البنك المركزي قرر يرفع أسعار الفائدة 1% في اجتماعه الأخير والذي يعتبر ثاني قرار يحدث بالرفع للفائدة في 2023، لكن ياترى ما توابع هذا القرار وما تأثيره على أسعار الذهب؟ وهل سنسمع عن طرح شهادات جديدة وما توقعات أسعار الدولار في مصر؟
البنك المركزي قرر يرفع أسعار الفايدة وده تقريبا عكس كل توقعات خبراء الاقتصاد وبنوك الاستثمار العالمية والمحلية واللي كانت بتتوقع استمرار سياسة التثبيت الفترة الجاية.
وفعلا قررت اللجنة إنها ترفع سعر الفائدة 1% عشان توصل الفايدة لـ 19.25% على الإيداع، و20.25% على الإقراض، وبكده يكون مجموع قرارات الرفع هي 11% واللي حصلت أقل من سنة ونص بس.
والحقيقة ان قرار رفع الفايدة جه بسبب تأثير زيادة معدلات التضخم في مصر واللي وصل عند مستويات غير مسبوقة، غير كمان إن أمريكا رفع الفايدة 0.25% في اجتماع الفيدرالي الأسبوع اللي فات
وده كان رأي الخبير الاقتصادي هاني جنينة في تصريحاته لـ”مصراوي”، واللي قال إن قرار المركزي برفع الفايدة جه لعدة أسباب منها معدلات التضخم واللي زادت بشكل كبير عشان تسجل 35.7% في المدن وكمان معدل التضخم الأساسي سجل 41% وده حسب أحدث أرقام أعلن عنها الجهاز المركزي للإحصاء.
طيب ياترى إيه تأثير اللي بيحصل ده على أسعار الدولار والجنيه وأسواق الصرف ؟
الخبير هانى جنينة قال إنه بيتوقع يحصل تحريك في سعر الصرف بشكل جزئي وده بالتزامن مع معاد المراجعة التانيه لبرنامج صندوق النقد واللي مفترض هيتم في سبتمبر الجاي.
وقال إن رفع الفايدة اللي كان متوقع يحصل في النص التاني من 2023 هو 2% وإنه كان متوقع يحصل بشكل مفاجئ لكن البنك المركزي قرر يعمل الرفع ده بشكل تدريجي وده عشان مايضغطتش على الموازنة العامة للدولة.
تفتكروا بقى إيه تأثير اللي بيحصل ده على أسعار الدهب؟
الدكتور ناجي فرج مستشار وزير التموين لشؤون الدهب قال إن قرار البنك المركزي برفع أسعار الفايدة هيأثر بشكل سلبي على أسعار الذهب خاصة مع تراجع الأسعار العالمية للمعدن الأصفر.
وعشان كده في تصريحاته لـ موقع بوابة أخبار اليوم توقع انخفاض أسعار الدهب علطول وقال إنه مع بداية التعاملات الجديدة هينزل سعر الجرام حوالي 10 جنيه.
طيب هل ممكن نسمع الفترة الجاية عن طرح شهادات ادخار جديدة؟
الخبير الاقتصادي هاني جنينة توقع إنه يتم طرح شهادات ادخارية في البنوك خلال الفترة الجاية وده بعائد سنوي أعلى من اللي موجودة دلوقتي يوصل لـ22 أو 23%.
وإن طرح الشهادات دي هيكون بهدف احتواء الضغوط التضخمية المتوقع إنها تحصل خلال الفترة الجاية خاصة مع توقعات رفع أسعار الوقود والكهرباء وتحريك سعر الصرف خلال الشهور الجاية.
نيجي لأنهم سؤال وهو تأثير القرار على الأسعار؟
لجنة السياسة النقدية قالت أنه من المتوقع أنه توصل معدلات التضخم لـ ذروتها في النص الثاني من 2023 لكن متقلقوش وده لأنها أكدت إنها هترجع تاني للانخفاض وده عشان توصل لمعدلات التضخم المستهدفة.
وعشان تفهم أكتر فـ البنك المركزي بيستهدف إنه يوصل بمعدلات التضخم لـ 7% والرقم ده متوقع يكون زائد أو ناقص 2 % في الربع الرابع من 2024.
وإنه يوصل لمعدل تضخم 5% والرقم ده متوقع يكون زائد أو ناقص 2% في الربع الرابع من 2026. قولنا رأيك في قرار المركزي وتوقعاتك للتضخم؟
