انخفاض.. تراجع.. هبوط.. كلها كلمات لها نفس المعنى وبيجمعها حاجة واحدة: سعر الجنيه امام الدولار. وتستطيع أن تقول أن الناس بانتظار قرار تعويم للجنيه مرة اخرى، ولكن وكالة عالمية قلبت الموازين بتوقعاتها لمستقبل الجنيه.
فيا ترى ليه قالت ان الدولار هيبقى ب 33 جنيه وبعدين هينزل ل 30 جنيه ؟ وإمتى ده هيحصل؟خليكم معانا عشان تعرفوا كل التفاصيل
تقرير جديد من وكاله فيتش العالميه توقعت فيه صمود الجنيه امام الدولار، عشان يسجل الأخضر على نهاية السنة 30 جنيه بس.
وطبعا انت دلوقتي بتقول يا فرج الله يعني كده مفيش تعويم، قبل ما تتسرع خلينا نشوف باقي التقرير بيقول ايه.الوكاله العالمية يا سيدي قسمت مستقبل الدولار امام الجنيه لفترتين: فتره قصيرة، وفتره أبعد شوية لغاية نهايه السنه.
وفي الفترة القصيرة متوقع ارتفاع سعر الدولار الى 33 جنيه، نتيجة استمرار شح الدولار في السوق.وعلى فكره ده يتناسب مع توقعات عدد من البنوك العالمية منهم مثلا بنك سوسيتيه جنرال اللي شايف ان الجنيه قيمته هتقل قريب عشان يسجل الدولار حوالي 35 جنيه في نهايه مارس تحديدا.
بس الفرق هنا بقى في اللي هيحصل بعد كده، وهل الانخفاض ده مستمر ولا مؤقت؟اجابه وكاله فيتش كانت متفائله اكتر وشايفه ان الدولار بعد صعوده ل 33 جنيه هيرجع ينزل تاني لمستوى ال 30 جنيه طيب ازاي؟
السر يا سيدي في برنامج الطروحات الحكوميه لبيع 32 شركة، وببساطة كده الوكالة حاطة أملها علي الإسراع في بيع الأصول المملوكة للدولة مع بداية النص التاني من السنة.
وطبعا ده هيزود تدفقات العملات الأجنبية لمصر، ويقلل الفجوة بين سعر الصرف الرسمي في البنوك والسعر في السوق الموازية.
وحسب الوكالة، برنامج صندوق النقد الدولي والمساعدات من دول الخليج هيخففوا الضغط علينا بس ده برده ميمنعش ان المخاطر لسه موجوده ولازم الحكومه تتحرك بسرعه عشان تضمن دعم اكبر من دول مجلس التعاون الخليجي.
طيب هي وكالة فيتش بس اللي نظرتها إيجابية للجنيه ولا في مؤسسات تانية بتتفق معاها؟
في الحقيقه وكاله رويترز اعلنت عن استطلاع في بدايه السنه سألت فيه 18 خبير اقتصادي عن توقعاتهم لسعر الجنيه امام الدولار، و كانت النتيجه ان الدولار على نهايه السنه يبقى ب 28 جنيه بس.وطبعا دي تحليلات متفائلة شويه مقارنه ب سعر الدولار في العقود الاجله على الجنيه لمده 12 شهر.
ودي نوع من العقود بيتفق فيه الطرفين على بيع وشراء الدولار بسعر معين بعد مدة محددة، جينا بقى ةاميعاد التسليم والدولار طلع او نزل الطرفين ملهمش دعوه، الاتفاق هيتنفذ هيتنفذ.
وبص بقى على اخر الأرقام العقود الآجلة للجنيه هتلاقي ان المستثمرين متفقين على شراء وبيع الدولار بعد 12 شهر بسعر 40 جنيه للدولار الواحد.
انتوا بقي توقعاتكم إيه؟
