للأسف توجد اخبا مثيرة للقلق من السعودية، والحقيقة ليس السعودية فقط، نحن نتحدث عن منظمة عالمية اسمها اوبك بلس، وهيالمسئولة عن تحديد أسعار النفط في العالم كله.
فياترى إيه قرارهم الجديد اللي رفع أسعار النفط مرة واحدة؟ واحنا في مصر موقفنا إيه؟ وهل معنى كده ان الحكومة هترفع أسعار البنزين تاني؟
بص ياسيدي في مجموعة اسمها أوبك + بتضم أكبر 23 دولة بتصدر النفط على مستوى العالم، زي السعودية والكويت والامارات والجزائر والبحرين وإيران والعراق فنزويلا، وكمان روسيا..
والمهم يعني إن أسعار النفط في الشهر اللي فات سجلت أقل سعر عليها على مدار 18 شهر، وطبعا دول أوبك بلس معحبهاش الكلام وعاوزة تثبت الأسعار عند مستوى معين فيعملوا إيه؟
ايوة بالظبط يخفضوا الإنتاج فالمعروض يقل والسعر يزيد، وفعلا دلوقتي العقود الآجلة للنفط زادت 6 دولار مرة واحدة..
والعقود الآجلة دي هي اتفاق بين طرفين على بيع برميل النفط في المستقبل بسعر متحدد من دلوقتي، تحسبا يعني لأي ظروف ممكن تحصل.
وساعة التنفيذ الطرفين ملزمين بالاستلام والتسلم بناء على السعر المتفق عليه من البداية.
ونرجع تاني لموضوعنا.. الارتفاع ده في أسعار النفط سببه اتفاق اكتر من دولة في مجموعة أوبك بلس زي دول الخليج وروسيا، على تخفيض الإنتاج بأكتر من 1.5 مليون برميل يوميا، والتنفيذ هيبدأ من شهر مايو حتى نهاية 2023، وعشان كده أسعار النفط قفزت لأكتر من 86 دولار.
وبما اننا في الأزمات مدعيين، طبيعي نسأل ده تأثيره إيه علينا؟ عشان كده ركز معايا في اللي جاي:
مصر بتستورد حوالي 100 مليون برميل نفط سنويا، حسب الشرق بلومبرج، وكل دولار زيادة في سعر برميل البترول بيكلف البلد 2.3 مليار جنيه إضافية.
بس خد بالك ده كلام وزير المالية فى 2019، لما كان سعر الدولار حوالي 16 جنيه، فهل الحسبة دلوقتي اتغيرت؟
الايام الجابة هتكشف لينا ده، بس المهم ان احنا عندنا لجنة تسعير تلقائي للمواد البترولية، واللجنة دي بتجتمع كل 3 شهور عشان تحدد أسعار البنزين والسولار والمازوت ، سواء بقى بالرفع أو الخفض أو التثبيت، المهم ان نسبة التغيير في السعر متعديش ال10%..
واخر قرار للجنة كان المفروض يطلع في نهاية ديسمبر 2022 أو في يناير 2023، لكن تم تأجيله لغاية مارس اللي فات.
وساعتها أعلنت عن رفع الأسعار عشان تبقى 8.75 جنيه للتر البنزين 80 ، و 10.25 جنيه للتر البنزين 92 ، و 11.50 جنيه للتر البنزين 95، مع تثبيت سعر السولار.
وعشان تبقى عارف، اللجنة بتاخد قرارها بناء على اكتر من عامل أهمهم: سعر النفط العالمي وسعر الجنيه أمام الدولار.كمان الحكومة محددة سعر برميل النفط ب80 دولار في موازنة السنة دي اللي هتخلص في 30 يونيو 2023.
وفي نفس الوقت صندوق النقد شايف اننا محتاجين نقلل من دعم البنزين، ونركز اكتر مع السولار والكيروسين لأنهم الأكثر استخداما من الفئات البسيطة.
فهل تتوقعوا لجنة التسعير التلقائي هترفع الأسعار في اجتماعها الجاي؟ ولا هتأجل الزيادة مراعاة لظروف الناس ؟
