البورصة قررت ان تعلن عن أسعار الذهب كل يوم على موقع البورصة لكن هل السعر الذي ستعرضه حقيقي؟وهل سيكون بنفس سعره في السوق؟ وما رأي تجار الذهب في هذه الاسعار ؟ ومين الشركة المسؤولة عن نشر الاسعار ؟
الفترة الأخيرة كانت اسعار الدهب هي حديث كل الناس في الشارع وخصوصا بعد ما الحكومة أعلنت من فترة أنها هتلغي الجمارك على الدهب
و ده خلي اسعاره تنزل بشكل كبيرا جدا بعد تطبيق القرار، في الوقت ده البورصة طلعت وقالت انها هتعلن عن اسعار الدهب.
وبحسب تصريحات رامي الدكاني رئيس البورصة طلع وقال في بيان صحفي ان البورصة هتعلن عن اسعار استرشادية للدهب لعيار 24 وده عن طريق موقعها الالكتروني
كمان قال ان الخطوة دي بتيجي في الوقت اللي أعلنت فيه البورصة عن أول صندوق متخصص في الاستثمار للدهب في مصر
طيب البورصة هتجيب أسعار الدهب منين؟البورصة اتفقت مع شركة اسمها جولد نت، الشركة دي متخصصة في تجارة المعدن النفيس، وهي المسؤولة عن تحديد سعر الدهب بناء على البيانات الموجودة عندها وده بحسب ما نشره موقع مصراوي.
طيب لو الأسعار دي غلط مين هيتحمل مسؤولية الأسعار اللي بتتنشر؟
البورصة مش هتتحمل أي مسؤولية قانونية لو الأسعار اللي بتعلنها مطلعتش مظبوطة، هي كل مهمتها نشر الأرقام على موقعها الالكتروني
طيب تجار الدهب إيه رأيهم؟حسب تصريحات هاني ميلاد، رئيس شعبة الدهب لمصراوي، قال ان الاسعار اللي بتعلنها البورصة اسعار استرشادية وان التجار مش ملزمين بالسعر اللي هتلعنه.
كمان قال ان اعلان اسعار الدهب في البورصة مش هتأثر على سعر الدهب بالسلب او الإيجاب، لكن هيسبب تشتت للمستهلكين في السوق بسبب وجود اكتر من سعر معلن.
وكمان قال في تصريحاته لجريدة الفجر، ان اسعار الدهب اللي البورصة بتعلن عنها ملهاش علاقة بسعر الدهب في السوق، وتجار الدهب بيعتمدوا على الأسعار اللي بتتعلن في سوق الصاغة كل يوم واللي بتكون بناء على السعر العالمي وسعر الدولار، وكمان بناءعلي حالة العرض و الطلب في السوق.
واتفق معاه ناجي فرج مستشار وزير التموين ، وقال في تصريحاته لمصراوي، ان السعر اللي هتعلنه البورصة استرشادي والتجار مش ملزمة بيه في البيع و الشرا
وقال ان السعر ده بيعبر عن متوسط عيار 24 واللي ليه سعرين سعر للبيع و سعر للشرا
كمان عضو في شعبة الدهب في اتحاد الصناعات قال ان سعر الدهب المعلن في البورصة خلى السوق في حالة عدم استقرار، وده لأن السعر اللي اعلنته البورصة ملوش صلة بأرض الواقع، حسب جريدة الفجر.
طيب ايه سعر الدهب في البورصة دلوقتي وايه الفرق بينه وبين السوق؟
بص يا سيدي أول سعر نشرته البورصة على موقعها وضح الفرق بين الأسعار، لأن عيار 24 سجل في البورصة سجل 2652جنيه و 2698 كأعلى سعر لكن في السوق كان وصل لـ 2742 جنيه، حسب جريدة الفجر.
ودلوقتي قولنا رايك شايف ان سعر الدهب في البورصة ده سعره الحقيقي؟
