أصحاب شهادات الـ18% بدأوا يصرفوا العائد بعد سنة من طرحها بقيمة 750 مليار جنيه، بس الأكيد إنك كنت من الناس اللي منتظره طرح شهادات ادخار الفترة القادمة ستلاحظ حركة غريبة تعملها معظم البنوك هذه الفترة، وهي طرح شهادات بفائدة مختلفة.
ياترى البنوك ناوية على إيه وهل كده هيتم طرح شهادات بفايدة عالية توصل لـ30% خليك معانا في التقريرده واحنا نقولك كل التفاصيل:
الأيام دي المنافسة في البنوك على ودنها وشوفنا بنوك خاصة طرحت شهادات بفايدة كبيرة ووصل الأمر إن في بنوك خاصة طرحت شهادات بـ 18 و18.25%، وكمان بنوك حكومية طرحت شهادات ادخار بفايدة 22% زي بنك ناصر الإجتماعي، وده كله عشان يجذبوا عملا جداد الفترة دي ويقدروا يلموا السيولة اللي موجودة في السوق واللي هتزيد بسبب أصحاب شهادات الـ18% واللي خلاص بدأو بالفعل يصرفوا مستحقاتهم الأيام دي واللي هيستمروا فـ الصرف لحد شهر يونيو الجاي .
طيب ليه البنوك الخاصة بدأت طرحت شهادات بفايدة كبيرة وليه بنك مصر والأهلي لحد دلوقتي مأعلنوش عن طرح شهادات جديدة ؟
بص ياسيدي البنوك الخاصة بتحاول تطرح شهادات بفايدة مرتفعه عشان تحافظ على فلوس مودعيها في المقام الأول وكمان عشان تجذب عملا جداد ليها وتسحب السيولة من السوق
وده بيساعد البنك المركزي لمحاربة التضخم واللي وصل لـ 40.3% خلال فبراير اللي فات وده كان أعلى مستوى سجلة المؤشر من وقت إطلاقه عام 2009، وده معناه إن المعدل الشهري زاد بنسبة 8.1% انتوا متخيلين !طيب إيه علاقة طرح شهادات بفايدة مرتفعه بمحاربة التضخم؟
هقولك طبيعي المستثمرين والأفراد الفايدة الكبيرة تجذبهم وبدل ما تفضل الفلوس تزيد معاهم يبدأو يدخروها في شهادات أو أوعية ادخارية ممثالة وده بيساعد في تقليل السيولة وتراجع القوة الشرائية وطبعا ده لما بيحصل الأسعار بتبدأ تقل والتضخم يتراجع وده هدف الحكومة والبنك المركزي.
وكمان البنوك الخاصة عندها تخوف من الشهادات اللي مفترض هيطرحها البنك الأهلي ومصر الفترة الجاية تسحب البساط من تحت رجليهم زي ما بيقولوا والعملا يبدأوا يتجهوا للبنوك الحكومية وده طبعا هما مش عاوزينه.
وعشان كده بيطرحوا شهادات هما كمان بفايدة عالية تقدر تجذب العملا دول وبكدة تسبق وتحافظ على فلوس مودعيها.
وخبراء الاقتصاد توقعوا إننا نسمع عن طرح شهادات الادخار بعائد 30% قريب جدا وعشان كدة توقعوا في أي وقت الإعلان عنها.
طيب تفتكروا الشهادات هو أفضل حل لتقليل التضخم والأسعار؟سهر الدماطي، الخبيرة المصرفية، ونائب رئيس بنك مصر السابق، قالت: إنه مفيش جدوى كبيرة من طرح شهادات جديدة بعائد مرتفع في الوقت الحالي.
وإن الشهادات مرتفعة العائد مكلفة جدا للبنوك، و شهادات الـ 25% كانت أكتر من 60% منها محولة من شهادات الـ18%؛ وده لأن في عملا كتير كسروا شهادات الـ 18% واشتروا بيها شهادات الـ 25% عشان يستفادو من فَرق السعر الـ7%.
وقالت أن الغرض من طرح الشهادات بعائد مرتفع هو سحب السيولة من المواطنين في المقام الأول، و جذب حائزي الدولارات لشراء الشهادات وبيع الدولارات دي للبنوك.
دلوقتي قولنا من وجهة نظرك هل شايف إن طرح شهادات الادخار هو أفضل حل لسحب السيولة من السوق وتقليل التضخم ؟
