رجل الأعمال الشهير نجيب ساويرس قرر بشكل مفاجىء إن يقتحم عالم البنوك في مصر من أوسع أبوابه و يأسس بنك خاص في مصر اسمه بنك ساويرس.
فهل أي حد يقدر يفتح بنك في مصر؟ وياترى نجيب ساويرس هيعمل ايه بالبنك وايه الجديد اللي ممكن يقدمه لعملاء البنوك؟
رجل الأعمال المصري نجيب ساويرس كشف عن نيته إنه يتقدم للبنك المركزي المصري عشان يحصل على رخصة بنك رقمي في مصر.
وده بعد إعلان البنك المركزي قبل شهرين عن الضوابط والقواعد المنظمة للحصول على تراخيص البنوك الرقمية في مصر.
وف مداخلة تلفزيونية اتكلم ساويرس وقال ان “البنوك الرقمية بقت دلوقتي منافس قوي للبنوك التقليدية، وده لأنها بتساعد العملا يعملوا كل العمليات المالية والبنكية عن طريق الهاتف ومش بيكونوا مضطرين يضربوا مشوار ويروحوا البنك
ساويرس كمان قال ان التحويلات والسحب والدفع وكل حاجة بتكون بشكل إلكتروني وعدد الموظفين في البنك بيكون قليل جدا.
ده المفاجاة كمان ان عملية الاقتراض بتكون “أونلاين” و أسرع بكثير من العملية التقليدية، و تكلفة الموافقة على القرض بتكون قليلة، وساويرس قال أن الفكرة ناجحة في أمريكا.
فهل تفتكروا بقا خطوة ساويرس هتشجع رجال أعمال تانييين يعملوا بنوك يعني ممكن نشوف بنك أبو هشيمة وبنك السويدي وبنك ابو العينين؟
شوف ياسيدي من فترة البنك المركزي المصري أصدر اشتراطات الترخيص للبنوك الرقمية ومن أهمها أنه ميقلش رأس المال المصدر والمدفوع عن ٢ مليار جنيه في حالة ممارسة كافة أعمال البنوك، باستثناء تمويل الشركات الكبرى.
كمان البنك يقدر يمول الشركات دي بشرط زيادة رأس المال ل 4 مليار جنيه، وكمان لازم يكون المساهم الأكبر مؤسسة مالية ذات سابقة أعمال في أنشطة مماثلة بنسبة لا تقل عن 30% من إجمالي قيمة رأس المال.
وبمجرد اعلان المركزي عن الخطوة الجديدة دي اعلن رجل الأعمال المصري، نجيب ساويرس، أنه هيتقدم بطلب الترخيص لبنك رقمي في مصر، بعد اعتماد تراخيصها لأول مرة في البلاد.
طيب هل ساويرس هيقدر يعمل بنك فعلا؟
ومن الشروط السابقة تقدر تقول إن بنك ساويرس الجديد هيقدم خدمات مصرفية بما فيها تمويل الشركات لأنه مش هيغلب في 4 مليار جنيه يحطها في راس البنك ودا ممكن يشجع رجال أعمال كتير عندهم المقدرة المالية على إنشاء بنوك رقمية خاصة، وأكيد ساويرس هيقدم خدمات مصرفية بشكل عالمي تخليه يجذب عملاء كتير في أقرب فرصة.
وفي تصريحات سابقة قال ساويرس كان من ضمن أحلامه القديمة أنه ينشىء بنك خاص وكان ساعتها عايز يعمل بنك عادي زي البنوك الخاصة في مصر ومحققش حلمه ساعتها لغاية ما طلع قرار المركزي وبكده هيقدر ساويرس إنه يأسس أول بنك رقمي من نوعه في مصر، في ظل تأكيده مراراً على رغبته في الحصول على رخصة بنك تقليدي قبل كده.
وفي مؤتمر عقد بمصر، خلال أبريل 2021، جدد الملياردير المصري، اهتمامه بالحصول على رخصة بنك في مصر وفقا للضوابط والمعايير المحددة من قبل البنك المركزى، وقال إنه بيسعى إلى امتلاك وحدة مصرفية.
انتوا بقا إيه رأيكم في الفكرة وهل شايفين ساويرس قادر على تنفيذها؟
