هذا العام شهدنا ارتفاعات جنونية لأسعار الذهب وأسعار الدولار، والذي كان بقابلهم تراجع في أسعار الجنيه، وهنا اي شخص يريد أن يستثمر أمواله يسأل أهم سؤال الأن عن أفضل استثمار هذه الفترة سواء الشهادات أم العقارات لأم الذهب.
التضخم مخلاش حاجة في حالها و الاسعار ولعت على الآخر وعشان كدة كل الناس دلوقتي بتدور على اي طريقة عشان تحافظ بيها على فلوسنا وقيمتها متقلش
طيب ياترى اي أفضل وعاء للاستثمار الدهب ولا الشهادات ولا العقارات؟
محللون في قطاع الاستثمار شافو من وجهة نظرهم أنه أفضل أدوات الاستثمار في الوقت الحالي عشان تحافظ على قيمة فلوسك مع انخفاض الجنيه هو الاستثمار في العقارات وشراء أسهم بالبورصة للشركات اللي بتوفر مصادر دخل بالدولار، ومجابوش سيرة الدهب خالص رغم ارتفاع أسعاره.
قالوا كمان أن العقارات دلوقتي هي اداة الادخار اللي يعتبر مزادش سعرها بشكل كبير زي غيرها من أدوات الاستثمار زي الدهب اللي سعره طار فـ السما وعشان كدة ناس كتير تقدر تستثمر ف العقارات دلوقتي.
ولو انت مش متابع أحب أقولك إن قيمة الجنيه انخفضت 3 مرات ورا بعض في سنة واحدة وده من مارس 2021 ولحد مارس 2023، و صعد سعر الدولار مقابل الجنيه في سنة واحد ووصل 30.94 جنيه مقابل 15.76 جنيه، بنسبة زيادة وصلت لـ 96.3%، وده مش كلامنا دي بيانات البنك المركزي
.مش بس كدة ده كمان سعر الذهب في سنة واحدة ومع ارتفاع سعر الدولار مقابل الجنيه زاد بنسبة 125.3%، وكسر سعر الجرام في 20 مارس 2023 حاجز الـ 2000 جنيه مقابل 892 جنيهً في نفس اليوم بس السنة اللي فاتت.
وعشان كدة مروان يونس الشريك التنفيذي ورئيس إدارة الأصول في شركة زيلا كابيتال، قال في تصريحات لـ موقع مصراوي أن أفضل أدوات الاستثمار في الوقت الحالي للحفاظ على قيمة الفلوس زي ما هي بدون ما تقل في كل مرة تنخفض فيها قيمة العملة المحلية هي الاستثمار في أسهم البورصة، وخاصة في الشركات اللي بـ تمتلك ايرادات بالدولار.
طيب شركات زي إيه مثلا اللي ممكن تحط فلوسك فيها ؟
هقولك يا سيدي مراون يونس قال إنها زي شركات الأسمنت وشركات الحديد وغيرها كتير، وإنه عشان تاخد قرار استثمار فلوسك لازم تدور على وسيلة تعوضك عن الانخفاضات اللي حصلت للعملة المحلية وهي الجنيه الفترة اللي فاتت؟
مثلا عندك شركات أبو قير للأسمدة والإسكندرية لتداول الحاويات والبضائع قدروا إنهم يعوضوا انخفاض قيمة العملة المحلية من خلال فرق السعر بين الدولار الجنيه الناتج من عمليات التصدير اللي عملوها.
وعشان كده وجهة نظر مروان يونس إن أدوات الاستثمار التانيه زي الودائع في البنوك أو الشهادات مش بتحقق نفس الأرباح لأنك لما بتاخد قيمة الوديعة بعد انتهاء المدة متعرفش وقتها سعر الصرف هيكون عامل إزاي وممكن الفلوس قيمتها بردو تقل.
لكن بردو في خبراء اقتصاد تانين نصحوا بالاستثمار في الشهادات وده هيكون مفيد للناس اللي معاها فلوس مش كتيرة وميقدروش يشتروا أسهم أو عقارات، وبيكون حل الشهادات هو الأمثل ليهم.
بس أكدوا إن الأفضل إنهم يستنوا نتيجة اجتماع البنك المركزي يوم الخميس الجاي وده عشان يعرفوا الفايدة هتزيد ولا لأ وهتوصل كام.
ولو انت مش عارف فـ لجنة السياسة النقدية بالبنك المركزي هتعمل اجتماعها التاني خلال 2023 واللي هيكون يوم الخميس 30 مارس وده عشان تقرر مصير سعر الفائدة بعد ما قررت تثبتها في فبراير اللي فات عشان يسجل سعر الفائدة لدى المركزي 16.25% للإيداع و17.25% للإقراض
انت بقى قولنا وجهة نظرك بتفضل في الاستثمار العقارات ولا الدهب ولا الشهادات ؟
