هنتعامل بالعملة المحلية بدلا من الدولار مع روسيا، هذا ما قاله مسئول في الدولة خلال الساعات الاخيرة، وهذا يأتي بالتزامن مع انسحاب روسيا من اتفاقية تصدير الحبوب
بس السؤال هنا: هي مصر فعلا هتتعامل بالعملة المحلية مع روسيا؟ وياتري إيه الخطوات اللي خدتها؟ وإيه تأثير انسحاب روسيا من اتفاقية تصدير الحبوب؟
مصر بقالها فترة بتعاني من أزمة العملة وتحديدا نقص الدولار في السوق وطبعا ده سبب ازمات كتير اوي زي ارتفاع السلع ونقصها وتكدسها في المواني، غير ان في شركات ومصانع اضطرت انها تقفل بسبب الازمة دي
وده خلى الحكومة تبدا تسعى في التخلي عن الدولار تدريجيا عشان تخفف الضغط عليه، وفعلا بدأت في مفاوضات مع بعض الدول عشان نتعامل بالعملة المحلية بدل من الدولار
بس ياترى الدولة عملت ايه؟
بص ياسيدي، حسب تصريحات ابراهيم عشماوي مساعد اول وزير التموين لموقع سكاي نيوز، إن الوزارة بتسعى أنها تتعامل بالعملة المحلية بين مصر وروسيا في الاستيراد والتصدير، عشان كده وزارة التموين قدمت الاقتراح ده لوزارة الخارجية لتطبيقه في أسرع وقت
بس قال ان الموضوع ده هيحتاج موافقات دولية بين البنك المركزي المصري والمركزي الروسي.
وقال كمان إن بعض الدول ممكن تلجأ للبحث عن بدايل تانية زي مثلا إبرام عقود طويلة الآجل أو انها تثبت أسعار الاستيراد بالاتفاق مع بنوك استثمارية، وده عشان نقدر نقلل من تذبذب الأسعار اللي كل شوية بنتفاجئ بيها
وبالمناسبة ده قال إن مصر بتستورد 80% تقريبا من احتياجاتها من القمح من روسيا، وده معناه وجود احتمال لعقد صفقات متكافئة بشروط ومزايا تنافسية وبالعملات المحلية
ده كمان علق على وقف الاتفاق بين روسيا واوكرانيا اللي ممكن تاثر بشكل كبير على استيرادنا للحبوب من هناك، وقال ان تاثير قرار وقف اتفاق تصدير الحبوب على مصر أمر سابق لأوانه حاليا، بس عموما ارتفاع بأسعار الحبوب عالميا بعد تعليق الاتفاق لان اي اضطراب بيحصل في سلاسل الإمداد بيصاحبه ارتفاع في الأسعار
والحكاية مش في روسيا وبس، لأنه حسب مصادر لموقع مصرواي، البنك المركزي شغال دلوقتي على مشروعات رقمية، هدفها تسهيل الاستيراد والتصدير بالعملات الوطنية مع 3 دول هي الإمارات والأردن والهند.
وحسب المصادر دي، التركيز دلوقتي على الانتهاء من إجراءات قبول المدفوعات مع الإمارات والأردن باستخدام العملات الوطنية من خلال شبكة “ميزة”
ده كمان البنك المركزي شغال مع الهند لتنفيذ مشروع لقبول المدفوعات بين الدولتين ب “الجنيه المصري والروبية الهندية”.
ومن خلال المشروع تقدر مصر تستورد شحنات قمح من الهند وتسددها بالجنيه المصري، وده في مقابل تصدير بعض السلع والمنتجات المصرية زي الخضروات والفاكهة للهند مقابل الروبية الهندية
ودلوقتي قولنا رايك في التعامل بالعملة المحلية بدل من الدولار؟
