كلها شهور معدودة والدولار يصل سعره لـ 34 جنيه وهذا لن يكون سعر السوق السوداء لا سيكون السعر الرسمي المعلن في البنوك.
ومش بس كده ده كمان سعر الدولار هيوصل لـ 35 جنيه في 2024، طيب ياترى إيه اللي هيحصل بعد كده وياترى الكلام ده ممكن يأثر إزاي على قوة الجنيه في السوق
وكالة عالمية كشفت سيناريوهات مستقبل الجنيه على مدار 3 سنين قدام فتعالو نشوف إيه اللي هيحصل للجنيه:
تقرير جديد من وكالة رويترز اتكلم عن مستقبل الجنيه لـ 3 سنين قدام.اللي حصل إن وكالة رويترز جابت خبراء اقتصاد وسألتهم عن توقعاتهم لمستقبل الجنيه المصري الفترة الجاية .
الغريبة إنهم أكدوا إن الجنيه قيمته هتنخفض بحلول نهاية ديسمبر 2023، وهيسجل الدولار 34 جنيه.وقالوا كمان إنه هيسجل مستوى 35 جنيه في نهاية ديسمبر 2024، أما بقى في 2025 فتوقعوا انه هيسجل الدولار 35.07 جنيه .
ولو انت مش متابع فـ أحب أقولك إن سعر الدولار فيالبنوك الرسمية قرب من 31 جنيه الفترة دي والسعر ده مكنش من فراغ
ده نتيجة سياسات عملها البنك المركزي المصري وهي إنه اتبع سعر صرف مرن للجنيه من شهر مارس 2022.
وده اللي خلى سعر صرف الدولار مقابل الجنيه يرتفع خلال أكتر من 13 شهر بحوالي 96% عشان يسجل من 15.76 جنيه في 20 مارس 2022 لـ 30.94 جنيه بنهاية تعاملات البنوك النهاردة .
وطبعا ده كان مطلب أٍساسي لـ صندوق النقد من الحكومة المصرية خاصة بعد ما مصر وصلت لاتفاق مع الصندوق وحصلت على برنامج تمويلي لقرض بقيمة 3 مليار دولار في ديسمبر اللي فات .
والمفترض إنه خلال الشهر الجاري إن صندوق النقد هيبدأ يراجع البرنامج الاقتصادي اللي بتعمله الحكومة المصرية وده هيكون قبل ما يقرر يصرف الشريحة التانيه من القرض .
الغريبة إن المراجعة دي كانت المفروض تحصل في شهر مارس اللي فات، لكن في خبراء اقتصاد قالوا إن التأخير اللي حصل ده بسبب بطء الإجراءات اللي كانت الحكومة لازم تعملها ضمن خطة البرنامج لكن تأخير الحكومة خلى الصندوق هو كمان يتأخر في صرف الشريحة التانيه من القرض.
وعشان كده صندوق النقد الدولي الفترة دي مستني تنفيذ مصر لبرنامج الإصلاحات واسعة واللي اتعهدت بيها الحكومة قبل ما الصندوق ما يعمل عمليه المراجعة الأولى لبرنامج إنقاذ بقيمة 3 مليارات دولار.
وحسب تصريحات لوكالة بلومبرج العالمية فـ المقصود بالإجراءات دي هي اتباع سعر صرف كرم للجنيه المصري، وكمان تنفيذ برنامج الطروحات الحكومية اللي تم الإعلان عنه وطرحت الحكومة 32 شركة حكومية للمستثمرين عشان يتم بيعهم سواء بشكل مباشر أو يتم طرحهم في البورصة
والخطوة دي الهدف منها تحديدا هو سد الفجوة التمويلية للدولار واللي بـ تعاني منها مصر الفترة دي نتيجة الأزمة الروسية الأوكرانية.
نيجى بقا لأهم سؤال إمتى الحكومة هتخفض الجنيه؟وياترى ده هيتم مرة واحدة ولا بشكل تدريجي والدولار فعلا هيوصل لـ 34 جنيه ؟
بص يا سيدي خبراء الاقتصاد بيتوقعو إن البنك المركزي مش هيستمر في سياسة تحريك سعر الصرف خاصة وإنها بتأثر بشكل سلبي على التضخم لكن هيحاول يكسب وقت عشان تقدر الدولة تدخل موارد دولارية جديدة سواء من برنامج الطروحات أو من قطاع السياحة أو قناة السويس.
انتوا بقا شايفين إن الجنيه رايح على فين وهل شايفين إن الكلام ده منطقى ؟
