قضية شغلت الرأي العام الفترة الماضية وهي قضية نورهان خليل فتاة بورسعيد التي أنهت حياة والدتها بالاتفاق مع عشيقها. القضية التي ظهرت فيها مفاجأة مدوية عن تسريب تسجيل صوتي يكشف كيف خطط المتهمين لارتكاب الواقعة؟ وكيف فعلوا فعلتهم؟ وكيف أدخلت شريكها المنزل وأمها نائمة؟ تفاصيل كثيرة سنتعرف عليها من خلال التقرير التالي:
النهارده الصبح كانت محكمة جنايات بورسعيد كلها مقلوبة عشان القضية اللي شغلت الرأي العام خلال الفترة اللي فاتت، وهي قضية فتاة بورسعيد اللي خططت مع عشيقها إنهاء حياة والدتها بسبب اكتشافها لعلاقاتهم غير الشرعية.
وخلال جلسة المحكمة، كشف ممثل النيابة العامة عن مفاجأة وأنهم حصلوا على تسجيلات صوتية لثلاث مكالمات بين الفتاة المتهمة وعشيقها، صدرت من تليفون المتهمة وكشفت عن خطة المتهمين وعن ميعاد تنفيذ الواقعة، وإزاي هان على البنت أنها تنهي حياة أمها.
وأثبتت التسجيلات الصوتية أن المتهمين خططوا بكل قسوه لإنهاء حياة الأم، واستعدوا لأي مشكلة ممكن تحصل، وازاي يتصرفوا فيها.
ساعدت البنت عشيقها أنه يدخل بيتهم وقت نوم أمها معاه عصاية وأداها بيها على رأسها وهي نايمة.. وكمان ساعدت البنت في الواقعة وجابت مياه ساخنة ورمتها عليها.
وبعد ما المحكمة سمعت التسجيلات اللي حصلت عليها النيابة، أصدرت حكمها وفي ظرف دقائق من بداية الجلسة وهو إحالة البنت لفضيلة مفتي الجمهورية لأخذ الرأي الشرعي في تسليمها لعشماوي لتنفيذ الحكم.
واتفقت مع رأي النيابة، اللى قالت فى مرافعتها، أنها شايفة إن نورهان ارتكبت واقعة صعبة من أي واقعة ممكن تحصل، وإنها إزاى تعمل كده فى أمها، ده الحيوان نفسه مش ممكن يعمل كده فى أمه، ده غير طبعا علاقتها مع ابن الجيران اللي عنده 14 سنة وأصغر منها بـ6 سنين، واللي أصلا محسوب على الدولة قاصر.
الغريب أن كان فيه محامية مع المتهمة نورهان، واختلفت مع رأي المحكمة والنيابة، وكمان قالت إن الحكم ده ممكن يتغير فى مرحلة النقض، وإن فيه بطلان في أمر الإحالة للجنايات الخاص بالمتهمة، لأن توقيع المحامي العام مش مكتوب بشكل واضح، وإنها طالبت بتعديل القيد والوصف اللى اتسجلت بيه القضية، وده لإلغاء سبق الإصرار، و انتفاء الواقعة بركنيها المادي والمعنوي.
مش بس كده، دي كمان زادت فى كلامها وقالت إن البطلان موجود في اعتراف المتهم، وإن مفيش قصد جنائي للمتهمة، وإن نورهان كل اللى كانت بتعمله بتنفذ أوامر المتهم، وكانت بتحاول الخروج الآمن من خطأ ممارسة العلاقة بينهم.
تفتكروا مصير نورهان هيكون إيه، هل هينفذ فيها الحكم وتروح لعشماوى، ولا هيكون في الموضوع جديد، اكتبوا رايكم في التعليقات.
