أسعار فواتير الكهرباء أصبحت الشغل الشاغل لكل الناس هذه الأيام وذلك بسبب انتشار كلام كثير عن زيادة أسعارها خلال الفترة القادمة.
وده خلى ناس كتير تسأل هي الزيادة هتكون كام؟وهتطبق من أمتى؟ وهل الزيادة قرار نهائي ولا ممكن تتأجل زي ما كان بيحصل؟ و نعمل إيه عشان نوفر في الفاتورة؟
سبق وأعلنت الحكومة تأجيل زيادة أسعار الكهرباء لغاية 30 يونيو بدلا من تطبيقها خلال شهر يناير وده بناءا على تكليفات من رئيس الجمهورية
فهل فعلا كلها أسابيع وأسعار الكهربا هتزيد؟ بحسب مصادر مطلعة لموقع العربية قالت إن زيادة أسعار الكهرباء أتاجلت أكتر من مرة ومن المفترض إن يتم تطبيقها خلال شهر يوليو الجاي، لكن ارتفاع معدلات التضخم وزيادة الأسعار ممكن تخلي الحكومة تأجل القرار ده مرة كمان زي ما حصل في أوقات سابقة.
وفي نفس الوقت علي عبد الفتاح الوكيل الدائم لوزارة الكهرباء قال قدام لجنة الموازنة في مجلس النواب إن لحد دلوقتي الحكومة مخدتش أي قرار نهائي بخصوص زيادة أسعار الكهربا المحتملة بالنسبة للمنازل في يوليو، بحسب موقع العربية.
لكن في المقابل مصدر مسئول بالشركة القابضة للكهربا قال في تصريحات لموقع مصراوي إن الزيادة أتاجلت أكتر من 3 مرات من بداية إعلان قرار الزيادة.وإن التأجيلات دي حملت الدولة أكتر من 25 مليار جنيه وده بسبب زيادة أسعار الغاز الطبيعي والوقود.
وقال إن تطبيق الزيادة أمر حتمي وده عشان الحكومة تقدر تتفاوض على قروض جديدة من صندوق النقد الدولي اللي اشترط اكتر من مرة رفع الدعم عن الكهربا.
عشان كده الدولة قررت إنها تحط خطة لترشيد استهلاك الكهربا بالجهات الحكومية والوزارات المختلفة عشان توفر الغاز اللازم لتشغيل المحطات وكمان عشان تصدره بره مصر لتوفير العملة الصعبة
وبحسب نادر سعد المتحدث الرسمي بأسم مجلس الوزراء قال في تصريحات سابقة لبرنامج الحياة اليوم إن زيادة أسعار الكهرباء هتكون في مطلع شهر يوليو الجاي
وقال كمان إن وزارة الكهربا عندها آلية لتعديل أسعارها كل 6 شهور وده عشان يتم تقليل الدعم تدريجيا على مدار خمس سنين وده عشان توفي باشتراطات صندوق النقد الدولي، لكن تم مد الفترة دي أكتر من مرة عشان خاطر الظروف الإقتصادية للبلد.بس ياترى الزيادة الجديدة هتكون كام؟
بحسب مصراوي الشريحة الأولى والتانية هتزيد بنسبة 10 قروش والتالتة والرابعة هتزيد 5 قروش أما الشريحة الخامسة هتزيد 3 قروش لكل كيلو وات.
لكن الشريحة السادسة و السابعة هتكون زي ما هي من غير أي زيادات وهتكون سعرها في يوليو الجاي زي ما هي لأن مفيش عليها دعم.
أما بالنسبة لرسوم خدمة العملاء بشرايح استهلاك الكهربا هتزيد من جنيه لـ 40 جنيه وده بيتحدد حسب نوت الشريحة، لكن السؤال هنا نعمل إيه عشان فاتورة الكهربا متجيش عالية؟
بحسب موقع المصري اليوم جهاز مرفق الكهرباء وحماية المستهلك قدم عدد من النصايح اللي هتساعد في توفير الاستهلاك
وقال إن من ضمن الأجهزة اللي بتستهلك كهربا هي الغلاية الكهرباية عشان كده لازم تفصل الفيشة بعد ما تخلص استخدامها وكمان لازم متغلش مياه كتير يدوب سخن على قد احتياجاتك.
ومن ضمن الأجهزة دي التكييف اللي بيستهلك كهربا كتير عشان كده نصح بضبطه عند درجة 24، وبرضو التلاجه قال إنك لما تيجي تشتريها أختار نوع موفر في الكهربا وبمواصفات توفر في الإستهلاك.
وقال كمان إن المكوة من بين الأجهزة اللي بتستهلك كهربا عالية وقال إن الأحسن إنك تكوي الهدوم مرة واحدة،ودلوقتي قولنا أنت في الشريحة الكام؟
