في 21 يوليو، صندوق الذهب أعلن عن بدء الإكتتاب فيه وجعل ناس كثيرة تبدأ تتجه له خصوصا إنك تقدر تستثمر فيه بأقل مبلغ ممكن وتبعد عن سوق الصاغة.
لكن السؤال هنا هل صندوق الدهب على سوق الصاغة؟ وحجم الإقبال دلوقتي قد إيه؟ وإيه الفرق بين صندوق الدهب والسوق؟
خلال الأيام الأخيرة تم الإعلان عن بدأ الاكتتاب في أول صندوق أصدرته مصر للاستثمار في الدهب، وده خلى ناس كتير تبدأ تتجه للاستثمار فيه بدل ما يشتروا دهب من محلات الصاغة لكن يا ترا إزاي سوق الدهب أتاثر بالصندوق؟
بحسب تقرير لمؤسسة جولد بيليون واللي قالت إن أسعار الدهب في الأسواق المحلية بدأت تنخفض تدريجيا وده في الوقت اللي ارتفعت فيه سعر الأونصة عالميا.
وده معناه إن تسعير الدهب محليا كان مبالغ فيه بشكل كبير والانخفاض اللي حصل في السوق دلوقتي ده تعديل في مستوى التسعير اللي قرب يوصل للسعر العالمي.
لكن السؤال هنا إيه سبب انخفاض أسعار الدهب في الفترة الأخيرة؟
بحسب تقرير لجولد بيليون نشره المصري اليوم أسعار الدهب انخفضت خلال الأسابيع الأخيرة نتيجة تراجع الطلب عليه في الأسواق لأسباب كتير.
أهمها الموافقة الرسمية على أول صندوق استثمار في الدهب اللي جذب شريحة من المستثمرين في الأسواق ليه وساهم في تخفيض الطلب على الدهب.
وقال كمان إن صندوق الدهب بيفتح الباب لناس كتير أوي وده عشان الحد الأدنى للإستثمار في الصندوق قليل جدا
وده ساهم في تحقيق الإستقرار في السوق لأنك ممكن تعرف سعر الدهب من خلال السعر الإسترشادي اللي بيعلنه الصندوق وده هيحد من التسعير المبالغ في السوق.
وكمل وقال إن الصندوق بشكل عام مش هيعمل تراجع على طلب الدهب عالميا لإن الإستثمارات موجودة بالفعل في الدهب لكن هيحد من الطلب عليه في السوق المحلي.
لكن يا ترا إيه اللي يخلي الناس تثتثمر في صندوق الدهب وتبعد عن الصاغة؟أنا أقولك صندوق الدهب فيه ميزة تخلي كل الناس تثتثمر فيه ويخليه الخيار الأول ليهم وده لأن الإستثمار في صندوق الدهب بيبدأ بـ 10 جنيه بس.
وده من خلال شرا وثيقة إستثمار من الصندوق سعرها 10 جنيه والحد الأدنى لشرائها هما 10 وثايق بقيمة 100 جنيه وممكن تشتري أكتر زي ما أنت عايز بحسب المصري اليوم..
وعلى فكرة ممكن تسترد قيمة الوثايق فلوس أو تاخد الدهب عيني لكن بشرط: قيمة الوثائق تغطي تمن 50 جرام دهب. أما الشرا من الصاغة فده بيلزمك دفع قيمة الدهب اللي متقلش عن 2300 جنيه للجرام الواحد وده مبلغ ممكن ميتوفرش مع ناس كتير
وبحسب إيهاب رشاد خبير سوق المال في تصريحاته لمصراوي قال إن في إقبال متزايد على صندوق الدهب و على فكرة الإكتتاب بيتم فيه أون لاين.
وقال كمان إن الإقبال في الأيام الأخيرة بيزيد بشكل ملحوظ وده لأن المستثمرين المحترفين مش بيبدأو في الإكتتاب في الأيام الأولى للصندوق.
أما معتز عشماوي الخبير المالي قال للمصري اليوم إن من المتوقع إنه يتم قفل الإكتتاب في أي وقت بصورة مفاجئة، عشان كده لازم المستثمرين يبدأو الحجز في الصندوق قبل ما الإكتتاب يقفل فجأة.
ودلوقتي قولنا إيه رأيك في صندوق الإستثمار في الدهب؟
