هل البنك المركزي يقوم بتعويم الجنيه بعد اجازة العيد مباشرة؟ أم أن استقرار سعر الدولار في البنوك معناه انه لن يكون هناك تعويم من الاساس؟ وهل توجد مؤشرات جديدة على خفض قيمه الجنيه؟ وما ورأي صندوق النقد الدولي في سعر الجنيه؟
بداية كده وقبل أي حاجة، خلينا نتفق ان سبب الأزمة دلوقتي في مصر هو نقص الدولار، عشان كده بتزيد التوقعات بخفض جديد في قيمة الجنيه.
وده بيأكده 3 مؤشرات عن سعر الجنيه أمام الدولار في المستقل لازم نبص عليهم، وأولهم:
سعر الدولار في العقود الآجلة على الجنيه لمدة 12 شهر، واللي وصل فيها سعر الدولار الواحد إلى 43 جنيه في الساعات الأخيرة..
اتنين: الفرق بين سعر سهم بنك الcib في بورصة مصر وبورصة لندن: المفروض ان سعر السهم في البورصتين يبقى واحد او بفارق قليل اوي.
لكن الوضع دلوقتي ان الفرق حوالي 30%، وبحسبة بسيطه هنلاقيهم مسعرين الدولار على اكتر من 40 جنيه، حسب عدد من المواقع.
و المؤشر التالت: ظهور السوق السودة من تاني، وصحيح الأيام اللي فاتت سجلت السوق السودة هبوط في سعر الدولار، مع استقرار سعره في البنوك تحت مستوى ال31 جنيه.
لكن لسة في فجوة بين السعر الرسمي وسعر السوق السودة اللي وصل إلى 35 بدلا من 38 جنيه.وده كله بيأكد ان في انخفاض جديد في قيمة الجنيه، أما بقى لو هنتكلم عن سعر الدولاور فمحدش يقدر يحدد بالظبط.
لكن البنوك العالمية تتوقع انخفاض الجنيه بحوالي 10% ومن أشهرها بنك HSBC اللي توقع تسجيل الدولار الواحد مابين 35 إلى 40 جنيه في المتوسط.
وحسب هاني جنينة الخبير الاقتصادي، الصندوق منزل تقرير جديد، لو دققنا في أرقامه هنعرف هو شايف قيمة الجنيه ازاي، وهي 25.8 جنيه للدولار، في العام المالي الجاري واللي بدأ في يوليو 2022، وهيخلص في 30 يونيو الجاي.
وبعدها هيحصل زيادة مستمرة في قيمة الدولار عشان يسجل 39.6 جنيه في 2027-2028، حسب كلامه.كمان المحللة الاقتصادية، منى بدير اتكلمت عن انخفاض متوقع في سعر العملة في حدود ما بين 10 و15٪.
واتفق معاها رشاد عبده اللي شايف إن زيادة الطلب على الدولار مع نقص المعروض منه، معناه ان ارتفاع سعر الدولار الأيام الجاية هيحصل هيحصل سواء بقى كان دفعة واحدة، أو تدريجيا.
وبكده يفضل اخر سؤال: طالما في تحريك جديد في سعر الجنيه، ليه اتأخر لغاية دلوقتي؟
محمود نجلة الخبير المصرفي، شايف إن ارتفاع سعر الدولار هيحصل بالتزامن مع دخول تدفقات دولارية جديدة للبلد ومصدرها هيكون صفقات البيع للمستثمرين الخليجيين.
وفي نفس الوقت وكالة بلومبرج اقتصاد الشرق، كشفت عن اقتراب موعد بيع المصرف المتحد خلال الاسابيع الجاية، وده واحد من ضمن ال 32 شركه وبنك اللي عرضاهم الحكومه للبيع في برنامج الطروحات الحكومية.
وحسب مصدر مسؤول للوكاله ة، الحكومه قبلت عرضين بس من ضمن كل العروض، وبعد العيد علطول هتختار واحد منهم وبعدين تبدأ اجراءات البيع مباشرة..
فهل تفتكروا الكلام الخبرا هيطلع صح؟ وبمجرد دخول الاموال الخليجية هنشوف ارتفاع جديد في سعر الدولار؟
شاركونا في التعليقات
