حيرت أسعار الذهب المواطنين خلال الفترة الأخيرة خاصة وانها شهدت ارتفاعات قياسية لأول مرة في تاريخ المعدن الأصفر، وهذا ما صدم الكثير من الاشخاص، خاصة بعد أن وصل سعر جرام 21 في مصر ل 1800 جنيه.
وده خلى كتير من المصريين خاصة المقبلين الفترة دي على الزواج يسألوا هل الدهب هيفضل يزيد ولا ممكن الأسعار ترجع لمستويات طبيعية، وياترى الوقت دا أفضل للشراء أم البيع، ده اللي هنعرفه مع بعض في حلقتنا النهاردة:
طبعا الدهب حير ناس كتير بعد ما ارتفعت أسعاره بشكل صادم، وعلى الرغم انخفاض السعر عالميًّا إلا أن أسعار الذهب في مصر في تزايد، الأمر اللي أثار تساؤلات حول زيادة الفجوة بين السعر العالمي والمحلي.
سبب ارتفاع أسعار الذهب
طبعا بتختلف أسعار الذهب في مصر في المصنعية، من محل صاغة لآخر، وده لأن بيتراوح متوسط سعر المصنعية والدمغة في محلات الصاغة بين 30 و65 جنيهًا باختلاف نوع عيار الذهب، وباختلاف محلات الصاغة، ومن محافظة إلى أخرى، ومن تاجر إلى آخر.
وأكد خبراء الذهب إن أسباب ارتفاع الذهب في مصر بسبب الفجوة بين السوق الرسمي للدولار والسوق الموازية اللي زادت جدا الفترة الأخيرة، بالإضافة طبعا لزيارة إقبال المواطنين المصريين على شراء الدهب، واللي شايفين من وجهة نظرهم إن الفترة دي غير مناسبة للبيع أو الشراء لحد ما الأسعار تستقر.
والمفروض الحكومة حاليا منتظره نتيجة اجتماع مجلس صندوق النقد الدولي، واللي هتحسم مصير قرض الثلاث مليارات دولار البي منتظراه مصر ، خاصة وانها بتواجه مشكلة في توفير العملة الأجنبية برغم انخفاض الجنيه وتحرير سعر الصرف.
طب دا إيه تأثيره على الدهب ؟
طبعا تراجع أسعار الجنيه مقابل الدولاءر ليه تأثير كبير على ارتفاع أسعار الدهب لأنه اثر على الأسواق المحلية بعد ما قدر التجار في السوق السوداء يبيعوا الدولار مقابل 32 جنيهًا و33 جنيهًا، مقارنة بالسعر الرسمي في البنوك عند 24.6 جنيها للدولار.
طبعا تجار الدهب لما عرفوا اتحركوا بسرعة لشراء الذهب الخام، معتبرين إن دي فرصة مثالية للتربح من فارق السعر في الدولار، ودا اللي ساعد بشكل كبير في ارتفاع الدهب في الأسواق المحلية.
واللي عملوه التجار ده كان بهدف أنهم يقدروا يشتروا كمية كبيرة عشان يصدروها بعد كدا ويستفادوا من الأزمة، خاصة إن الدهب في مصر بيتأثر بالتوترات والازمان الاقتصادية في مصر وكمان دول العالم.
كمان منقدرش نتجاهل دور السوشيال ميديا واللي قدرت تضغط بشكل كبير نتيجة انتشار حالة من القلق والذعر خلت ناس كتير تقبل على الشراء ودا ساعد في تحقيق مزيد من الارتفاعات في الأسعار المحلية اللي وصل فيها النهاردة عيار 24، إلي 1954 وسجل عيار 21 1710 جنيه، وسجل سعر الذهب عيار 18 1466 جنيها للجرام، بينما سجل سعر جرام الذهب عيار 14 اليوم 1140 جنيه.
