دولارات بالمليارات والذهب في البنك المركزي سيسجل أرقام قياسية، بشرى جديدة لمصر والمصريين في 2023 والسر في هذا الكنز الذي سنكشف تفاصيله من خلال التقرير التالي:
وسط اخبار ارتفاع الأسعار كل يوم والتاني، أخيرا خبر حلو: تشغيل منجم ايقات للذهب.المنجم ده اكتشافه كان 2020 بأياد مصرية بالكامل، عشان شركة إيقات تبقى تالت مشغل لمنجم ذهب بمصر، لأن عندنا شركتين تانيين: شركة السكري ودي مشتركة بين هيئة الثروة المعدنية وشركة سنتامين الأسترالية.
وكمان شركة حمش ودي مشتركة بين هيئة الثروة المعدنية مع ماتز هولدنج القبرصية.أما بقى إيقات لمناجم الذهب فهي شركة مشتركة بين هيئة الثروة المعدنية وشلاتين للتعدين المملوكة للدولة بنسبة 100%.
والمميز في منجم ايقات هو حجم احتياطي الدهب فيه واللي بيعدي مليون أوقية، وقدرة على انتاج 200 كيلو دهب في الشهر.
وهنا بقى ييجي السؤال المهم احنا هنستفيد إيه؟ناجي فرج مستشار وزير التمرين لشؤون صناعة الدهب، أكد إن التنقيب عن المعدن النفيس واجب قومي ؛ لان الدهب هو العملة الوحيدة المعتمدة عالميًا وتقدر تقول انها زي العملة الصعبة كده .
و اقتصاديا.. زيادة احتياطي اي دولة من الدهب بيعزز من قوة عملتها أمام العملات التانية، وهتلاقي ان أمريكا صاحبك أكبر احتياطي دهب في العالم.
وعشان كده ، هتلاقي البنك المركزي في مصر حريص على زيادة الاختياطي من المعدن الأصفر، وده اللي حصل فعلا بعد زيادته من 75 طن، إلى 125 طن مؤخرا.
ضيف على كده كمان، أن الدهب المستخرج هيبقى مصدر للدولار لو تم تصديره، خصوصا ان مصر بتخطط لإنشاء مدينة متكاملة للصناعات الدهب.
وهنا ممكن تسأل: هو ده هيبقى اخر اكتشاف في مصر ولا في اكتشافات تانية في المستقبل؟
اطمن خالص، مصر فيها اكتر من 100 منطقة فيهم دهب مستني اللي يطلعه، زي منطقة العتود في الصحراء الشرقية ودي فيها احتياطات كويسة جدا بنسب تركيز 16.3 دهب في كل طن.
كمان عندك مناطق المثلث الذهبي وحمش ووادي العلاقي والبرامية، وضيف عليهم منطقة حلاليب وشلاتين واللي فيها كميات كبيرة من الدهب لكن التنقيب هناك قايم على جهود عشوائيه غير منظمة.
عشان كده، مهم جدا استقدام شركات مصرية لاستخراج الدهب من المناطق دي وبكده الكل هيكسب الدولة والمستثمرين كمان.
أما بقى لو بتسأل عن تأثير تشغيل منجم ايقات على سعر الدهب في مصر، فلازم تحط في اعتبارك ان الدهب سلعة عالمية، وسعرها جوة مصر بيتحدد على اساس حاجتين: الأولى هي سعر المعدن النفيس في البورصة العالمية، والتانية سعر الجنيه أمام العملات المختلفة.
يعني تسعير الدهب مش متوقف على الوضع جوة مصر بس، لكن بشكل عام مستشار وزير التموين قال التوقعات في 2023 بتقول ان الدهب رايح في سكة الصعود وممكن يوصل إلى 2500 دولار للأوقية، وطبعا ده لو حصل سعر الجرام في مصر هيزيد.
فقولنا بقى هل لسة شايف الدهب هو أفضل استثمار في الوقت الحالي؟ ولا غيرت رأيك؟
