/wp-content/uploads/2023/11/%D8%B4%D8%B9%D8%A8%D8%A9-%D8%A7%D9%84%D8%B3%D8%AC%D8%A7%D8%A6%D8%B1-%D8%AA%D9%83%D8%B4%D9%81-%D8%A7%D9%84%D9%85%D8%B3%D8%AA%D9%88%D8%B1.webp)
عارفهم بالاسماء وهروح ابلغ عنهم تاجر تاجر، عشان خلاص الناس فاض بيها..هذا ما قاله ابراهيم إمبابي خلال الساعات الأخيرة، بعد ما التجار زاد طمعهم اوأصبحوا يحققوان مكسب في علبة السجائر الواحدة اكثر من 40 جنيه.
عشان كده الأزمة بتزيد كمان وكمان،مش بس كده امبابي كشف كمان عن مفاجأة هتحصل بخصوص الأزمة دي
فياترى ابراهيم إمبابي قال ايه؟ وايه المفاجأة اللي هتحصل في أسعار السجاير؟ ومجلس النواب عمل ايه عشان يحل الأزمة؟
خلاص الناس فاض بيها ومبقتش لاقيا حل لأسعار السجاير اللي عمالة تزيد كل يوم والتاني من غير أي مبرر، رغم أن مفيش أي زيادات رسمية من الشركات بالاسعار اللي بيبعوا بيها التجار، ورغم أن مجلس النواب أقر بقانون الضريبة على السجاير رسميا عشان يحد شوية من ارتفاع الأسعار
شعبة السجائر تكشف المستور
عشان كده شعبة السجاير طلعت وقالت إنها خلاص هتكشف المستور عنهم، لكن هو ايه اللي حصل؟
شوف يا سيدي، إبراهيم إمبابى، رئيس شعبة الدخان بغرفة الصناعات الغذائية باتحاد الصناعات، طلع وقال في برنامج الحكاية، إن التجار هم سبب أزمة السجاير في مصر
عشان كده هددهم وقال أنا هروح لرئيس جهاز حماية المستهلك، ومعايا قايمة بأسماء التجار اللي بيبيعوا سوق سودا
وقال كمان أن رئيس الشركة القابضة قال إن أزمة السجاير هتستمر لحد مارس الجاي
إمبابي كان سبق وقال في برنامج الحكاية من كام يوم، إن أزمة أرتفاع اسعار السجاير مش ممكن تتحل إلا من خلال قلب الهرم التوزيعي عشان مش لاقين تاجر محترم مش هيخزنها ويعلي في اسعارها
وده بقى هيحصل لما الشركات توزع على التجار الاكشاك والتجار الصغيرين و تقلل الكميات اللي بتوردها للتجار الكبار عشان هما سبب الأزمة
وقال أن أزمة السجاير هتتحل في 48 ساعة من خلال 3 خطوات وهو إقرار قانون الضريبة على السجاير وده حصل فعلا، وقلب الهرم التوزيعي،وتوزيع السجاير اللي تم مصادرتها في بنزينة الوطنية عشان تتباع بالاسعار الرسمية
ده كمان قال إن سعر علبة السجاير الميريت وصل ل ١١٠ ومش هتلاقيها في حين أن سعرها الرسمي ٦٩ جنيه، يعني فيه ٤٠ جنيه داخلين جيب التاجر ، وفيه علامات استفهام عن تعنت الشركات على قلب الهرم التوزيعي
أما هاني أمان، الرئيس التنفيذي والعضو المنتدب لشركة الشرقية للدخان، فقال في برنامج حضرة المواطن، إن الممارسات السلبية من المستهلكين والتجار، تعتبر واحد من الأسباب الرئيسية في ارتفاع أسعار السجاير
وقال أن التجار بيحتكروا سلعة معينة لزيادة سعرها، ولما يلاقوا في ارتفاع في سعر سلعة بالفعل غير اللي مخزيننها يشتكوا من غلاء الأسعار ويطالبوا بخفض تمن السلع
عشان كده قال إن لو التجار والمستهلكين باعوا واشتروا السلعة بشكل طبيعي حسب استهلاكهم مش هيكون في أي مشكلة
وقال إن الشركة الشرقية للدخان رفعت سعر سجاير كيلوباترا من 24 جنيه ل27 جنيه بس
وقال كمان إن من ضمن أسباب الأزمة وارتفاع سعر السجاير الايام الاخيرة هو أن شركات السجابر وقفت البيع ل4 و5 أيام لضبط وإعلان الأسعار الجديدة، بعد إصدار الضريبة الجديدة، لكن التوقف ده كان سبب تأثير على السوق خلال اليومين اللي فاتوا، لكن الشركات رجعت تبيع من تاني
بس قال إن ده مش هيمنع البيع بسعر أعلي لأن الموضوع محتاج تكاتف مع الأجهزة الرقابية، ده غير أن الشرقية للدخان اتحركت عشان تحل الأزمة لأنها زودت الإنتاج وكمان باقى الشركات زودت الإنتاج
وده خلاه يتوقع أن السجاير هتتوفر فى كل مكان، والأسعار تنزل، لكن هتوصل لحد فين؟ ده الحقيقة اللى لسه محدش عارفها
وبالمناسبة مجلس النواب المصري كان أقر تعديلات على ضريبة القيمة المضافة على السجاير، واللي هتسمح بزيادة الأسعار الرسمية للسجاير بقيمة 12% على الأقل سنويا
ودلوقتي قولنا بتشتري علبة السجاير بكام؟