صعود تاريخي في أسعار الدهب، انخفاض مستمر في قيمة الجنبه بيقابله ارتفاع في قيمة الدولار، وفي الآخر ارتفاع أسعار بياكل الأخضر واليابس. وفي وسط كل هذا مصر فيها 17 ألف مليونير و7 مليلرديرات والسؤال: أين اغنياء مصر من الأزمة؟ وماذا قدموا للبلد في أزمتها؟
لما البلد بتتعرض لازمة اقتصادية زي دلوقتي الموظف والعامل البسيط بيلاقوا حل واحد: الصبر، بس هل كلنا واحد ولا في ناس تقدر تقدم حاجة تانية غير الصبر؟
تقرير مؤسسة «هينلي أند بارتنرز» عن الثروات في أفريقيا لعام 2022، كشف عن 17 ألف مصري معاهم أكتر من مليون دولار، و880 شخص معاهم اكتر من 10 مليون دولار، وده بالإضافة إلى 57 شخص ثروة الواحد فيهم أكتر من 100 مليون دولار.
أما بقى المفاجأة الكبيرة فهي عدد المليارديرات في مصر، وحسب التقرير احنا عندنا 7 أشخاص ثرواتهم عدت المليار دولار منهم 6 عايشين وسطنا، وده رقم كبير خلي مصر الأولى في عدد المليارديرات على مستوى أفريقيا.
ولو عاوز تعرف الأسماء بص على مجلة فوربس الأمريكية واللي رتبت ثروات الاغنياء في مصر، عشان ييجي ناصف ساويرس في المركز الأول ومن بعده نجيب ساويرس، وبعدين محمد منصور في المركز التالت، والرابع هو رجل الأعمال المصري والمقيم في بريطانيا محمد الفايد، والخامس يوسف منصور والسادس ياسين منصور.
وفي المقابل، معدلات الفقر في مصر سجلت 29.7%، حسب آخر بيانات الجهاز المركزي للتعبئة والإحصاء الحكومي.
وهنا ممكن تسأل نفسك: ليه المليان ميصبش على الفاضي؟ “انا مبعلنش عن تبرعاتي ياعزة” ده كان رد الملياردير نجيب ساويرس على واحدة من المتابعين قالتله “علي فكرة يا أخ نجيب محمد صلاح اتبرع بـ3 مليون لكنيسة ابو سيفين ، واخدلي بالك أنت ولا عامل من بنها”
طيب هي تبرعات ساويرس كلها مخفية؟
في 2020، ساويرس دخل مفرمة الانتقادات، بعد ما طالب الدولة برفع الحظر عشان مصانعه تشتغل في وقت كل الناس خايفة على حياتها، لأ وكمان خفض مرتبات الموظفين بنسبة 50%.
لكن بعدها سمعنا بتبرع مؤسسة ساويرس للتنمية التابعة اللعيلة ب100 مليون جنيه عشان تساعد الدولة على مواجهة الظروف الصحية
كمان قدم 15 مليون جنيه وديعة بنكية لتشغيل مستشفى 25 يناير، وده غير 100 ألف جنيه لمؤسسة جنة الخيرية لكفالك الأيتام واعمار المساجد والقرى الفقيرة
اما بقى أبو هشيمة فاتبرع ب ٣٠ ألف جنيه لكل أسرة تضررت من واقعة كنيسة ابو سيفين. وفي الأزمة الصحية اتبرع ب2 مليون جنيه لصالح صندوق تحيا مصر، وكفالة 2000 أسرة فى 11 قرية مختلفة بـ 6 محافظات مصرية بالتعاون مع جمعية الأورمان.
كمان أفراد عيلة منصور تاني أغنى عيلة في مصر بعد آل ساويرس اتبرعوا للدولة بحولي 100 مليون جنيه، منهم 200 ألف كرتونة مواد غذائية.
وده بالإضافة لتسليم فندق سياحي مكون من 200 غرفة للدولة، مع تغطية كل مصاريف الإقامة الكاملة للحالات المحجوزة والدكاترة وطاقم على مدار الساعة.
مع 5 مليون جنيه لمساعدة العمالة اليومية، وكفالة 10 آلاف أسرة مصرية متضررة من الأزمة بقيمة 2.5 مليون جنيه. وأخيرًا التبرع لصندوق تحيا مصر بمبلغ 30 مليون جنيه في 2021.
تفتكروا بقى اللى عملوه كفاية ولا لازم يقدموا اكتر؟
