تريد أن تشتري الشهاده الجديده بفائده 25% وتستفيد باعلى عائد في مصر لكن لا تمتلك أموال؟هل تفكر في الحصول على قرض ومن عائد الشهادة تدفع قيمة فائدة القرض وتستفيد بالفرق؟ وهل هذا سيكون حل مناسب أم لا؟ وهل سيكون حل مناسب إن كنت قد ربطت الشهادة بسعر فائدة قديم وستحصل على القرض بضمان الشهادة؟
يجب أن تعرف أن الأمر ليس بهذه السهولة وأن البنوك تعرف كل هذه الأمور واتخذت قرارات جديدة يجب أن تتعرف عليها قبل ان تفكر في الامر، وفيما يلي سنوضح كل هذه القرارات فتابعونا؟
كلنا تابعنا خلال الساعات الاخيرة طرح البنك الأهلي وبنك مصر للشهادات الجديدة بفايدة 25% ، وطبعا دي نسبة كبيرة جدا لأول مرة تحصل في مصر.
عشان كده كتير مننا بيدور ازاي يشتري الشهادة الجديدة، واكتر ناس محتارة هما الناس اللي سبق واشتروا شهادات الادخار القديمة بفايدة أقل زي
16 و 17.25%.
وبما ان كسر الشهادة هيكلفهم كتير، البعض بدا يفكر انه ياخد قرض بضمان الشهادة القديمة عشان يشتري الشهادة الجديدة، بس البنك المركزي خد باله من الحركة دي.
وحسب مصادر مصرفية البنوك العاملة في مصر، غير البنك الأهلي وبنك مصر، جالها تعليمات بعدم منح قروض إلى العملاء بضمان شهادات الادخار الموجودة عندهم في البنوك.
طيب إيه المانع طالما العميل هيسدد القرض؟
المصادر قالت إن هدف بنك مصر والبنك الأهلي من إصدار شهادات مرتفعة العائد بـ 25% هو امتصاص السيولة الموجودة خارج البنوك، لكن لو اتفتح الباب أمام القروض من النوع ده يبقى الشهادة مالهاش لزمة.
عشان كده، عشان البنك يوافق على اي قرض لازم العميل يقدم مستندات توضح سبب طلبه للقرض، وطبعا غير مسموح الإقراض لغرض شراء شهادات الادخار.
ومش بس كده، في اخبار متداولة بأن البنوك جالها تعليمات برفع الفائدة على الاقتراض بضمان الشهادات بنسبة 7% فوق سعر الاقراض لدى المركزي والمعروف بسعر الكوريدور.
طيب يعني ايه الكلام المعقد ده؟
ببساطة كده لو انت رابط شهادة في البنك واحتجت فلوس ورحت تقدم على طلب قرض بضمان الشهادة.
البنك حسب النظام القديم كان بيحسب لك فايده القرض على اساس نسبه الفابده اللي بتاخذها على الشهاده وبزيادة ما بين 2 إلى 3%.
يعني لو انت عندك شهاده بفائده 16% القرض بتاعك هتبقى فائدته ما بين 18 الى 19% لكن دلوقت بقى وحسب النظام الجديد الفائده على القرض هتتحسب 7% زياده على سعر الكوريدور في البنك المركزي زي ماقلنا
َوحاليا سعر الكوريدور هو 17.25% يعني اي قرض دلوقتي بضمان الشهاده نسبه الفائده عليه 24.5%، في حين ان الشهادات الجديده بتقدم لك عائد 25% سنويا يعني المكسب مش مستاهل.
أما بقى لو انت معاك سيولة وقررت خلاص تشتري الشهادة الجديدة، فلازم تعرف ان الفرصة محدودة، لأن محمد الاتربي رئيس بنك مصر أكد إن الشهادة استثنائية وتوقع وقف طرحها بعد 3 أسابيع.
وفي النهايه لازم نقولك ان مفيش اعلان رسمي عن التعليمات الجديدة، فهل لسه بتفكر تاخذ خطوه القرض عشان تشتري الشهاده الجديده؟ ولو سبق وحاولت قوللنا البنك عمل معك إيه؟
