وزارة التموين اعلنت من فترة ان اسعار السلع على بطاقة التموين سترتفع، بعدها انتشر الكلام ان الدعم سيلغي و يتحول لنقدي.. هذا الكلام صحيحأم إشاعة؟ تابعونا لمعرفة التفاصيل:
كل فترة دايما كان بينتشر اشاعات ان الدعم العيني للسلع هيتلغي و هيتحول لنقدي و دايما الحكومة كانت بتنفي الاشاعة دي.
لكن الفترة الاخيرة لما وزير التموين اعلن عن ارتفاع اسعار السلع على بطاقات التموين، ده خلى الناس تشك انه هيجي اليوم و يتم الغاء الدعم بشكل كامل او انه هيتحول لفلوس.
وبدأنا نشوف كلام على السوشيال ميديا بإن الدعم العيني للسلع هيتلغي و هيتحول لفلوس والناس بدأت تقلق.
لكن المركز الاعلامي لوزارة التموين طلع في بيان وقال انه ده كلام مش صحيح وهنستمر في صرف الدعم العيني للسلع التموينية لأصحاب بطاقات التموين ومش هنغير المنظومة اللي بقالها سنين.
كمان قال ان المستفيد من الدعم ليه مطلق الحرية يختار نوع السلعة اللي عايز يصرفها كل شهر لكن بالقيمة المخصصة لكل فرد.
وطلب المركز الاعلامي من المواطنين انهم ميصدقوش اي اشاعة بتتقال ولازم يتأكدوا من المعلومة من المصدر نفسه.
وبحسب تصريحات ابراهيم عشماوي، في برنامج الحكاية على قناة ام بي سي مصر، قال ان مفيش اي نيه لتحويل الدعم العيني النقدي، وان بطاقة التموين مش هيكون فيها اي تغيير و دعم الفرد لسه 50 جنيه.
كمان قال ان رغيف العيش المدعم برضو ب 5 قروش وسعره مش هيتغير.
وفي تصريحات صحفية لابراهيم عشماوي، قال انه اللي بيتقال على ألسنة ناس كتير ان وزارة التموين بتدرس تحويل الدعم العيني لنقدي الفترة الجاية ده كلام مش صحيح.
لكن اللي حصل ان في دراسات قديمة لتحويل الدعم النقدي بس ده زمان مش دلوقتي، و الوزارة مش بتدرس تحويل الدعم في الفترة الحالية.
والوزارة لسه بتوفر اكترمن 31 سلعة للمواطنين علي بطاقات التموين، وكمان الدولة رفعت مخصصات الدعم لـ 528 مليار جنيه وده بيمثل تقريبا تلت موازنة الدولة.
وطبعا دي مش اول مرة يطلع كلام عن تحويل الدعم العيني إلى نقدي، الاشاعة دي انتشرت كتير قبل كده ووزير التموين رد عليها بنفسه في اكتوبر 2022.
وقال في رده لبرنامج مساء دي ام سي، ان الكلام ده مش منطقي في الوقت د خصوصا ان فيه أزمة اقتصادية نقوم نلغي الدعم ونحوله إلى نقدي؟
كمان قال ان ده وقت اشاعات وناس كتير عاوزة الدولة تقع، وطبعا كان في ناس بتقول ان الغاء الدعم هيطبق برضو على رغيف العيش
لكن الوزير رد وقال مش منطقي ان واحد رايح يجيب العيش الصبح ميلاقهوش، رغيف العيش لسه مدعم ولسه ب 5 قروش.
