اللي بيدفع 500 جنيه في الكهربا هيدفع 1000 جنيه، تصريحات خطيرة قالها السيسي عن تعويم الجنيه الفترة القادمة.
ومش بس كده ، ده فرد كل الورق على الترابيزة ورد على شكاوي الناس من ارتفاع الأسعار، ووجه عتابه للفلاحين والمزارعين.
وفوق كل ده رد على الكلام اللي مالي السوشيال ميديا ومش عاجبه اللي بيحصل في البلد ولا الطريقة اللي الحكومة بتصرف بيها الفلوس.
الرئيس السيسي النهارده قال تصريحات مهمه تمس حياه أي مصري، وخلينا نبدأ بالدولار اللي دوخنا معاه.
وحسب جريدة الشروق الريس قال في المؤتمر الوطني للشباب انه عشان نحرر سعر الصرف لازم تشوف هل الوعاء بتاعنا يوفي الطلب من الدولار.. لو قلنا آه، يبقى تحرير سعر الصرف مطلوب».
والمشكلة اننا ممكن نزود سعر الصرف لكن لازم نشوف النتيجة والمواطن لن يتحمل مضاعفة الأسعار إذا تم تحرير سعر الصرف، يعني مثلا لو المواطن بيدفع للكهرباء 500 جنيه شهريا هيكون مطالب يدفع 1000 جنيه.
وفي تعليقه على ارتفاع الأسعار، السيسي قال حسب اليوم السابع، إن مصر بتعيش أزمة بعتلها 3 سنوات وبدأت معنا من ساعة الظروف الصحية اللي حصلت في العالم كله، وده طبعا كان له تأثير كبير أوي على مصر والعالم واحنا في مصر موقفنا.
طيب تستقر الأزمة بعد كده؟
الإجابة لا، لأن بعدها جت الأزمة الروسية وكان ليها تأثير كبير علينا وعلى الاقتصاد العالمي وغلت الأسعار كتير.
وفوق كل ده عندك الدولاور اللي قال السيسي انه ليه تأثير كبير على الأسعار، وكل ما فاتورة البلد من الدولار تزيد لازم ده يبقى عبء على الاقتصاد لأن إحنا عايزين نجيب حاجات أساسية مش بس الأكل والشرب
ده رأي الريس السيسي بس في نفس الوقت وجه كلامه للمصريين وقال عاوز أقولكم على حاجة:
“خلوا بالكم برضو في الـ 3 سنين اللى فاتوا زدنا 6 مليون، وانا مقصدش بالكلمة دي أى حاجة، لكن بحط الصورة جنب بعضها
أما بقى بالنسبة للفلاحين والمزارعين فالريس خصص ليهم مساحه حلوه من كلامه، وحسب الشروق قال إخواننا المزارعين طلبوا أسعار استرشادية للسلع.. عملنا كده في 5 سلع.. ولما لقوا حد تاني قدم سعر أكبر للأرز راحوا باعوا له.. رغم إن الأرز ده انا كنت باخده وبحطه في التموين..
بس مشكلة .. كده كده جوّه مصر وهيوصل في الآخر للناس.. لكن هيوصل بسعر غالي.. أنا كنت هبيعه بسعر مدعم.. لكن القطاع الخاص هيبيعه بأكتر ما اشتراه.. لو اشترى الكيلو بـ17 جنيه هيبعوا بـ20 أو 21 جنيه”.
ومش بس الرز اللي اتكلم عنه السيسي، لأن القمح كان ليه نصيب من تصريحاته. وقال إن الإنتاج في مصر ممكن يبقى 8 أو 9 أو 10 ملايين طن، واللى خدناه لحد دلوقتي 3.5 مليون طن يبقى لسه في البيوت فيه 6.5 مليون طن.
طيب ليه الفلاحين احتفظوا بالكمية دي؟
السيس كمل كلامه وقال ممكن حد يقولي أصل إحنا في ريف، عندنا القمح في البيت بنعمل بيه مناسبات.. ، طب المخابز بتاعة الناس بتبيع للناس كلها،
وأنا كنت هاخد القمح بالسعر اللي قلت عليه وهديه للناس مدعم بـ5 قروش، ولو أنا النهارده مالقتش الطلب ده موجود في الـ10 ملايين طن اللى فى مصر، هضطر أشتري من بره والموضوع ده هيبقى له تأثير كبير على الأسعار في مصر بسبب الدولار..
وفي وسط كل اللخبطة دي السيسي اتسأل عن رأيه في الكلام اللي مالي الفيسبوك وفي انتقادات كتير لأداء الدولة.. وهنا رد السيسي وقال :
أنا مش بقلق خالص من موضوع السوشيال ميديا لإني عارف إنها عبارة عن دردشة الناس مع بعضها بس بقت على الهواء.. الناس الأول كانت بتقعد على القهوة تتكلم.. دلوقتي بيقعدوا على الفيس يتكلموا».
ودلوقتي لو كل واحد مننا في مكان بيشوف اللي بيتعمل.. لو حد بيتعامل مع مستشفى وقدمته له خدمة كويسة يبقى شاف.. لو حد بيتعامل مع مدرسة ولاقها كويسة يبقى شاف
ودلوقتي بقى انتوا رأيكم إيه في أزمة الأسعار؟
