ارتفاع جنوني في سعر الذهب في مصر، والمعدن الأصفر في الساعات الماضية يسجل أسعار قياسية فنجد ان سعر الجرام الواحد يتخطىي 2200 جنيه! فياترى ماذا يحدث في سوق الذهب وما التوقعات للأسعار الفترة القادمة؟
الدهب عالميا في ارتفاع، وسعره مستقر حاليا فوق ال 2000 دولار للاونصة، وده لسببين رئيسيين:
الاول هو قرار منظمه اوبك بلس المفاحئ بخفض انتاجها من النفط، والتاني هو تراجع مؤشر الدولار عالميا، وخصوصا ان في توقعات بهبوطه 15% خلال الفتره الجايه.والسببين دول بيزودوا مخاوف المستثمرين من الدخول في مرحلة تباطؤ اقتصادي، وبيقللوا مكاسب الاستثمار في الدولار.
وده بيزود اقبال المستثمرين على شراء الدهب كملاذ آمن في وقت الأزمات فسعره بيزيد، وهو ده اللي حصل اليومين اللي فاتوا.
وطبعا ده بينعكس على سعر الدهب في مصر واللي بيتحدد حسب 3 حاجات: السعر في البورصة العالمية، وسعر جنيه امام الدولار، وحجم العرض والطلب.
عشان كده شفنا الدهب في الساعات الاخيرة بيسجل رقم قياسي ويعدي ال2200 جنيه للجرام عيار 21 الأكثر مبيعا في مصر
والسؤال بقى دلوقتي هل الارتفاع في سعر الدهب مستمر ولا هيحصل لفتره مؤقتة؟ الاجابه على السؤال ده مرهونه بحدث مهم جدا هيحصل خلال الساعات الجايه، وهو الإعلان عن معدلات التضخم في أمريكا.
فلو الارقام جت متوافقة مع التوقعات أو اقل منها احتمال كبير البنك الفيدرالي الامريكي يثبت الفايدة، وطبعا ده هيكون سبب لارتفاع أسعار المعدن الأصفر.
والعكس صحيح لو الارقام اعلى من المتوقع ممكن البنك الفيدرالي يستمر في رفع الفايدة، وده بيقلل من سعر الدهب.
ولغاية دلوقتي توقعات الاجتماعي الفيدرالي الأمريكي الجاي مابين تثبيت سعر الفايدة أو رفعها 0.25%.
بس خد بالك في الايام اللي فاتت، صدر تقرير بيانات الوظائف الأمريكية، ومن غير الدخول في تفاصيل كتير، الأرقام كشفت عن زيادة في معدل الوظائف الأمريكية خلال شهر مارس وده بيزود فرص رفع الفيدرالي الأمريكي لسعر الفايدة في اجتماعه الجاي في شهر مايو.
وطبعا اهم سؤال دلوقتي كلنا بنفكر فيه: ده الوقت المناسب للشراء ولا البيع؟ناجي فرج، مستشار وزير التموين لشؤون الدهب، سبق ونصح الناس بعدم التسرع في شراء الدهب وانتظار انخفاض أسعاره.
لكن برضه لازم تعرف ان توقعات المؤسسات العالمية بتقول ان الدهب هيكون الحصان الرابح في 2023 عموما.
بس أمير رزق خبير المشغولات الذهبية شايف إن جرام الدهب الواحد هيزيد 1000 جنيه في شهر سبتمبر الجاي، مع إقبال المستثمرين على شرائه لتحقيق أفضل الأرباح، وفي الاخر طبعا القرار ليك.
وعموما لو خدت القرار بالشراء يبقى الافضل تشتري سبايك أو جنيهات دهب، لأن سعر المصنعية عليها أقل من سعر المصنعية على المشغولات الذهبية العادية.
ولو مش لاقي سبايك، مكن تفكر في الدهب المستعمل أو الكسر، فقولنا بقى انت هتفضل تشتري دلوقتي ولا تستنى شوية؟
