خلال شهر مارس الماضي حدثت زيادة في أسعار السجائر، القرار هذا وقتها أثار الجدل بشكل كبير جدا وبعده بدأت بعض الشركات ترفع أسعار السجائر و المعسل، لكن السؤال هنا: هل في زيادة جديدة في أسعار السجائر؟ وما سببها؟ تابعونا لمعرفة التفاصيل:
بعد ارتفاع سعر الدولار خلال الفترة الأخيرة مفيش سلعة من السلع مزادش تمنها، وكان من ضمن السلع دي هي السجاير اللي تم الإعلان عن ارتفاع أسعارها من فترة
وده خلى ناس كتير عايزة تعرف في زيادة جديدة في السجاير ولا لا؟
بحسب إبراهيم إمبابي، رئيس شعبة الدخان والسجاير في اتحاد الصناعات للمصري اليوم، أن في زيادة في أسعار السجاير الفترة الجاية بقيمة 2جنيه ودي زيادة مش هتعمل أي أزمة في السوق
لكن للأسف الأزمة الحقيقة في تلاعب التجار في تسعيرهم لعلب السجاير بكل أنواعها وده أدى لوجود سوق سودا في السجاير، عشان كده الدولة لازم تتحرك وتواجه الظاهرة دي
وقال كمان إن المشكلة في ضعف الرقابة على الأسواق اللي أدت لقيام بعض التجار بتخزين كميات كبيرة من السجاير، وده بيخلي المستهلك قدام خيارين الأول أن يشتري بالسعر اللي بيبع بيه التاجر واللي بيكون بعيد تماما عن السعر المكتوب في العلبة، أو أنه ميشتريش أصلا
وعشان كده لازم المستهلك يرفض دفع أي مبلغ إضافي على السعر المكتوب على علب السجاير وإلا هيكون مشارك في الأزمة بشكل رئيسي وموافق على استغلال التجار ليه
بس يا ترا إيه حل الأزمة دي؟
بص يا سيدي، بحسب إمبابي حل الأزمة دي هو إضافة التعريفة الضريبية من الحكومة على أسعار السجاير ودي مش هتكون أكتر من 2 جنيه على أسعار السجاير الرسمية، واللي بيتم بيعها بأكتر من تمنها في المحلات التجارية.
وقال كمان خلال تصريحات تليفزيونية، عشان المستهلك ميضحكش عليه لازم يعمل الخطوة دي لما يجي يشتري علبة السجاير لو مكنش عارف تمنها، وهي أن المواطن يعمل اسكان على الباركود الموجود على علبة السجاير، وساعتها هيطلعله سعر العلبة وتاريخ الإنتاج
وساعتها بقى لما يجي البايع يطلب سعر أعلى،تطلب 122 رقم النجدة أو الرقم السريع لخدمة حماية المستهلك ويبلغ عن التاجر فورا
وقال أن لو واحد بس مارس حقوقه كمستهلك الظاهرة دي هتنتهي، وده عشان من أمن العقاب أساء الأدب
وبحسب موقع سكاي نيوز، شركة الشرقية للدخان كانت أعلنت ف شهر مارس اللي فات زيادة أسعار السجاير و المعسل بقيمة جنيه لـ 3 جنيه في العلبة الواحدة
ودي تعتبر الزيادة التانية اللي بتقرها الشركة في أقل من 7 شهور، بعد ما رفعت أسعار السجاير في سبتمبر بين جنيه ونص و 2 جنيه، وكمان رفعتها في شهر مارس 2022 بقيمة نص جنيه وجنيه واحد
سبب ارتفاع أسعار السجائر
بص يا سيدي، بحسب تصريحات سابقة لهاني أمان العضو المنتدب والرئيس التنفيذي لشركة الشرقية للدخان إيسترن موكباني، سبب الزيادة اللي أقرتها الشركة هو الارتفاع المستمر لكل مدخلات الانتاج و المواد الخام الخاصة بصناعة التبغ وده أدى لزيادة سعر المنتجات.
وقال كمان أن القرار ده جه بعد دراسة طويلة، لأنه هينعكس على الضرايب اللي الشركة بتدفعهاودلوقتي قولنا بتشتري علبة السجاير بكام؟
