ارتفعت أسعار الخبز والمكرونة خلال الفترة الماضية بشكل كبير جدا، وبدأنا نرى مشهد طوابير المواطنين على الفران مرة أخرى، فهل سينخفض سعر الخبر بعد تراجع سعر الدقيق بعد المجهود الذي بذلته الدولة للإفراج عن البضائع في الموانيء المصرية. سنكشف لكم مفاجأة بخصوص أسعار الدقيق الفترة القادمة.
حالة من الاحباط بيعيشها المواطنين في مصر بعد موجة ارتفاعات للأسعار متتالية، واللي اتسبب فيها التذبذب اللي حصل في سوق الصرف بعد ما ارتفع سعر الدولار أمام الجنيه بشكل كبير، وده طبعًا ساعد على زيادة أسعار معظم السلع داخل الأسوق المصرية، وبقت الناس تضرب كف على كف وتسأل يا ترى امتى الأسعار دي هتنزل؟
في مفاجأة هتفرح كل المصريين، التجار والمستوردين في الغرفة التجارية المصرية أكدوا إننا هنشوف تراجع قريب جدا في أسعار الدقيق والدرة، وده بسبب الإفراجات الكبيرة عن السلع الاستراتيجية في المواني، خاصة إن في كمية ضخمة جدا من القمح هتيجي يوم 16 يناير .
لكن خلي بالكم التجار بينصحوكم تشتروا على قد حاجتهم ، وبلاش تخزين عشان الأزمة متكررش مرة تانية.
وده لأنه من وجهة نظرهم إن اللي بيحصل إن المواطنين بمجرد ما بيعرفوا إن في سلعة ممكن يكون فيها نقص بتزيد عندهم حالة الخوف والقلق من إنهم ممكن ميلاقوهاش بعد كده وبيبدأوا يشتروا منها بكميات كبيرة عشان يخزونها.
وده طبعًا بيخلي المعروض يقل زي ما حصل مع سلعة الدقيق وساعد في رفع أسعاره وده لأن سياسة الشراء بدون الحاجة بتأدي لوجود نقص في معروض السلع وارتفاع اسعاره.
عشان كده لازم كل مواطن يشتري على قد حاجة اسرته، خاصة وإن الأزمة خلاص هتنفرج قريب جدا وده بعد ما وجهت الحكومة بالإفراج عن البضائع والسلع من الموانيء.
هل ينخفض سعر الدقيق؟
لازم تعرف إن أسعار الدقيق بتختلف حسب جودة المطاحن وطرق التعبئة والتغليف، وبيكون سعر طن الدقيق ما بين 14 ألف و16 ألف جنيه، وأشهر الأصناف الموجودة في مصر هو الدقيق الفاخر وبيختلف منشأه مابين الروسي والأوكراني والأسترالي، وطبعًا في أسماء تجارية كتيرة بتبيعه في السوق، وممكن تشتريه متعبي أو سايب؟
وحسب كلام مسؤلي شعبة المخابز، فـ الفترة الأخيرة شوفنا تقلبات ملحوظة في اسعار الدقيق، بس الأكيد إن الأسابيع الجاية هنشوف استقرارا في أسعار الدقيق، خاصة مع ضخ المزيد من الكميات الجديد اللي تعاقدت عليها الدولة الفترة الأخيرة
وده لأن الدولة دايما بتتدخل عشان تقدم السلع الاستراتيجية بأسعار مدعمة للمخابز، عشان تقدر تنتج 300 مليون رغيف عيش يوميا بسعر 5 قروش للمواطنين.
قولنا بتشتري كيلو الدقيق بكام ومن أنهي محافظة؟
