لو أنت غير معين في الحكومة و لا في أي مؤسسة وعملك غير منتظم، ولا يوجد تأمين عليك ، فيجب أن تعرف أن لك منحة من الحكومة وهي توفر امتيازات وتأمين اجتماعي، فما حكاية تلك المنحة وما شروطها؟ تابعونا لمعرفة التفاصيل:
ما بين وقت والتاني الدولة بتصدر قرارات عشان تقدر توفر حياة كريمة للمواطنين زي المعاشات الاستثنائية و تكافل وكرامة وغيره
من بين القرارات دي قرار الرئيس عبد الفتاح السيسي خلال احتفالية عيد العمال الأخيرة واللي أقر فيها منحة للعمالة الغير المنتظمة الغير مؤمن عليهم، وده خلي ناس كتير تسأل و تدور على خطوات الحصول على المنحة دي وازاي تقدر تقدم عليها.
عبد الوهاب خضر المتحدث الرسمي باسم وزارة القوى العاملة قال في تصريحات لموقع مصراوي، إن هيتم الإعلان عن كل الشروط الخاصة بالمنحة بعد إصدار صندوق إعانة الطوارئ للعمالة الغير منتظمة.
وده اللي وجه بتأسيسه الرئيس عبد الفتاح السيسي، وبعد كده هيكون في لوايح وآليات لطرق تسجيل العمالة الغير المنتظمة لصرف المنحة.
شروط المنحة
بحسب عبد الوهاب الخضر قال ان من ضمن شروط المنحة انك تثبت انك مش متأمن عليك ولا بتاخد معاش وغيرها من شروط اللي هيتم الإعلان عنها في الأيام اللي جاية
والمبلغ اللي هاخده من المنحه دي كام؟اقولك يا سيدي الرئيس عبد الفتاح السيسي أقر صرف مبلغ 1000 جنيه للعمالة الغير منتظمة.
طيب السؤال هنا هل أقدر أقدم على المنحة دي عن طريق وزارة القوى العاملة؟بحسب تصريحات عبد الوهاب خضر لمصراوي وزارة القوى العاملة ملهاش أي رابط لتسجيل العمالة الغير منتظمة
وكمل وقال انها مش بتبعت اي رسايل للمواطنين بخصوص المنحة دي، وعشان كده انا بحذر المواطنين انهم ميصدقوش اي رسايل على التليفون أو على الفيسبوك بخصوص المنحة وصرف مبلغ 1000 جنيه
ولما أتسال عن تفاصيل أكتر بخصوص صندوق إعانة الطوارئ الجديد للعمالة الغير منتظمة، قال ان الصندوق ده هيضم لوايح وشروط تسجيل العمالة الغير منتظمة وبعد الانتهاء من تأسيسه أول قرار هيكون صرف ال 1000 جنيه لكن لمين لسه محدش عارف، وهل هيتم صرفهم للعمال اللي سجلو ولا هيستنوا تسجيل عمال جدد ده اللي هنعرفه الأيام اللي جاية؟
وقال كمان أن الصندوق ده من اي عامل ان يسجل فيه ومن خلاله هياخد امتيازات خاصة زي 4 منح كل عام للرعاية الصحية و الإجتماعية والتأمين الإجتماعي.
وياترا هل العامل ممكن يسجل نفسه بشكل مباشر ولا صاحب الشغل اللي هيسجله؟هنا عبد الوهاب خضر قال ان ممكن العامل يسجل نفسه مباشرة من غير المقاول زي ما كان بيحصل قبل كده.
والخطوة دي هتسمح لناس أكتر أنهم يسجلو زي الباعة الجائلين و غيرهم عشان يقدروا يصرفوا منحة ال1000 جنيه.
وكمل وقال ان بيانات العمالة الغير منتظمة اللي متسجلة في وزارة القوى العاملة بيتم فلترتها دايما عشان نحذف اللي مش من حقهم المنحة دي ونضيف ناس جداد
وعلى فكرة عدد العمالة الغير منتظمة على مستوى الجمهورية عددهم 350 ألف عامل، ودول اللي متأمن عليهم ومن حقهم يصرفوا أي منح أو امتيازات من وزارة القوى العاملة بحسب مصراوي.
ودلوقتي بقى قولنا إيه رأيك في منحة الألف جنيه للعمالة غير المنتظمة؟
