مبروك، الحكومة سهلت إجراءات التصالح، والآن يوجد تعديلات جديدة على تقنين وضع اليد، وأيضا سيتم فتح باب التقديم لطلبات التصالح.
فياتري ايه التعديلات اللي قررتها الحكومة؟ ومدة تقديم الطلبات قد ايه؟وايه هي الإجراءات المطلوبة؟ ومصير القضايا اللي رفعاها الحكومة ضد واضعي اليد إيه؟
ناس كتير كانت بتعاني السنين اللي فاتت من قانون وضع اليد وطلبت من الحكومة انها تسهل الاجراءات عشان يقدورا يتصالحوا و يعيشوا بشكل طبيعي
وأخيرا مجلس الوزراء طلع قرار بتعديل قانون التصرف في أملاك الدولة الخاصة وفتح التقديم لطلبات التصالح لواضعي اليد مع الحكومة لمدة 6 شهور
ومش بس كده ده الحكومة قالت انها ممكن تمد الفترة دي تاني
كيف سيتم التصالح؟
الحكومة قالت في بيان ليها ، ان التصالح ده هيتم عن طريق البيع او الايجار المنتهى بالتمليك أو منح ترخيص بالانتفاع بالأرض اللي عليها نزاع وده بحسب اللي نشره موقع اليوم السابع
وقال ان اللي هيفحص الطلبات اللي بتتقدم لجنة مختصة هيكون فيها تخصصات مختلفة فنية ومالية قانونية، وان الدرجة الوظيفية لاعضاء اللجنة دي مش هتقل عن مدير عام.
ومهمة اللجنة هتكون فحص الطلبات والمستندات المقدمة والبت فيها، ومن حقها طلب استيفاء الأوراق من طالبي تقنين وضع اليد وفقا للشروط والضوابط في القانون.
كمان هيكون في لجنة تانية عشان تستقبل التظلمات وده خلال 15 يوم بعد ما تستلم القرار من لجنة التصالح الأولى.
وعلى فكرة اللي هيشوف التظلم مش لجنة واحدة بس، ده ممكن اكتر من لجنة تشوفه، وده طبعا بقرار من الوزير او المحافظ أو رئيس الجهاز أو رئيس الهيئة حسب كل حالة.
وفي لجنة التظلم هيبقى موجود أعضاء برضو مش هيقل الدرجة الوظيفية ليهم عن مدير عام، ده كمان لجنة التظلم هيكون اعضاءها ورئيسعا غير أعضاء لجنة فحص الطلبات وده شرط من شروط تشكيلها،طيب افرض تقنين وضع اليد محصلش، إيه موقفك؟
الحكومة ضافت مادة جديدة للقانون واللي بتنص على ان في حالة عدم تقنين وضع اليد لأي سبب، وفي حالة استحالة ازالة التعدي على الاراضي المخصصة للدولة هتدفع مقابل انتفاع، طيب يعني ايه مقابل انتفاع ؟
الحكومة ردت وقالت ان اللي مش هيقدر يقنن اوضاعه هيدفع مقابل انتفاع مش هتزيد قيمته عن 100 جنيه علي كل متر، وهيزيد بنسبة 5% كل سنة وده مؤقتا لحد ما يتم ازالة التعدي
وخد بالك، لو الجهة الإدارية محصلتش المبلغ المطلوب خلال شهرين من تاريخ العمل بالقانون، المحافظة هتيجي تحصله وهتاخد 20% مقابل اجراءات تحصيل تخصص لمشروعات المحافظة.
كيفية تنفيد المادة الجديدة
رئيس مجلس الوزراء هيطلع قرار بتحديد فئات المقابل حسب مقترح كل جهة إدارية مختصة، وهيكون فيه الضوابط اللازمة للتنفيذ.
وكمان هيوضح حالات الإعفاء الكلي أو الجزئي من تحصيل مقابل الانتفاع، وخد بالك سداد مقابل الانتفاع معناه انقضاء الدعوى الجنائية، ووقف تنفيذ العقوبة.
طيب افرض انك باني على حتة أرض ملك للدولة، إيه مصيرك؟في الأول هتقدم طلب لتقنين وضع اليد، وبعدين هتقدم طلب التصالح على مخالفات البناء
ودلوقتي قولنا ايه رايك في القانون الجديد؟
