سباق البنوك مشتعل ولو فاكر إنه سينتهى الآن فأنت مخطئ، خاصة بعد قرار البنك المركزي برفع الفائدة 1% والمعروف أننا نسمع بعده عن طرح شهادات وأوعية ادخارية مختلفة لكي تجذب السيولة التي توجد في السوق.
لو انت بقى من الناس اللي بتحب تستفاد وتستثمر فلوسها وتاخد عليها فايدة محترمة يبقى الفيديو ده ليك وده لأننا هنقولك على أفضل شهادات موجودة في السوق بعد قرار رفع الفايدة:
الساعات الأخيرة ، قرر البنك المركزي في اجتماعه الخامس في 2023 إنه يرفع سعر الفائدة بنسبة 1% على الإيداع والإقراض.
وطبعا ناس كتيرة بعد القرار ده بتفكر إزاي تستثمر فلوسها في شهادات ادخار عشان تحمي فلوسها من خطر التضخم وده لأنه متوقع إن معدلات التضخم يزيد الفترة الجاية
ولو بتسأل على أفضل شهادات موجودة في السوق فـ الأكيد إننا لازم نتكلم عن الشهادات الدولارية من البنك الأهلي ومصر واللي أعلنوا عنها من أيام لكل المصريين.
ولو حابب تشتري في البنك الأهلي فـ أحب أقولك إنه أعلن عن توفير شهادتين ادخار دولارية وهما الأهلي بلس والأهلي فورا.
وبتكون مدة شهادة الأهلي بلس 3 سنين وبيوصل العائد الخاص بيها لـ 7% بشكل سنوي كمان البنك بيسمحلك بـ الاقتراض بضمان الشهادة وده لحد حتي 50% من قيمتها بالجنية المصري، بحد أقصى 10 مليون جنيه وبسعر فايدة أقل من سعر إقراض البنك المركزي بنسبة 2.25%. والعائد بتاعها بيكون بالدولار وبيتصرف كل 3 شهور.
أما بقى شهادة الأهلي فورا فبتتميز بعائد سنوي يوصل لـ 9% ولمدة 3 سنين وبيتم صرفه مقدما وده بما يعادل الجنيه المصري تلك الفترة دي كلها وبنسبة 27% من قيمة الشهادة عن إجمالي مدة الشهادة.
عندك كمان بنك مصر اللي أعلن عن توفير شهادة جديدة للمواطنين وأسمها إيليت وبيوصل الحد الأدنى الخاص بيها لـ 1000 دولار ولمدة 3 سنوات والمفاجأة إنه بيتم صرف الفائدة بتاعتها ربع سنوي يعني كل 3 شهور بس كمان الفايدة بتوصل لـ7% سنويًا.
كمان بنك القاهرة عنده شهادة دولارية اسمها البريمو واللي بيوصل فيها الحد الأدنى لربط الشهادة لـ 500 دولار وده لمدة 3 سنين وبفايدة توصل لـ5.2% بشكل سنوي وبتقدر تصرف العائد ربع سنوي.
ولو بتدور على شهادات ادخار بالجنيه المصري فـ بنك التعمير والإسكان طرح شهادة جديدة وبتوصل مدتها لـ 3 سنين وبعائد يوصل لـ 18.5% بشكل ثابت شهري وعائد 20% سنوي والمفاجأة إن الحد الأدنى لشراء الشهادة دي هو 1000 جنيه بس.
ولو عايز شهادة بالجنيه وتديك عائد كبير فـ عندك شهادة البنك العربي الأفريقي ودي بقى شهادة ولا في الأحلام لأنها مش بس بتقدملك عائد بيوصل لـ40% بس، لأ دي بتقدملك كمان العائد مقدم من غير ما تستنى دوريات الصرف، والعائد ده يا سيدي بيكون عبارة عن فايدة 3 سنين بياخدها العميل بمعدل تراكمي 18.56%.
عندك كمان عندك شهادة بنك التنمية الصناعية ودي بقى من ضمن الشهادات اللي بتقدم العائد مقدم، مش بس كده دي كمان بتدفع فايدة بتوصل لـ39%.
مدة الشهادة دي 3 سنين وبتشتريها بالجنيه المصري وبحد أدنى 50 ألف جنيه في المرة الأولى بمضاعفات 5 آلاف جنيه ومن غير حد اقصى.
وطبعا متنساش شهادة ال19٪ لمدة 3 سنوات في بنكي الأهلي ومصر، بعائد شهري وحد ادنى 1000 جنيه.وبرضه عندك الشهادة بفايدة 22% متناقصة، بواقع 22% في أول سنة، و18% في تاني سنة، و16% في تالت سنة.
دلوقتي قولنا لو معاك مبلغ على جنب هتختار أنهي شهادة في دول؟
