10 مليار جنيه تكلفة زيادة على الدولة لدعم رغيف العيش بعد أزمة روسيا وتحرير سعر الصرف.و في 2022 اضطرت الحكومة تزود أسعار السلع التموينية مثل الزيت.فماذا سيحدث في 2023 وخاصة بعد ارتفاع سعر الدولار، وهل ممكن الحكومة تقلل عدد المستفيدين من بطاقة التموين؟ وهل خدمة إضافة المواليد الجديدة ستستمر أم ستتوقف؟
مع الارتفاع المستمر في الأسعار والغموض بخصوص مستقبل الدولار أمام الجنيه، يعني في خبرا بيتوقعوا استقراره عند المستوى الحالي، وفي مؤسسات تانية بيتوقع ارتفاعه زي دويتشة بنك كده.
البنك ده توقع ان الدولار يرتفع إلى 33 جنيه قبل مايستقر، عشان كده في ملايين المصريين قلقانين على الدعم سواء كنا بنتكلم عن التموين أو رغيف العيش.
وخصوصا بقى ان الحكومة في 2022 حذفت حوالي 153 الف بطاقة تموين نهائيًا من منظومة الدعم، وده عمل بلبلة في الشارع المصري.
بس الحكومة وضحت الأسباب، وقالت إن الحذف حصل مع الأسر اللي وقفت صرف السلع التموينية أو الخبز لمدة طويلة تصل لـ 6 اشهر
وكمان ده مصير المتعدين على الأراضي الزراعية أو البناء على الأرض الزراعية
وخد بالك لو الحكومة اكتشفت مرتين انك سايب بطاقة التموين بتاعتك عند مخبز بلدي أو بقال تمويني هتحذف بطاقتك انت كمان من منظومة الدعم.
في الوقت نفسه وزارة التموين، وضحت عدد الأفراد المسموح بهم في بطاقة التموين 2023، وحسب الوزارة الحد الأقصى على البطاقة 4 أفراد.
فلو عدد أسرتك على البطاقة أقل من كده، تقدر تستفيد من خدمة إضافة المواليد الجدد، وتزود عدد الأشخاص المستفيدين في أسرتك من الدعم، بس خد بالك في كام شرط لازم تنفذهم الأول عشان طلبك يتقبل.
يعني لازم تكون من الأسر الأولى بالرعاية، ومعاش رب الأسرة مايزدش 2500 جنيه، ولو توافر فيك الشروط دي، كل اللي عليك تسجل الدخول إلى بوابة مصر الرقمية.
وبعدين اختار خدمات التموين لاضافة المواليد لبطاقة التموين، وتحديدا إضافة أفراد أسرتي غير المقيدين.
ساعتها هتظهرلك خدمة إضافة مواليد جدد على بطاقة التموين: اكتب اسم ابنك أو بنتك رباعي، وبعدين دخل الرقم القومي الخاص بيهم والمدون في شهادة الميلاد.
واخيرا وضح صلة القرابة بينك وبين الطفل يعني ابن أو ابنة، وبعدها اختر الصفة (ضم أبناء) ودوس إضافة. وحسب آخر الأرقام المعلنة من الحكومة، مصر فيها 23 مليون بطاقة تموين بيستفيد من خلالها 64 مليون مواطن، كمان في 73 مليون بيستفيدوا من دعم العيش.
والفرق بين الرقمين سببه ان في مصريين بياخدوا دعم العيش بس، لكن ملهمش حق في صرف باقي السلع التموينية زي السكر والزيت والرز.
وفي النهاية بقى يهمنا نسمع منكم، انتم كام فرد على بطاقة التموين؟ وفلوس التموين بقيمة 50 جنيه لكل فرد بتجيب إيه في الشهر؟ وهل واجهت مشكلة ليها علاقة بالحذف أو إضافة المواليد الجدد؟ في انتظار تعليقاتكم.
