النداء الأخير من الحكومة للمصريين بالخارج: مبادرة استيراد السيارات ستنتهي في 14 مايو، وفي 10 عربيات تقدر تنزلهم مصر برسوم تبدأ من 87 ألف جنيه..
فخليك معانا عشان تعرف ايه العربيات دي؟ وهل الحكومة عندها نية لتجديد المبادرة ولا لأ؟ واصلا في كام واحد قدم عليها من المصريين بالخارج؟
من كام يوم وزير المالية محمد معيط اكد ان الحكومة مش ناوية تجدد العمل مبادرة استيراد السيارات للمصريين في الخارج بعد انتهائها يوم 14 مايو طبقا للقانون.
عشان كده فاضل أيام معدودة تقدم فيها ورقك وتسجل على تطبيق المبادرة عشان تدفع قيمة الوديعة بخصم 70% من قيمة الجمارك اللي كنت هتدفعها لو هتنزل العربية في الظروف العادية.
ولو حسبنا الدولار على 31 جنيه، دوا 10 عربيات متاحين من خلال المبادرة من الأعلى إلى الاقل في قيمة الجمارك اللي هتدفعها.
وهنبدأ بسيارة أودي Q2 للفئة الأساسية موديل 2022، وهيونداي توسان كروس للفئة الأساسية موديل 2023
والاتنين دول هتدفع عليهم حوالي 6770 دولار يعني 210 ألف جنيه مصري تقريبا.
وبعدهم سيارة سوزوكي جيمني الفئة الأساسية موديل 2023، برسوم 5198 دولار أو 161 ألف جنيه مصري تقريبا.
ومتاح كمان سيارة كيا ريو للفئة الأساسية موديل 2023، ورسومها 3895 دولار، يعني 120 ألف جنيه مصري تقريبا
وبعدها سيارة جيب رنجيد للفئة الأساسية موديل 2022، برسوم 3458 دولار أي ما يعادل 107 ألف جنيه مصري تقريبا.وعندك كمان كيا سيراتو الأساسية موديل 2020، 3328 دولار يعني حوالي 103 ألف جنيه.
وكمان سيارة ميتسوبيشي إكليبس كروس للفئة الأساسية موديل 2021، برسوم 3170 دولار يعني 98 ألف جنيه مصري تقريباً.
وعندك برضه سيارة شيري تيجو 7 للفئة الأساسية موديل 2023، وسوبارو XV للفئة الأساسية موديل 2021، برسوم 3017 دولار يعني حوالي 93 ألف جنيه مصري.
واخيرا بقى سيارة إم جي 5 السيدان للفئة الأساسية موديل 2021، برسوم 2810 دولار يعني حوالي 87 ألف جنيه.
ولغاية دلوقتي في 105 آلاف من المصريين بالخارج سجلوا إلكترونيًا للاستفادة من المبادرة، ووصلت حصيلة الدفع إلى 525 مليون دولار، وافرجت الحكومة عن 1000 سيارة مستوردة.
وزي ماقلنا الحكومة خفضت 70 % من قيمة الضريبة الجمركية لكل سيارات المصريين بالخارج غير الخاضعين لمناطق الاتفاقات الجمركية المتبادلة
يعني ببساطة كده، لو معاك إقامة في دول الخليج، تقدر تنزل عربيتك مصر، وكل اللي هتدفعه 30% بس من قيمة الجمارك المطلوبة، في شكل وديعة بالعملة الاجنبية هتحولها من بره على حساب وزارة المالية فى مصر، وتستلمها بعد 5 سنين من البنك بالجنيه المصري.
كمان المبادرة القديمة كانت بتلزمك تدخل العربية لمصر خلال سنة واحدة بس من دفع المبلغ والحصول على الموافقة الاستيرادية.
لكن في التعديلات الجديدة انت معاك 5 سنوات كاملين تنزل فيهم العربية براحتك، يعني لو انت محتاج العربية تقضي بيها مصالحك برة بس في نفس الوقت عاوز تستفيد من المبادرة، تقدر تخلي عربيتك معاك وانت نازل تبقى تجيبها..
والبند ده هيديك الفرصة لو انت مشتري عربية بالتقسيط بانك تدفع الوديعة دلوقتي، ولما تخلص الاقساط اللي عليها تنزلها مصر.
ودلوقتي قوللنا بقى هل تفكروا تقدموا في المبادرة خلال الأيام الباقية؟
