جميعنا نبحث الآن على طريقة استثمار آمنة تحمينا من خطر التضخم والذي يزيد حولنا كل يوم، وطبعا ده يزيد من احتمال رفع الفائدة في اجتماع البنك المركزي يوم 30 مارس.
طيب لو انت معاك قرشين وخايف عليهم تقل قيمتهم تعالى اقولك أفضل شهادات ادخار تستثمر فيها فلوسك عشان قيمتها متقلش بعائد يوصل ل 20%.
كلها أيام و لجنة السياسات النقدية في البنك المركزي المصري تعمل تاني اجتماع ليها في 2023، وده عشان تحدد سعر الفايدة الجديد واللي في الغالب وحسب تصريحات خبراء اقتصاد هترفع الفايدة عشان تسيطر على معدلات التضخم وارتفاع الأسعار.
ولو انت معاك قرشين على جنب وعايز تستثمرهم وتحميهم من التضخم يبقي لازم تعرف أفضل شهادات ادخار موجودة في السوق المصري.
طبعا في البداية عندك شهادة البنك المصرى الخليجي الجديدة “إي جي بنك” ودي شهادة لمدة 3 سنوات، بسعر عائد ثابت لأول سنة بس واللي بيكون 20% وبتقدر تصرفه شهريًا.
ومن بداية السنة الثانية سعر العائد على الشهادة هيساوي (سعر الفائدة للإيداع اللي هيعلن عنها البنك المركزي المصري) وبتقدر برده تصرفه شهريًا.الجميل بقى في الشهادة دي إنه بيبدأ الحد الأدنى عشان تشتريها من 1000 جنيه مصري.
عندك كمان بقى شهادة البنك العربي الافريقي الدولي، ودي شهادة بتكون مدتها 3 سنين بعائد سنوي ثابت 18.75% وبتقدر تصرف العائد كل سنة، أو تختار العائد 17.75% وتصرفه كل نص سنة يعني كل ٦ شهور.
ممكن كمان تختار العائد عليها 17.50% وده تقدر تصرفه ربع سنوي، أو تختار عائد 17.25% وده ممكن تصرفه شهريًا، ويبدأ الحد الأدنى لشرا الشهادة دي من 5 آلاف جنيه مصري.
عندك كمان شهادة أكسيلنسي من بنك أبوظبي التجاري، ودي شهادة مدتها 3 سنين، والعائد ممكن يكون سنوي ثابت 18.5% وتقدر تصرفه كل سنة، أو تختار العائد 17.75% في حالة صرفه ربع سنوي أو تختار عائد 17.5% وتقدر تصرفه كل شهر.
المفاجاة بقى إنك ممكن تختار عائد 15.5% وتقدر تصرفه يوميا، ويبدأ الحد الأدنى لشراء الشهادة دي من 100 ألف جنيه مصري.
لسه السباق منتهاش وعندك لسه شهادات كتيرة تقدر تختار منها اللي يناسبك زي شهادة البنك الأهلي الكويتي
ودي شهادة لمدة 3 سنوات، بسعر عائد سنوي ثابت 18.25% وتقدر تصرف العائد كل ربع سنة أو 17.5% وده تقدر تصرفه كل شهر.
وبيبدأ الحد الأدنى لشرا الشهادة دي 1000 ألف جنيه مصري بس يعني هتناسب شريحة كبيرة من المواطنين.
كمان البنك ده بيوفرلك شهادة مميزة جدا بحد أدنى لشرائها يبدأ من 500 ألف جنيه مصري، وبتديك عائد سنوي ثابت 18% تقدر تصرفه كله شهر.
أما بقى شهادة بنك الكويت الوطني، ودي مدتها 3 سنين ، بسعر عائد سنوي ثابت 18.5% وتقدر تصرف العائد نص سنويًا، أو 18.25% في حالة صرفه ربع سنوي أو 18% في حالة صرفه شهريا، وبيبدأ الحد الأدنى لشراء الشهادة دي من 500 ألف جنيه مصري.
كمان عندك شهادة ادخار ميد بنك، ودي بتكون لمدة 3 سنين، بسعر عائد سنوي ثابت 18% وتقدر تصرفه شهريا مقدم في تاني يوم ليك بعد ما تشتري الشهادة، والجميل بقا إنه بيبدأ الحد الأدنى لشرائها من 1000 جنيه مصري.
في كمان شهادة البنك الأهلي المتحد بتكون لمدة 3 سنين بسعر عائد سنوي ثابت 18% وهتقدر تصرف العائد سنويًا، أو 17.65% في حالة صرفه كل نص سنة أو 17.5% في حالة صرفه ربع سنويًا، أو 17.25% في حالة صرفه شهريًا، ويبدأ الحد الأدنى لشرائها من 5000 جنيه مصري.
أما بقى شهادة بنك الإسكندرية، فدي بتكون لمدة 3 سنين واسمها (أليكس ستار)، بسعر عائد سنوي ثابت 18% وهتقدر تصرف العائد شهريًا، كمان هيبدأ الحد الأدنى لشرائها من 500 ألف جنيه مصري.
