افرحوا يا مصريين الرئيس السيسي في وسط غلاء الأسعار يعلن عن خبر سار يفرح ناس كثيرة:1000 جنيه اعانة عاجلة، واصدار شهادة امان التي كانت موجوده من 2017، وفوق هذا كله صندوق للطوارئ، دهذا غير قرارات أخرى.
وطبعا انت بتسأل دلوقتي: ايه تفاصيل ال 1000 جنيه؟ ومين هياخدها؟ ويقدر يصرفها امتى؟ وكمان وباقي القرارات بتقول ايه؟
من مصنع الشرقيه للسكر، السيسي قرر يحتفل بعيد العمال 2023، عشان يطمن المصريين ويقولهم:مهما كانت التحديات في مصر والمنطقة والعالم، مهما كانت، شوفوا طول ما إحنا على قلب رجل واحد ما حدش يقدر يعمل معانا حاجة.
وبمناسبة عيد العمال، السيسي أعلن عن 5 قرارات كل واحد فيهم اهم من التاني.واول قرار هو إنشاء صندوق إعانة طوارئ للعمالة غير المنتظمة وتحويل مستحقات الحسابات الاجتماعية والصحية عليه.
طيب الصندوق ده مهتمه إيه؟ هيستثمر الفلوس اللي هتجيله ويصرف منها في حالات الطوارئ والأزمات على العمالة غير المنتظمة.وبعد انتهاء الاجراءات القانونية لإنشاء الصندوق وتفعيله هيحصل القرار التاني وهو:
صرف إعانة عاجلة بقيمة 1000 جنيه.بس خد بالك: اللي هيستفيد منها العمالة غير المنتظمة وبشرط: متكونش مسجلة في برامج الحماية الاجتماعية زي معاش تكافل وكرامة مثلا.
وتالت قرار للريس كان إصدار وثيقة جديدة من شهادة أمان اللي سبق وأصدرتها الدولة في 2017.ودي شهادة الغرض منها تغطية التأمين على الحياة وإصابات العمل للعمالة غير المنتظمة.
أما رابع قرار فهو : توجيه المجلس الأعلى للحوار الاجتماعي في مجال العمل، بدراسة مشروع قانون العمل المعروض على مجلس النواب، وده هيكون بحضور ممثلي العمال، وممثلي أصحاب العمل، عشان يوصل للصيغة النهائية والقانون يدخل حيز التنفيذ.
وأخيرا ييجي دور القرار الخامس وهو سرعة إطلاق المنصة الوطنية لمعلومات سوق العمل.
وده غير التأكيد على كل منشآت القطاع الخاص، والقطاع العام وقطاع الأعمال العام، بالالتزام بالنسبة المقررة قانونا “٥٪”، لتشغيل الأشخاص ذوى الإعاقة.
ومع اصدار القرارات دي، أكد الريس إن الدولة مهتمه بالعمال دايما وده باين من خلال قراراتها السابقة زي زيادة الحد الأدنى للأجور، وإطلاق برامج الحمايه الاجتماعيه وزياده عدد المستفيدين منها.
وكمان دمج ذوى الاحتياجات الخاصة فى سوق العمل، والتوسع فى المشروعات القومية لتوفير فرص بمرتبات كويسة وظروف عمل مناسبة.
وختم الريس رسالته للمصريين لما قال: في كل تحدي وتطور وتبقوا قلقانين منه وهيبقا تأثيره إيه علينا .. تأثيره ولا حاجة.. مهما حصلت من أزمات ومشاكل في العالم طالما في مصر كشعب متماسكين كده ولا فيه أى مشكلة ونقدر نعدي أى حاجة”.
انتم بقى شاركونا برأيكم في القرارات الجديدة؟ ولو تعرفوا حد هيستفيد من منحة ال1000 جنيه ابعتله الفيديو حالا!
