معروف من زمان.. العيد في مصر يعني افراح، ونحن في مصر نعتبره موسم سنوي الإقبال فيه على شراء الدهب يزيد.
عشان كده، العرسان اكتر ناس قلقانة من سعر الدهب الأيام الجاية، وحتى لو مكنتش علي وش جواز، هل الأفضل تشتري دهب ولا تستنى؟ وإيه نوع الدهب اللي هيخسرك فلوسك؟
خليك معانا عشان تعرف التجار شايفين ازاي، وكمان هنقولك بيحسبوا الدولار على كام
ارتفاع جنوني في اسعار الدهب الأيام اللي فاتت لدرجة ان الجرام من عيار 21 سعره عدى 2250 جنيه، فهل الارتفاع ده مستمر في العيد؟
أمير رزق، خبير المشغولات الذهبية، اتكلم عن توقعات بارتفاع سعر الذهب، خاصة مع اقتراب عيد الفطر 2023، والسبب في كده انتعاش حركة السوق بعد تراجع عمليات البيع والشراء الفترة اللي فاتت.
بس عمرو المغربي، عضو شعبة الدهب، قال إنه مش لازم الطلب على الدهب من المقبلين على الزواج يزيد في فترة الأعياد.
كمان قال إن توقع أسعار الدهب خلال فترة الأعياد صعب، لأن ممكن يحصل فيها تذبذب بسبب الإجازات وإغلاق محلات الصاغة.
وكده كده أمير رزق قال إنه هيحصل تغيرات في سعر الدهب عالميا، وده ممكن يأثر على السوق المحلى، عشان كده سعر الدهب في مصر ممكن يتغير بين ساعة والتانية.
بس المشكلة دلوقتي إن الشاب اللي عاوز يتجوز بعادات زمان كده هيضطر يدفع مبلغ كبير، مش سهل على اي حد يجمعه.
فيا ترى ايه الحل ما يتجوزوش؟
لا يا سيدي تجار الصاغة جابولك الحل: دبله 1 جرام ايوه 1 جرام، وزنها بسيط وسعرها على قد الايد.كمان في محلات أعلنت قبل كده عن طرح مشغولات شعبيه باسعار رخيصه من عيار 21 أو 18 بس وزنها قليل
.
وطبعا كل حاجه فيها الايجابي والسلبي، يعني صحيح انت هتدفع مبلغ قليل في الشبكه بس لازم تخلي بالك من تحذير هاني ميلاد رئيس شعبه الدهب، لانه قال إن الدبله الواحد جرام رفيعه جدا وسهله الكسر بسبب وزنها الخفيف.
وفي الاخر القرار ليك بس خلي بالك، مع ارتفاع الأسعار الغش بيكتر، وشعبة الدهب حذرت من اعلانات لبيع الدهب بسعر 30 جنيه للمصنعية في الجرام الواحد..
واللي أكدت الشعبة انك استحالة تلاقي دهب مضمون وورقه سليم بالسعر ده، لأن قيمة المصنعية في السوق أغلى من كده بكتير.
وعشان تفهم سوق الذهب في مصر بيتحرك ازاي لازم تعرف سعره بيتحدد على اساس ايه؟..
وحسب نادي نجيب سكرتير الشعبه السابق، سعر الدهب في مصر مبني على 3 حاجات: السعر في البورصه العالميه, وسعر الدولار في السوق السودة، وحجم العرض والطلب.
والمفاجاه الكبيره بقى ان تجار الذهب مسعرين الدولار على 40 جنيه، وطبعا ده خلي سعر المعدن الأصفر يضرب في السما.
بس رغم كده، نجيب نصح المقبلين على الزواج بشراء الشبكة فورا لان الاسعار دلوقتي مناسبة.
انتوا بقي اخر رقم سمعتوه لقيمة الشبكة كان كام؟ وهل فكرتوا تلغوها خالص بسبب جنون الدهب؟شاركونا في التعليقات
