بيع أصول ، طرح صكوك سيادية، وتقليل الاستيراد، كلها خطوات بتنفذها الحكومة من أجل أمر واحد فقط وهو توفير الدولار
وهنا طبيعي تسأل نفسك هو احنا محتاجين دولار قد إيه؟ والديون المطلوبة سدادها كام؟ وهل الأزمة هتخلص في 2023 ولا اللي جاي أصعب من اللي فات؟
في مصر.. الدولار هو عنوان الأزمة الرئيسي: لو وفرناه كل مشاكلنا هتتحل، وعشان تعرف ده هيحصل ولا لأ، لازم في الأول تعرف احنا اصلا مطلوب مننا كام.
وده ياخدنا لتقرير البنك المركزي اللي وضح ان حجم الالتزامات على مصر في العلم المالي 2022-2023 حوالي 20.2 مليار دولار، منهم 8.7 مليار دولار خلال النصف الأول من السنة، وده انتهى في ديسمبر 2022.
يعني معناه انه بداية من يناير اللي فات لغاية نهاية يونيو الجاي مطلوب من مصر 11.5 مليار دولار..وحسب بيانات البنك المركزي المصري، الدول العربية تمتلك 25.1% من الديون الخارجية لمصر، ومن بعدها صندوق النقد الدولي بنسبة 15%
ولو هنتكلم عن جدول سداد الديون تحديدا، هتلاقي في نوعين من الديون، النوع الأول ديون قصيرة الأجل بقيمة 26.4 مليار دولار لازم نسددها خلال سنتين.
والنوع التاني ديون متوسطة وطويلة الأجل بأكتر 72.4 مليار دولار حتى نهاية 2025، ومتقسمين كالتالي:
8.32 مليار دولار حتى نهاية يونيو 2023، و24.2 في سنة 2024.وفي 2025 مطلوب 15 مليار دولار تقريبا، وفي 2026 مطلوب 16.8 مليار دولار..
ضيف على كده كمان كلام الرئيس السيسي لما قال اننا لو عاوزين نخلص من دوامة الدولار والجنيه لازم نغطي فجوة استيرادية بقيمة 30 مليار دولار سنويا.
وعشان ننفذ ده ، محتاجين استثمارات بقيمة 100 مليار دولار على 5 سنين، وهنا طبيعي تسأل: مصر بيجيلها دولار منين؟
عندنا 5 مصادر أساسية هي تحويلات العاملين المصريين في الخارج، والصادرات، وقناة السويس، والسياحة، والاستثمار الأجنبي المباشر، وده طبعا غير القروض من المؤسسات الدولية والاقليمية أو ودائع الأشقاء في الخليج.
ومؤخرا بدأت الحكومة تدور على مصار تانية أهمها ، طرح 32 شركة وبنك للبيع 2030, مع خطة لتسييل أصول تابعة للدولة بقيمة 40 مليار دولار على مدار 4 سنين.
وكمان الاعلان عن برنامج لطرح صكوك سياديه في الاسواق الدوليه بقيمه 5 مليار دولار على 3 سنوات, بالفعل طرحنا منهم 1.5 مليار دولار في شهر فبراير.
وهنا مؤسسة “أكسفورد إيكونوميكس أفريكا” اتكلمت عن الوضع في مصر وقالت اننا محتاجين نبعد عن خطر التخلف عن السداد، بس ده مش معناه اننا زي سريلانكا اللي أعلنت إفلاسها، احنا عندنا احتياطي أكبر وخيارات تمويل اكتر، فهل تفتكروا الحكوكة هتعرف تتعامل صح؟
