لا يوجد أي بيت مصري يخلى من البصل و هذا لأنه مكون أساسي في اي طبخة لكن للأسف اسعاره الفترة الماضية وصلت لأكثر من ١٥ جنيه؟
لكن السؤال ايه سبب ارتفاعه؟ وإيه حكاية القرية اللي مش بتشتغل غير في البصل ؟ واسعار البصل مصيرها إيه الايام الجاية؟
البصل وأسعاره الفترة الأخيرة الكل بقى مكنش عنده سيرة غيرها وده لأن كل البيوت متقدرش تستغنى عنه مهما وصل سعره،بس ياترا أنت فكرت في يوم البصل ده بيتجاب منين وبيوصلك إزاي أنا بقي هحكيلك عن أشهر قرية في زراعة البصل.
القرية دي أسمها ذات الكوم في منشأة القناطر في الجيزة ودي بتعتبر أشهر قرية على مستوى الجمهورية في إنتاج البصل وده بحسب موقع مصراوي.
معظم سكان القرية دي واللي عددهم 20 ألف بيعتمدوا على زراعة البصل كمصدر رزق ليهم واللي كان ارتفاع البصل خلال الفترة الأخيرة بشكل غير مسبوق ساعدهم في زيادة دخلهم.
وبحسب مصراوي يعتبر معظم أهالي القرية حتى من الستات مش بس الرجالة بيشتغلوا في زراعة البصل من أول ما يتزرع لحد ما يتحصد.
وعلى فكرة قرية ذات الكوم في ناس بتسميها بورصة البصل، لأن هي اللي بتحدد سعر البصل في السوق وده بحسب مسعود خليل واحد من فلاحين القرية للأهرام.
سبب ارتفاع سعر البصل
ولما واحد من أهالي القرية أتسأل عن سبب ارتفاع سعر البصل؟ رد وقال إن تكلفة حصاده بتعدي 1500 جنيه، والسنة دي الكيلو بيخرج بس من الأرض بـ 8 جنيه ده غير النقل وتكلفته لحد ما يروح السوق كل ده سبب في ارتفاع سعره.
ده قال كمان إن تكلفة زراعة فدان البصل حوالي 70 ألف جنيه وده بسبب ارتفاع مستلزمات إنتاج زراعته لأن الفدان بيحتاج أسمدة بـ 15 ألف و شتلات بـ 5 ألف وبـ 7 ألف جنيه خراطيم اللي كانت السنة اللي فاتت بـ 5 ألف بس، ده بالإضافة لإيجار الأراضي اللي وصل لـ 17 ألف جنيه في الفدان بعد ما كانت بتتأجر زمان بـ 500 جنيه بس.
وكمل كلامه إن خساير المزارعين من البصل السنة اللي فاتت خلتهم يقللوا مساحة زراعته السنة دي عشان كده سعر الكيلو وصل لـ 15 جنيه في السوق.
ولما أتسأل عن حجم خسايرهم السنة اللي فاتت؟رد وقال إن حجم الخساير كان كبير جدا السنة اللي فاتت بسبب انخفاض سعر المحصول اللي كان واصل لجنيه واحد للكيلو وبسبب كده كتير من المزارعين اتعرضوا لمشاكل كبيرة.
وده لأنهم استلفوا فلوس عشان يحصدوا المحصول اللي حتى مغطاش تمن تكلفته ومجبش حق الأنفار ولحد دلوقتي في ناس مديونة من السنة اللي فاتت.
وبحسب محمود عبد الفتاح واحد من مزارعين محافظة الغربية اللي قال إن أجور العمال اللي ارتفعت بشكل كبير جدا ودي واحد من أهم المشاكل اللي بتواجهنا أثناء الزراعة، وده لأن الفدان بيحتاج لـ 5 أنفار خلال الزراعة أما في موسم الحصاد العدد بيرتفع لـ 10 عمال
أما حسين أبو صدام نقيب الفلاحين قال في تصريحاته للمصري اليوم إن سبب ارتفاع أسعار البصل لـ 14 و 16 جنيه في السوق هو عزوف المزارعين عن زراعة البصل الموسم الحالي، وده بسبب خسارتهم الكبيرة خلال الموسم اللي فات وده سبب أساسي في ارتفاعه السنه دي.
وقال كمان إن بسبب تجاهل خساير المزارعين الموسم اللي فات وعدم تعويضهم ده خلاهم يقللوا مساحة البصل المزروعة السنة دي.
ده بالإضافة لغياب منظومة الزراعة ودده خلى الفلاحين يزرعوا اللي هما عايزينه من غير أي إرشادات وده سبب تاني في ارتفاع أسعار معظم السلع.
بس خد بالك انتاج قرية ذات الكوم مش للمصريين بس، ده كمان بيصدروه للخارج وموجود في أسواق كتير في دول بره مصر زي السعودية وروسيا وهولندا وإسبانيا.
وبناءًا على تقرير من الحجر الزراعي المصري مصر صدرت 189 ألف طن بصل من بداية 2023 وعشان كده أحتل المرتبة الرابعة بين صادراتنا المصرية الزراعية اللي سجلت ارتفاع بنحو 10% السنة دي.
ودلوقتي قولنا بتشتري كيلو البصل بكام؟
