هل تخيلت في يوم من الأيام إن مصر تقرر تعمل نهر نيل أخر، وهل هو ممكن يحل أزمات كثيرة!، لكن لماذا تتخيل فمصر بدأت فعلا تعمل نهر جديد سيكون أضخم نهر في العالم، لكن ما حكاية النهر الجديد وهل سيكون أكبر نهر في العالم؟ وما تكلفته؟ تابعونا لمعرفة التفاصيل:
خلال السنين الأخيرة الدولة وجهت اهتمام كبير جدا بالمشروعات القومية الخاصة بمجالات الزراعة واستصلاح الأراضي، وده عشان تقدر توفر الأمن الغذائي للمصريين
كان من ضمن المشروعات دي هو مشروع إنشاء أضخم نهر صناعي في العالم، بس إيه حكاية المشروع ده؟
بص يا سيدي، حسب موقع صدى البلد، الرئيس السيسي كان اجتمع من فترة مع قيادات الدولة لبحث أخر المستجدات بخصوص المشاريع القومية الخاصة باستصلاح الأراضي والإنتاج الزراعي، وكمان أطلع على جهود المبذولة في مجالات تطوير البنية الأساسية.
كان من ضمن الجهود دي إنشاء مشروع النهر الصناعي، وده الهدف منه توصيل المياه اللازمة لزراعة 2مليون و200ألف فدان اللي ضمن مشروع الدلتا الجديدة في الصحرا الغربية.
النهر ده هيكون بطول 114 كيلو وده عشان يستغل مياه الصرف الزراعي والجوفية والسطحية في الزراعة بعد معالجتها بمحطة مياه الحمام ودي محطة لمعالجة مياه الصرف الزراعي وموجودة في الساحل الشمالي.
وعلى فكرة النهر ده من المفترض أنه ينتج 10 مليون متر مكعب من المياه، ده كمان بيضم 22 كيلو متر مواسير مدفونة تحت الأرض وظيفتهم نقل المياه الجوفية والصرف الزراعي بعد معالجتهم في محطة الحمام، ده كمان في مسار مفتوح في النهر طوله 92 كيلو متر.
لكن السؤال هنا: هي دولة نفذت قد إيه من المشروع ده؟
أنا أقولك حسب موقع صدى البلد، الدولة انتهت بالفعل من 35% من الأعمال الإنشائية لمواسير نقل المياه، و65% من الأعمال المكشوفة.
وبحسب تصريحات عباس شراقي، أستاذ الموارد المائية والري، لموقع روسيا اليوم، إن مشروع النهر الاصطناعي يعتبر من أهم المشروعات المائية في السنين الأخيرة من حيث الإنشاءات الهندسية والأهمية الاقتصادية.
وقال إن ده عمل هندسي عملاق مكون من تلات قنوات بيتم إنشاءها في ظروف مختلفة عن باقي قنوات الري في مصر، وده لأنهم بينقلوا المياه لمناطق صحراوية مرتفعة عن نهر النيل بأكتر من 100 متر.
وقال إن القناة الأولى طولها 42 كيلو متر منها 26 كيلو متر مواسير، و16 كيلو متر قناة مكشوفة لنقل 10 مليون متر مكعب من فرع رشيد، بإجمالي 3.5 مليار متر مكعب سنويا لري 600 ألف فدان.
أما بالنسبة للقناة التانية فهي طولها 170 كيلو متر من محطة الحمام لنقل 7مليون متر مكعب بإجمالي 2.5 مليار لري 800 ألف فدان.
أما بقى القناة التالتة فهي ضمن مشروع جنة مصر، وهي عبارة عن خطين للمواشير بطول 12 كيلو متر لري 64 ألف فدان.
ولما إتسأل تكلفة المشروع الضخم ده كام؟ رد وقال إن مشروع النهر الصناعي و المعروف بأسم مشروع الدلتا الجديدة أتكلف 160 مليار جنيه.
وعلى فكرة ده قال إن المشروع ده هيساهم في سد وتقليل الفجوة الغذائية بالتعاون مع باقي المشروعات الزراعية التانية، لكن قال إن التحدي اللي هيقابلنا هو توفير المياه اللازمة لأن النيل ممكن ميتحملش ضخ الكمية المطلوبة من السد العالي
وقال إن مش من الضروري إنه يتم زراعة المساحة الزراعية المستهدفة ده أحنا لو زراعنا مليون فدان هيكون إنجاز كبير وده لأن هيكمل مشروعات صناعية وخدمية تانية
وقال إن عشان نستفاد من النهر الصناعي ده بشكل أكبر لازم نركز على زراعة المحاصيل اللي بتتزرع في الأراضي الصحراوية اللي بتصدر عشان نقدر نسد جزء من تكلفة المشروع، ونستورد المحاصيل الرخيصة زي القمح والدرة
ودلوقتي قولنا رأيك في مشروع النهر الجديد؟
