أصبحنا كل يوم نتابع أسعار الفراخ حتى إن كنا لن نشتري، المهم نعرف السعر وصل إلى كم، ولا كأننا بنشوف سعر الدهب والدولار.والكل الآن يسأل، هل الأسعار ستكمل ارتفاع أم الحكومة هتفرمل التجار؟
طيب لو قولتك ان كيلو الفراخ ب 40 جنيه، والبانيه ب90 هتصدق؟ خليك معلينا عشان تعرف ايه الحكاية.
كيلو الفراخ وصل ب90 جنيه في بعض المناطق بمصر والناس بتحسبها ياترى هتبقى بكام لما توصل لشهر رمضان؟ معقولة هتشتري الفرخة ب200 جنيه؟
أهو في وسط القلق ده، الحكومة بتجهز مفاجأة وهتستورد الاعلاف بنفسها، وده اللي قاله ثروت الزيني ، نائب رئيس الاتحاد العام لمنتجات الدواجن ، لما أكد إن دخول الحكومة للسوق بشرة خير، لأنه هيوازن بين أسعار الأعلاف والدواجن.
وبناء على كميات الأعلاف الكبيرة اللي تم الإفراج عنها خلال الايام اللي فاتت ، الزيني شايف ان اسعار الفراخ هتنزل على شهر رمضان.
واتفق معاه حسين أبوصدام نقيب الفلاحين، اللي شايف إن سعر الدواجن هينخفض إلى 45 جنيه خلال 40 يوم بعد إنتاج دورات جديدة وكمان مع انخفاض القوة الشرائية.
وده لو حصل أسعار كيلو البانيه هتنزل من 180 جنيها إلى حدود 90 إلى 100 جنيه.وعشان تعرف ايه اللي هيحصل بالظبط، هيئة السلع التموينية إدخلت عشان توفر الأعلاف لصغار مربي الدواجن لحماية المنظومة ومنع خروج صغار المربين من السوق.
حركه زي دي هتوفر على صغار المزارعين حوالي 1000 او 2000 جنيه كمان في الطن الواحد مقارنة بالسعر اللي كانوا بيشتروا بيه من كبار مستوردي الاعلاف.
والخبر الحلو هنا ان ممكن باقي التجار لما بيلاقوا اسعار الاعلاف بتنزل هيخفضوا هم كمان، فبالتالي تقل تكلفه الانتاج على المزارعين ويقدر المستهلك يشتري الفراخ والبيض باسعار أقل.
وطبعا انت دلوقتي بتسال طيب ما الحكومه سبق وافرجت عن كميات كبيره ليه ما حصلش انخفاض في الأسعار؟
بص ياسيدي، وزاره الزراعه اكدت ان ازمه الاعلاف انتهت تماما والسوق بقى فيه وفرة من الذره الصفراء والصويا.
وصحيح كان في مخالفات من التجار زي البيع بسعر مبالغ فيه أو حجب السلعة عن المستهلكين لتعطيش السوق ورفع أسعارها، لكن الحكومة خدت كل الإجراءات ضد المخالفين.
وبكده ازمه الاعلاف اتحلت، بس لسه في نقص في المعروض من الفراخ بسبب توقف المزارع وصغار المربين عن الانتاج الفتره اللي فاتت.
ولو تفتكروا أصحاب المزارع كانوا بدأوا يبيعهوا الأمهات أو حتى يتخلصوا من الكتاكيت، عشان يوفروا تمن الاعلاف اللي بتحتاجها كده في ارتفاع أسعارها دلوقتي ومحدش لاقيها كمان.
لكن المتوقع انه مع دوران عجله الانتاج ودخول صغار المربين للسوق من تاني، الانتاج هيبدأ يزيد وترجع الاسعار لطبيعتها.
ودلوقتي بقى شاركونا وقولوا لنا سعر كيلو الفراخ وصل في منطقتكم لكام وهل فعلا كرتونه البيض عدت 100 جنيه؟
