من بداية 2023 وأسعار الحديد مرتفعة بشكل جنوني ولا أحد يعرف أن يسيطر عليها، والمفاجأة إن سعر الطن تخطى الـ 40 ألأف جنيه، طيب ياترى ما السبب في هذه الزيادة الجنونية وهل ممكن نسمع عن ترا جع في الأسعار قريب؟
لو انت مهتم بسوق العقارات في مصر وحابب تعرف صبة الخرسانة وصلت كام وإيه أحدث أسعار شركات الحديد والأسمنت لشهر مايو خليك معانا في الحلقة دي واحنا نقولك كل التفاصيل:
تقريبا كده محدش هيعرف يبني تاني، لأن أسعار الحديد في مصر عملت صدمة لكل المقاولين، وده لان أسعار الحديد زات حوالي 20 ألف جنيه، عشان تقفز أسعار طن الحديد من 18 ألف إلى 38 جنيه تسليم أرض المصنع في بداية أبريل 2023، بحسب المصري اليوم
ودلوقتي سعر الحديد الاستثمارى للطن حوالي 39 ألف جنيه للطن، وسعر حديد عز للطن 40 ألف و470 جنيه.
بس الغريب ان في انخفاض بأسعار خام الحديد عالميا بحسب موقع الاسبوع، فياترى إيه اسباب ارتفاع أسعار الحديد في مصر بالشكل المبالغ فيه ده؟
حسب تصريحات أحمد الزيني، رئيس شعبة مواد البناء باتحاد الغرف التجارية، فـ اللي حصل إن بعض مصانع الحديد مش شغالة بكل طاقتها، بسبب قلة الخامات المستوردة من الخارج، فتعمل إيه؟
قللت حصص الوكلاء وده طبعا كان سبب في انخفاض حجم المعروض من الحديد بالسوق المحلي.
ولو انت مش عارف فـ المصانع بتستورد 90% من الخردة والخامات من الخارج، وعشان كده زيادة إنتاجها مرتبط بتدبير العملة الأجنبية من البنوك وده اللي بيعزز الاستيراد عموما، حسب كلام الزيني لموقع القاهرة 24.
ومن شهر تقريبا، الزيني طالب الأجهزة الرقابية بالدولة بالتدخل لمراقبة السوق عشان يحصل انضباط في أسعار الحديد لان بعض التجار بيزودوا ألف وألفين جنيه في الطن .
ومع ارتفاع أسعار الحديد، الطلب عليه في النازل، وعمليات الشراء بقت مقتصرة على الإنشاءات في المدن الجديدة وحالات فردية محدودة، لدرجة إن سوق مواد البناء فيه كساد دلوقتي.
عشان كده طالب الزيني بإعادة تفعيل القرار الوزارى السابق اللي بيلزم مصانع الأسمنت والحديد بإبلاغ قطاع التجارة الداخلية بوزارة الصناعة والتجارة بالكميات المنتجة وأسعارها وأسماء الوكلاء اللي استلموها.
وكمان يمنعها من رفع الأسعار بدون مبرر، أو خفض الإنتاج بدون موافقة الوزارة،أما بقى لو بتسأل عن أسعار الأسمنت؟
فـ شعبة الأسمنت قالت في تصريحات لـ “الوطن” إن اسعار الأسمنت مستقرة في السوق المحلية خلال الفترة الحالية، وده بسبب توافر كميات كبيرة من الأسمنت في الأسواق.
وسجل سعر أسمنت المسلح 1960 جنيه، وأسمنت النصر 1940 جنيه، وأسمنت الممتاز 1960 جنيه، كمان وصل سعر أسمنت التعمير 1870 جنيه.
دلوقتي قولنا رأيك في أسباب ارتفاع أسعار الحديد في مصر وهل شايفها منطقية؟
